لأخذ العلم فقط العنوان ماله أي علاقه بما سيكتب لاحقاً أو يمكن يقرب من بعيد ما ادري
بس مثلكم عارفين دايم المجلات يحطون مانشيت على الغلاف ولي شريت المجله طلع ماله علاقه
مثلها مثل الكتب مثل الروايات ......الخ من الأمور اللي يستغفلون العالم فيها


ايوووووه نسيت أسلم


السلام عليكم
صباحكم عسل مساءكم ورد
كيفكم أخواني المحترمين وأخواتي الجميلات
يسعد أيامكم ويجعلها دوم مليئه بالأيمان وطاعة الرحمن


ابي اعرف ليه أمريكا رفضت توقيع إتفاقية "كيوتو" مثل ماسوت الدول الصناعيه الكبرى
امريكا بس من بين الدول الثمانيه الكبرى ماوقعت عاد العم بوش الأبن رغم أنه رفض التوقيع
يقول أن البشر مسؤلين عن زيادت الأنبعاثات الحراريه وارتفاع حرارة الكره الأرضيه...
سبحان الله وش الأختراع العظيم اللي قدمه لكن فيه سؤال هل الأمريكان بشر؟؟
والا هم مالهم دخل في العالم مسالمين وماساهموا في إرتفاع درجة الحراره


ولاننسى أن من حق إسرائيل الدفاع عن نفسها

هذي الجمله دايم أسمعها ولاعمري فهمتها:p


المهم أن مو هذا الموضوع اللي أبيه السالفه ومافيها ودي كلنا نتناقش في هذي الظاهره اتفقنا

ليه أحنا أحياناً نتصرف بعنف وبدون مانقصد نجرح الآخرين وما نراعي مشاعرهم؟؟؟


مثلاً لما نشوف أحد فيه عيب أي كان نوعه نتصرف بسماجه وقلة تهذيب
لما كنت في الحرم سمعت صوت ضحكات وسخريه من ناس بجنبي فالتفت أشوف وش يضحكون عليه
كانوا يضحكون من عائله معظم أفرادها مصابون بمتلازمة داون "منغوليين"وزيادة عليه البهاق
تذكرت حينها حديث الرسول عليه الصلاة والسلام"إن لم تستحي فاصنع ما شئت" اللي مااستحوا
من رب العالمين وهم في الحرم يتصرفون بهالطريقه هل بيخجلون من الناس او يراعون شعور الآخرين



يعني بعض الناس لو شاف شخص أعمى ينظر له بشفقه او يضحك على تصرفاته رغم أنه أحياناً
يكون هو الأعمى بقلبه أعرف أمرأه عمياء تطبخ وتخيط ملابسها بنفسها وآخر لاتفوته صلاة الفجر
جماعه رغم أن بيته بعيد عن المسجد ولايوجد من يوصله اليه وغيرهم كثير



والبعض لما يشوف شخص معاق ينظر له بشفقه أو يضحك منه أو ينظر له بإشمئزاز أو يخاف
ويحاول بقصد او بدون قصد يحسسه بإنه أقل من الآخرين او يتفرج عليه وكأنه تحفه


او البعض لما يزور مريض يحسسه بإنه بيموت ويتلفظ بعبارات مثل ياحرام والله أنك مسكين
بعدين يبداء بالتفصيل يا الله وجهك أصفر شكلك مريض <<<وكأنه مايدري
لما يطلع من المريض يمكن يموت بسبب الوهم اللي زرعه فيه مثل هالزوار أو يسخرون من الشخص
بسبب مرضه او يحرجونه بأسأله مالها داعي او يتكلمون بسوالف الموت والمرض ويزيدون عليه

مره زرت أحدى القريبات لي في المستشفى وكانت أمها مريضه وكانت تشرح لنا حلمها بصوت
مرتفع بحيث أن المريضه تسمع أنها حلمت أنها شافت بحر وأمور وشافت قريب قاطع فيهم
وكانت تقول له ماجيت الا لما ماتت أمي والمشكله أمها تسمع فكان ابوي يحاول يصرف الموضوع
يعني صعب مثل هالكلام قدام المريضه فقالت لأبوي"ياحليلك يا عبدالله لين الحين خبالك فيك
شيبت وما عقلت">>>طبعاً أنا مسكتها على ابوي اسبوع مزعجته بها >>أخيراً انتقمت لنفسي
لأنه قاهرني دايم يحرجني بشغلات قديمه ماسكها علي وما صدقت أجننه ياحبي له بس
طبعاً أمها دخلت غيبوبه وماتت بعد ثلاثة أسابيع تقريباً الله يرحمها


وأحياناً نشوف أشخاص بدناء أو تقريباً جسمهم مليان ونبداء إما بنصيحه تافهه له بتخفيف الوزن
أو إبداء تعاطفنا مع كميه الشحوم الزائده وكأنه محتاج لسماع مثل هالأشياء أو مايعرفها
وأحياناً إذا كان قريب نبداء بالنكات السمجه عليه وعلى البدناء والضحكات المزعجه

وأحياناً بمقالب سخيفه قد تنتهي بالمستشفى


اتمنى أشوف تعليقاتكم وآرائكم حول هذي الظاهره ؟؟؟




_ _ _ _ _ _ _ _ _ _ _ _ _ _ _ _ _ _ _ _ _

بعض مني وضعته هنا.....

بعد ما ماتت احلامً قتلها فارس الأحلام
وقفت أتأمل الماضي وبقايا جثة أحلامي

لقيت أن الورق أجدب وجفت مني الأقلام
ولقيت أن الحروف تموت وروحي تموت قدامي

وقفت فـ ساحل الذكرى أودع ماضيً مادام
شربت من العطش همه وباقايا جرحه الدامي

وحيده بعد ماماتت ظنوني فـ غابت الأوهام
جريحه بعد ما كذ ّب يقيني صدق اوهامي

غريبه في وطن جرحي تحطّم فرحتي الأيام
بقى لي حزني المخلص ويأسي مصدر الهامي

تموت بصدري الفرحه وتعصر روحي الآلام
يموت الكون في عيني وتذبل باقي ايامي

شتاتي مابقى منه شتاتٍ تجمعه الأعوام
تقسمني الهموم وقاسمتني باقي اقسامي

انا عفت الحياة وعافني هالموت والإعدام
انا مليت هالدنيا وملت مني اعوامي

هلابك حزني المخلص وفاك بقسوة الأيام
تعزي قلبي المكلوم بعد ماماتت احلامي

_ _ _ _ _ _ _ _ _ _ _ _ _ _ _ _ _ _ _ _ _

بالحب والإشراق