نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة

هلالي الظهران · #35 16/09/2006, 05:37 AM

يا شباب بلا استهبال اللي ناظلني يقوم الله لايهينه ويغسل عيونه بشاهي مر وصدقوني ابسامحه

!!

اعوذ بالله من ابليس احس جسمي صار مصدر حراري من اهم مصادر الطاقه في البلاد

والنوم مخاصمني وادري فيه لا بدت المحاضرت بيقول اسيبك لااا

يا اخوان انا ربي قدر علي وصابتني سخونه ورحت الدكتور وكتب لي ادويه بعشرة الف ريال (لحد يدقق السخونه وماتسوي

) بس الظاهر الى الان مابان مفعولها والظاهر فيها حبوب منشطه .. حاولت ارقد مابه فايده دخلت اتسبح بعد مابه فايده .. صليت الفجر وحاولت انام لكن النوم عيا لايجيني .. ماوعيت الا ونا فيذا

,,

خلوني انتهي من كم رد .. ونصيحه لوجه الله .. لاتدين احد ابد ولا تكتب موضوع طويل

,,

سندريلا الهلال

يالله حيها استشاريتنا .. اول مره اقولها

.. مع ان هالاسم يسبب لي حساسيه كاننا جالسين بمستشفى بسم الله علينا

..

اولا حياك الله .. ثانيا الف الف مبروك المنصب وتستاهلين والله واعذريني على التاخير بس يوم عينوك كنت غايب عن المنتدى والسعوديه بكبرها وماحصلت فرصه اباركلك..

إقتباس


	هلالي الظهران الحمد للة على السلامة

الله يسلمك ويسمنك ويسمرك ..<< قديييييييييم

إقتباس


	أما الشروط والتنبيهات تقل داخلين سينما وراك شايل على البنات حملة والله أغلب مايكتب ملاحم ولا قصائد ولاخواطر الا الشباب البنات مايكتبون الا بالقطّاره لان القافية تبطي تطلع معهم لأن خواطرهم من النوع الأصلي وين لقمة القاضي على غفلة

لا لا اي سينما ..على الاقل عندي مافيه اختلاط

.. اما الشباب هم راعين الخواطر اسمحيلي اخالفك حضرة المستشاره .. روحي مجلسكم الموقر وعدي كم مواضيع الخواطر البناتيه وخذي معك الفيروسه تريها تهش ذبان وتصلح الفطور حق حبي تيماوي

,,

إقتباس


	أما فعلاً بصراحه الامر اللي تطرقت له خصوصاً العاملات المنزليه لابد من عدم اغفاله والانتباه له لان الظاهر مافيه بيت يوجد فيه اكثر من ثلاث افراد الا والشغاله تشاركهم فيه الله يصلحنا بس

وعليك الحسبه عاد كل مازادوا ثلاثه زادت عامله .. والشيبان من هنا يخلفوا والحسابه(فيو) بتحسب

,,

إقتباس


	ورفقاء السوء وما ادراك مارفقاء السؤ الله يكفينا شرهم ويبعدنا عنهم ويرزقنا الصحبة اللي تعينا على الخير وللخير يارب

امين امين..

إقتباس


	الله يعطيك ألف عافية على الموضوع الفكاهي شكلاً المفيد مضموناً بالتوفيق لك

الله مير يعافيك ويكبر مافيك ..<< بعد قديييييييييييم

تسلمين سندريلا على مرورك المهيب وردك الوافي ,,

الا على فكره سندريلا.. البارحه قاري نك في البلوتوث باسم "سندريلا مضيعه نعلتها " لايكون لك بس

سحر الشرق

اهلا وسهلا بسحر الشرق وعبق الماضي وريحة الحاضر وامل المستقبل <<<< حشا صايره دعاية بروجيه

هلا ابتساموه احسن شي انك رديتي بلغتنا لانه لو مسكت معك فصحى كان صار هنا سلق بيض .. تدرين قلبنا اسباني بس وجحدناهم <<<< ياشين الواثق

..

إقتباس


	اللقافة حولتني تحت برج الفيصلية أقصد جابتني هنا وعقب خلصت من الموضوع وقعدت أرد يجي هالمقرود يقول وصليني المدرسة أخاف أروح لحالي يالله أروح أوصله ثم أرجع يمدحون النظام هالأيام يعني لو ألقى أحد ماخذ مكاني أتفاهم معه @@@@@@@@@@@@@@@

ينعن ابو الفله ياناس .. سحر انا ابروح المحاضره الساعه 9 وابيك توصليني وياليت تسويلي ساندويش ولاتنسين تحطين الموزه والتفاحه

<< الى يومه حاقد على نضال السوري اللي بفصلنا

إقتباس


	عقب مارجعت هلا بأهل الظهران كلهم عاد تصدق وانا داخله أقول فيه نور غريب يوم شفت موضوعك قلت اهاا بس عرفت سر النور<<<اخلصي علينا

اييييييييييه اكيد جايه بشمس الرياض وش بتشوفين اجل

.. لا بس امكن كان فيه كسوف وانا جيت

..

إقتباس


	عودة جميلة بجمال روح تضمها جنباتك!! وحضور مختلف بابتسامة ترسمها حروفك!!

بسوي نفسي ماشفت هالسطرين حتى ما احوس الدنيا

إقتباس


	أقول يالظهراني أموت وأعرف وش سبب تعديل حبي تيماوي لموضوعك<<<<تركت كل الموضوع وطالعت التعديل تحت صدق لقااااافه أصلي

تصدقون انا اشوف الردود على الموضوع كثيره مهو لسواد عيوني ولا عيون مرمر بس علشان يعرفون لييه التعديل

..

