السلام عليكم ،،،

لكل عضو ..
قدم عطاءه و بان أدبه ..
سال حبره و ظهرت كلمته ..
لك أنتَ أخي و لك أنتِ أختي ..

أحبتي لأنكم تستحقون أحاول و الكل يحاول تقديم ما يليق بكم !

و أين ما يليق بكم و قد اتخذتم السحاب مركباً و النجوم مصابيحاً فغطى نوركم و طغى على نور النجوم فكنتم أنتم النجوم و كنت أنا أحد الناظرين المستمتعين ..

فيا لحسن جمالكم و يا لروعة عطائكم و يا لمتعة حضوركم ..
يا لعجز كلماتي و ما حيلتي إن قصرت كلماتي فلم تسعفني و أسعفني جم كرمكم فتجاوز عن تقصيري ..

بعد قطع مساحات الشكر و العرفان للمنتدى و من ينتسب له و من يزوره لما يقدمونه لنا من حافز يدفعنا لتقديم ما يظل قليلاً بحقكم و من أجلكم ..

و بعد الشكر و التقدير لكل من هلالي الظهران و العنا ..

قد يكون من الظلم نزول هذه المشاركة بمعرفي الشخصي لمجرد حقوق الفكرة و لكن تظل المشاركة هي مشاركة هلالي الظهران و العنا و مشاركتكم أنتم و التي ستظل ناقصة من دونكم ..

كم أتمنى أن تتخيلوا أن هذه المشاركة نزلت بمعرف " من أجلكم أنتم أعضاء هذا المنتدى " !

اختصاراً فلا نريد الإطالة أكثر دعونا نستمتع بنسمات عطاء هلالي الظهران و العنا العليلة كما هي نسمات الهواء في ليالي صيف نجد ..

أبدأ بأسئلة العنا و إجابات هلالي الظهران ثم نغادر أرض المتعة وصولاً إلى أرض الاستمتاع مع أسئلة هلالي الظهران و إجابات العنا شاكراً لهم مرة أخرى و مقدراً تحملهم إياي و وفاءهم لهذا المنتدى ..

فشكراً هلالي الظهران و شكراً العنا ..


السوال الاول

هلالي الظهران ممكن تحكي لنا عن نظامك اليومي خليني اشرح لك اعرفك تفهم بسرعه اقصد يعني كيف تقضي 24 ساعه باليوم شكلك مافهمت طيب نشرح والله يعين يعني وش تسوي لما تصحى من النوم مو تقول اغسل وجهي يالذهين لحد ما قبل النوم شوف لو مافهمت بعد كل هذا مو لازم خلاص بكيفك
وعشان اسهل عليك السوال انت تنوم 10 ساعات وتقعد بالراشد 4 ساعات وباسياب الجامعه 6 ساعات يعني كل السوال عشان الاربع ساعات الباقيه تدري بلاش يمكن تقضي خصوصياتك فيها اقصد تقضيها يعني في مكالمات بريئه

الحين انت ووجهك وش تبي يوم انك تسال السؤال وتجاوب .. ياخي كان ارسلتلي رساله فيها الاسئله اللي تبي وانا بدوري ارسلها لابو ريمان..

واضح من سؤالك انك تبي نظامي اليومي اوقات الدراسه لانه يختلف تماما عن نهاية الاسبوع او الاجازات ..اول ما اصحى من النوم افتح عيني لحد ماقبل النوم اغمضها ..

طبعا مالي نظام يومي ثابت معين .. هناك امور اساسيه وغير قابله للتغير وبعض الامور تتفاوت من يوم لاخر على حسب اوقات الدراسه او ضغوط بعض الاعمال .. يعني احيان مايكون فيه ضغط دراسه او ضغط عمل وبالتالي تتوفر لي ساعات اضافيه واحيانا تكون علي ضغوط دراسيه او ضغوط عمل واضطر اني اقلل من وقت الراحه واللهو..

