ولله إني أعجب لحال منتخبنا!! كلما قلنا هانت جاء علم جديد!!
بعيدا عن جلد الذات وتأنيب الضمير. علة المنتخب الأساسية هي تذبذب المستوى!
فزنا على كوريا عقب نكسة الثمانية وتصدرنا مجموعتنا وقلنا ماعاد على المنتخب خوف!
وتفاجأنا في المباريات الودية إنه ينهزم من لبنان ويالله يفوز على سوريا.
ثم قلنا لازم نباري المنتخبات القوية عشان يظهر المستوى. ولعبنا مع التشيك وقدمنا مستوى ولا أحلى.
وأطمأنينا على المستوى يوم شفنا مباراة تونس. ثم رجعنا على طمام المرحوم وانصكينا بأربعة!!
عندنا مواهب وعندنا فريق ممتاز بس المشكلة الوحيدة فينا هي إنعدام التفاهم وتذبذب المستوى.
وأكبر دليل على هذا مباراتنا مع أوكرانيا.
أوكرانيا كانوا مطبقين تبادل المراكز بشكل كبير حتى إنهم يهجمون كلهم مرة وحدة ويدافعون مرة وحدة.
وعشان كذا ما أستطاع منتخبنا إنه يخترق دفاعهم بسبب كثافتهم الدفاعية ولا إنه يرد هجومهم بسبب الكثافة الهجومية وأكبر دليل على هذا هو عدد الفاولات والركنيات المحتسبة لهم واللي سجلوا منها الأهداف.
ومع إن وصولنا إلى منطقتهم كان أكثر إلا إن تصويباتهم على المرمى كانت أكثر منا أو بالأحرى ما صوبنا على مرماهم ولا مرة مع إنه المفروض دام اللاعبين فهموا هالشي إنهم يعتمدون على التصويب من برا الثمنطعش خصوصا إن حارسهم مو ذاك الزود.
ومع إن حنا مدعمين الدفاع بأكبر عدد ممكن إلا إن أوكرانيا لقت المساحة الكافية عشان تخترق دفاعنا. وين راح دفاعنا! الله أعلم!
في النهاية صدقوني لو ثبت المنتخب على مستوى التشيك وتونس ما كان حصل اللي حصل!!
لكن مانقول إلا عسى أن تكرهوا شيئا وهو خير لكم!! والحمدلله الذي لا يشكر على مكروه سواه!!