يؤيؤ شوفوا شوفوا هوشه <<< هذا حط رجوله ههههههههههههههه

إقتباس


	عموماً يا سيد الرقالة=الرجال في رواية عن مصري يوم تحكي بياسر القحطاني ذكرتني بوحده خبله منذ ولدتها أمها تقول تصدقين يا ابتسام إذا شفت عدنان حمد<<<حقart تجيني حرارة وما أبي أحد يطالعني البنت صغيره عمرها 16سنة والله رحمتها

عدنان حمد عااااااد .. وللناس فيما يعشقون مذاهب !!

تعالي هنا وشو حرارته لايكون زي حرارتي بس ! وانا اقوووووول ليه انا مسخن مادريت ان ساندرلا بوليك تسوي كل هذا

..

ابتسام ادري انك تمونيت عليها تكفين روحي وجيبيلي من عقبها

..

إقتباس


	بحق لا اعلم أجرم من ومن تقع عليه مسؤولية ما وصل إليه حال فتياتنا.. الأهل؟؟ أم المجتمع؟؟ أم الفراغ العاطفي؟؟ لكن يظل الفراغ العاطفي الذي يعاني منه أغلب الشباب ذكورا وإناثا هو السبب الرئيسي في مثل هذه المشكلة.. وللمجتمع في مشكلة الفراغ العاطفي الباع الطويل فما زلنا نُجّرم ونوبخ كل من يصرح بمشاعره لصديق أو لقريب صغيرا كان أو كبيرا وياللعار!!

ايييييه كلنا نشكي فراغ العاطفه .. تايهين بقلوبنا ضميا حنان .. ساكنتنا احلام عذره خايفه مانحققها الخ الخ نسيت الباقي

إقتباس


	بعدين أنتم وش فيكم علينا كل واحد لازم يقحمنا في مواضيعه يالظهراني أي خواطر اللي تحكي عنها ممكن هي خاطره لكن ليس بالضرورة تكون في إطار((حبني وأحبك)) بعدين بدال ما أنت قاعد تتطالب بإننا نخفف شوي بالتنسيق أحسن لك تدور لك أحد يعطيك دروس بالتنسيق ويفكنا من إزعاجكم كأن ما ينسق غير البنيات

شلون اقحمتكم يعني .. خبري من يومكم محموقات عساك بالاقحام ان شاء الله << واحد مايعرف معنى الكلمه وماخذن احتياطه

..

بعدين الخاطره انا ماكنت في حبني واحبك بتصير هجرني وهجرتك ولا خانني وخنتك ;) .. وليه يادنيا المحبه تاخذين اللي احبه وافترق دربي ودربه وليه يادنيا

..

طيب ليه ماتصير الخواطر مثلا بالسواق او الشغاله او خاطره بالوطن ولا غوانتانامو او .....

بعدين التنسيق يكون احلى اذا كان مبسط ومعبر

.. يعني مو لازم اجمع كل الالوان فيه تقولين كانه فستان عبده هههههههههههههه ولا تجمعون فيه كل العبارات والتصاميم والزركشات تقولين كان الموضوع صاير كانه كرسيدا حق باكستاني كلها دناديش ههههههههههههههههههه ,,

إقتباس


	هلالي الظهران.. بلغك الإله بفضله وكرمه شهر الرحمة كما بلغك شعبان وأعانك على قيامه وصيامه وصالح الأعمال.. من الأعماق تحية لك أيها المتميز...

ياشيخه من باطن الاعماق والمياه الجوفيه اقدر مرورك وردك بس تكفين فكينا من ذا الحكي

,,

سحر الشرق اقدر هيبة مرورك اخيتي .. متصفحي صار كله عطر من مرورك سيدتي وفاحت رائحته وعمت ارجاء المكان.. شكرا من الاعماق ,,

ابو ريمان

الله حيوه الغالي .. الله يسلمك ويزوجك

وشاكر حرصك الدائم,,

يكفيني مرورك وتشريفك الموضوع واتمنى عودتك,,

البالون

حياك الله اخ نفيخه

..

تو مانور الموضوع واسفرت وامطرت .. اقول تعطيني لفه بس

,,

إقتباس


	وعليـكم السـلام ورحمـة اللـه وبـركاتـه أسفـرت وأنـورت و المـجـلس بـقدومـك مبصـووط ياهـلا واللـه بـ الظهـرانـي ,,

طيب يعني انت مو مبصصصوط .. انا عني مبسسسوط ولله الحمد,,

هلا فيك حبيبي والله تشرفت بردك واسعدني ترحيبك,,

إقتباس


	يقـولون أن جـدك سمـع عن السـالفـة ونـاويك نيّـة قشـراء << يقـولون أنا ماقلت شي ويقـولون أنـه نـاوي يسـوي عـلاقـة بيـنـه وبيـن مـرمـر بـس بعـد مايدبغـك << خخخخخ

يارجال هو طاقته الغيره مني بس .. وكانه وده يوم طقني انه يخمها بس ما اقول الا الله يطول بعمر الجده كاتمه على نفسه

..

إقتباس


	مشكـوور وكـرر حضـورك ,,

العفو ياغالي واسعدني مرورك,,

خلاص يكفي احس اني سويت انجاز

.. انا ابي افهم نفسي ليه دايم تنكبني وتكتب مواضيع طويله

.. هي تقعد تستانس وتذب على خلق الله وانا اتحمل من وراها

..

عاد الله يستر محاضراتي اليوم تبدا 9 وتنتهي 12 بس عندي لاب الساعه 2

والحراره شايفه شغلها والحيل مهدود والنوم بحححح

مع السلامه يابايخين