عموما خذ هالنظام اليومي العام .. 7 ساعات للمحاضرات والمذاكره ..7 ساعات للنوم والراحه .. 4 ساعات للامور الروتينيه من صلاة واكل و.. الخ .. ساعتين لتادية بعض الاعمال او المشاوير الخاصه ..ساعتين للراحه والمتعه تكون مع الشباب في كوفي او مقهى.. تبقى الساعتين الاخيره اللي تتغير بحسب الظروف .. احيانا تروح في تصفح الانترنت سواء مواقع علميه او منتديات واحيانا تكون عند البحر واحيانا تذهب مع ساعات المذاكره او مع الشباب او النوم..

بعدين لا تنسى اني عزوبي اسوي اللي ابي في الوقت اللي ابيه;) ..


السوال الثاني

لاحظت ان فيه علاقه حميمه >>>> ملعوبه هذي بينك وبين البنوتات الجميلات ممكن نعرف سرها

العنا كفك كفك .. ايه هذي الاسئله السنعه .. تصدق ان هالعلاقه الحميمه تمتد لبطون التاريخ .. من وانا صغير وهذا حالي تلقى البزران يلعبون كوره وحبشه بالحوش وانا جالس مع البنات العب معهم دكتور ومريض ولا فتحي ياورده ..
الوالده -الله يحفظها- تقول من يوم دخلناك الروضه والابلات ماعندهم سالفه الا انت ..في مره جات الابله للوالده تقولها.. انتبهي لولدك من الحين مايلعب ويمزح الا مع البنات وفي مره قلتله لو عديت الى خمسه بعطيك بوسه .. وانا نقزت بحلقها وسالتها ببراءه لو عديت لعشره تعطيني كم بوسه ..

العنا انت من جدك ولا تستهبل! يرحم والديك لا تشوه السمعه .. انا تعاملي مع العضوات مثل تعاملي مع الاعضاء تماما.. امكن انت تشوف فيه تفاعل بيننا في هالفتره لكن انت معذور لان تسجيلك القريب منعك انك تشوف هالتفاعل مع الاعضاء اللي عددهم تناقص كثير مقابل ازدياد في الجنس اللطيف من هالنمونه ..
انا تفاعلي يتركز على الموضوع اكثر من كاتب الموضوع نفسه ولو تتبعتني في منتدى اخر بتلقى نفس الاسلوب والحميميه مع اعضاء 99% منهم من الذكور..
يبقى التواصل الدائم بين الاعضاء سر الحميميه وقوة الارتباط..

اما العلاقه الحميمه بيني وبين العضوات فهي اشاعه مثل اشاعة علاقة أليسا فيني ..
واقول للمعجبات تطمنوا ترى ما لهالكلام أي اساس من الصحه ..



السوال الثالث

شوف باعطيك مصطلحات >>> طلعت فوق الطاوله عشان اكتبها هذا وانا غاشها من رد بو ريمان على بو راس الله يعافينا وياه ما ادري احس ان الكلمات هذي مالها داعي ثقيله وصعبه والمفروض نتركها عنا اوه نسيت الحبيب عالخط ايوه هلالي الظهران معي انت تعال نشوف هذيك الصعبه

بالحب والاشراق قصدي رائده الزعيم
محبوبه التيبه
نجمه الابداع >>> خلك عاقل لا تفشلنا :p
بو ريمان
القاضي
الجاحظ
>>>> آخر ثلاثه رد عليهم فصحى ترى ما يعرفون واذا انت بعد ما تعرف مو مشكله ارسلي ردك وانا اكتبها بالفصحى
التميميه التيبه بعد
فيو :p


يا خي مع اني ما احب التكلم عن الاعضاء بس لعيون المناظره نسوي ايتوها حاجه:p ..

رائدة الزعيم.. رائده من ابرز الاعضاء في الوقت الحاضر لاثرائها المجلس بكثير من المواضيع الادبيه ومواضيع النقاش.. وبصراحه لم اكن متابع جيد للاخت رائده من البدايه لكن ارى حاليا من خلال استكشافها لجوانب التميز في شخصيتها وبعد تحديدها خط سير معين خاص فيها تجلت كثيرا وبرزت بشكل لافت ومميز .. بالمناسبه رائده تتميز بذوق عالي جدا,,


محبوبة الزعيم.. محبوبه لها كاريزما متميزه وقويه .. وبرزت كثيرا في منتدى الاعضاء وكونت لها رصيد متميز بين الاعضاء وكانت محبوبه بالفعل اسم على مسمى..مشكلة محبوبه انها بخيله جدا على المجلس العام ومقله في تواجدها..اذكر اني قرات لها مقابله في منتدى الاعضاء فتغيرت نظرتي لها 180 درجه..بصراحه شخصيتها جميله ومثقفه وذات ثقه عاليه بالنفس واتوقع لها حظور قوي بالمجلس اذا عطت نفسها حقها واعطتنا جزء من وقتها,,


نجمة الابداع..الله يسامحك يا العنا احس اصابعي تتنافض .. بصراحه لست مؤهلا للحديث عن شخص بقامة نجمة الابداع.. لم اتعامل مع الاستاذه او المربيه نجمة الابداع مباشره لكن اعمالها تتحدث تتحدث عنها ولو اقتصرت على مجلة صدى الكلمات لكفتها!!
نجمة الابداع لها اسلوبها المتفرد وشخصيتها الاداريه ..ولها تواصل فريد من نوعه سواء من خلال المجله او مقالاتها التي تطرحها في جميع المنتديات الهلاليه.. ادبيا اراها رقم واحد على مستوى الشبكات الهلاليه.. نجمة الابداع معين لا ينضب وهي اقرب للكمال والكامل وجهه سبحانه,,


ابو ريمان..شهادتي فيه مجروحه وبصراحه ابو ريمان يعتبر الاب الروحي للمجلس العام مع كامل تقديري لمشرفي واعضاء المجلس..تشكل مقالات ابو ريمان المتنوعه والهادفه ثقل للمجلس .. ايضا ردوده المتوازنه وحضوره المتواصل مطلب لجميع الاعضاء في مواضيعهم لما تتميز ارائه بالحكمه والنصح.. ايضا تواصل ابو ريمان مع اغلب اعضاء المجلس بصوره تحمل كثير من الوفاء تعطي هذا الرجل محبه ومكانه خاصه بقلوب الاعضاء.. شخصيا يمثل لي ابو ريمان الشي الكثير وادين له بافضال كثيره وله مني كل تقدير واحترام اشبه بتقدير الطالب لمعلمه ,,


القاضي..بصراحه اشعر بالحرج عندما اتحدث عن شخص بهامة القاضي حامل لواء تطوير المجلس العام..من دون حرج ارى في ابو عبدالله الحرص على المجلس وتطويره دون غيره;) .. ابو عبدالله له حظوره المتميز وثقافته الواسعه واطلاعه تضيف للمجلس الشيء الكثير.. تواجد القاضي مهم جدا في المجلس ليفيد بتجربته وخبرته غيره من الاعضاء حديثي التجربه.. القاضي انموذج للعضو المثالي ويمثل قدوه للاعضاء,,


الجاحظ.. ابو عثمان او ابو فيصل كما يحب ..الجاحظ يشكل مع ابو ريمان والقاضي مثلث الحياه بالنسبه للمجلس العام.. الجاحظ غني بثقافته واطلاعه..جميل بتواضعه..مقنع بارائه.. دائما ما يطرح ماهو مفيد للاعضاء ..على فكره ابو فيصل حبيب قلبي وشهادتي فيه مجروحه وصديقي الصدوق جدا.. شخصيا يمثل لي ابو فيصل الشيء الكثير والكثير ولارائه ومشورته وقع كبير على نفسي والتحاور معه يعد متعه لا تضاهى.. لا اخفيكم اني معجب جدا بشخصية الجاحظ وطريقة تفكيره خصوصا ان هناك نوعا من الشبه في كثير من الامور الحياتيه بيننا .. ابو فيصل السموحه ان ذكرت مالا تحب ,,


التميميه.. عضوه مرحه وفرفوشه وزميلة مهنه .. هالادميه لها حس فكاهي خطير.. وبصراحه احرص على تواجدها في مواضيـــعي لان ردودها تعطي اضافه وبعد اخر للموضوع .. التميميه دائما ما تظلم نفسها لانها كسوله جدا ولاتخدم نفسها والمنتدى بطرح المواضيع رغم امكانياتها وقدرتها .. سوى ذلك فهي من افضل من يجيد الرد ودائما ما تكون سبّاقه لذلك ,,


الفيروسه الزرقاء.. حديث الساحه وشاغل الناس ..فيو لها وضع خاص جدا جدا وتعتبر حاله فريده في كل المنتديات الهلاليه بالرغم من تواجدها بالزعيم فقط! يعني امكن لو تمشي في الشارع تسمع الناس تتكلم عن الفيروسه .. على الرغم ان فيو معروفه بالمشاكسه والعناد فهي تحمل الكثير من الطيبه وبراءة الاطفال ..الفيروسه شخصيتها قويه وقياديه وفريده بين بني جنسها وتواجدها له هيبه طاغيه على مستوى الشبكه;) .. فيو تتميز بوفاء عجيب للمجلس وتواجدها ملح وضروري.. شخصيا اعترف بان مشاكستها لها طعم مختلف تماما ,,


السوال الرابع

بعيد عن المزح ومن جد ليه انت مهستر وفي روايه خبل يعني من وين اكتسبت هالصفه الحلوه

الزبدة أنه أعجبك والحمدلله سواء كان هستره او هبال .. أما مسألة اتخاذي للأسلوب الساخر فـهناك سببين:
1- هذي هي طبيعتي مع اللي أحبهم وأمون عليهم وأنا أحبكم وش اسوي
2-البعد عن التقليد ..لو نظرت للمواضيع والاقلام لوجدت اغلبها ان لم يكن كلها، ذات جديه..

وانا اخذت خط خاص فيني وهو الاسلوب الساخر واحاول إيصال المعلومة بروح الدعابه..

بدال لا أقول: وأشرق قوس قزح وغردت البلابل لان النصر تحقق ..
أقول: امس فزنا وحسنا ابو مندوب العدو ومسحنا فيهم البلاط!

البساطه في التعبير وبس !!

وذلك لا يمنع أن تكون لي مواضيع جاادة وأيضا لا يعني عدم اعجابي بالمواضيع الجديه ..


السوال الخامس

في واحد من ردودك الجديه >>> شكل مافي غير ذاك الرد لاحظت انك مرهف الاحساس وان لك وجه آخر بس مو جميل على قوله بو ريمان الا اشين من وجهك اللي نعرفه ممكن نشوف الوجه الثاني هذاك من خلال >>> يلوموني فيني بكتبها ثانيه من خلال سطور قليله او كثيره بكيفك

فيه حكمه كوريه تقول:-

شينق شوونق بينق نونق سرائولو لي كيم دونق !!

وعلى حسب ترجمة ابو مقبل الخريج فإن الحكمه تقول بالانقلش :-

تيوزداي سيجنال تووو ثانكس ستردااي فري قوود سرائولو واي ويلكم

( هذا اللي يعرفه ابو مقبل من الانقلش )

المهم الترجمه تقول :

اضحك للدنيا .. تقوم الدنيا .. وتضحك لك ..

طيب يالربع .. وش حيلة اللي ضحك للدنيا فقامت و(بصقت) في وجهه !!

اييييييه يالدنيا من جد غداره وأحسن مافيها البحر

وفي حكمه ثانيه طلعت معي قبل كم يوم تقول ..<< ورا ماتسكت وتجاوب على قد السؤال ..

اييه اذكره هذاك الرد ..ذلك اليوم جلست اافكر بوضعي .. حسيت بوحده .. وحشه . الفراغ يمزقني إربا إربا .. الخوف يلف المدينه والديكه تصيح في أعلى الغسق ..
الكل مظطرب ماعدا أنا .. نعم نعم انا .. مالي هكذا أبدو كالح الوجه منتفخ المناكب مطنقر البوز ؟ (( ويقولون لي ما أعرف أعبر ))

صديقي العنا انقشع من قدامي .. الحين هذا سؤال ينسال .. ياخي انا انسان مثلكم يابنو البشر ولا انت شايفني بني ادم مثلا .. ياعزيزي انا شعاري في عالم الانترنت اسعد من حولك تسعد ..

عزيزي تصنع المثاليه وادعاءها في عالم الانترنت سهله جدا وبامكاني ادعاء اي وجه اريده واتقانه ايضا !! الانترنت عالم وهمي ولا يشترط ان يتوافق مع الوجه الحقيقي في الحياة العامه!!

صدقني لو حاولت تتعرف على شخصيتي في الواقع ستتفاجئ .. انا انسان خجول بطبعي واحتكاكي قليل جدا بالناس .. عالمي الخاص لا يتجاوز ثلاثه من الاصدقاء فقط بل هم اكثر من اخوان.. دراستنا مع بعض روحتنا وجيتنامع بعض..سهرنا تمشيتنا اشغالنا سفرنا كلها مع بعض .. بطبعي ما احب التجمعات باعداد كبيره .. مهو تكبر لكن صعب جدا اتاقلم مع اي كان حتى مع الاهل والاقارب مقصر كثير ..علاقتي بالعالم الخارجي رسميه جدا ولتؤدية الامور الضروريه .. حتى في علاقاتي مع الشباب في الجامعه او في نادي او اي مكان تكون قصيره وشبه رسميه وماتتكرر الا فيما ندر..اختياري صعب وما احب اتعمق مع اللي ما اعرفهم لاني كافي خيري شري ما ابي احد يسيء لي او اسيء لاحد ..
لكن في تعاملي مع من احب ماراح تشوف الا هالوجه اللي قدامك لاني امون عليكم وعادكم من الربع..

بالعربي انا غير اجتماعي ابدا لكن اذا طاحت الميانه مابتشوف الا هالوجه والاسلوب ,,



و على رحلة عبر أجواء المنتدى أجواء المحبة و الإخاء تطير بنا بجوار سحب محبتكم المحملة بأمطار قلوبكم تأخذنا من قلب كبير إلى قلب آخر كبير غادرنا أراضي هلالي الظهران الممتعة و ها نحن على مشارف أراضي العنا التي لا تقل متعة ..

كل ما أتمناه أنكم ما زلتم تستمتعون حقاً بعطاء بخيل و كريمين ..

إقتباس الرسالة الأصلية كتبت بواسطة هلالي الظهران 1- العنا .. وش شعورك يوم يقولك ابو ريمان انه بيسوي مناظره بيني وبينك (تحس داخلين جو )؟؟ وعلى طاري ابو ريمان .. وش يمثل لك ابو ريمان غير انه ولد اختك مع العلم انه من الظلم ان واحد مارج مثلك يصير خاله ؟؟

الشعور هذا ذكرني بشعوري لما اجي ابي ادخل السينما وانا عارف اني لحالي بالصاله وبناظر مستر بن طبعا مستر بن اعقل منك شوي بس يعني نفس الشعور وفيه شعور ثاني تولد لدي >>>> اللي مهب مصفق للجمله الاخيره لا يكمل من كلمه مناظره فتذكرت المناظره بين الخير والشر زي مثل العنا وهلالي الظهران وبعد فيه شعور وهامور وفيه شعور ثاني حسيت من خلاله ان بوريمان قاعد يطلع على اكتافنا انا وياك يعني يبي يشتهر على حسابنا بس ما عليك حسابه عندي وكان فيه بعد شعور ثاني انا نجحد بوريمان وبشكل عام الشعورات والمشاعر المقدسه كثيره وكل شوي شعور واعاني كثير من الشعور هذا انا

بوريمان وش يمثل لي
بوريمان يا ولد الجبيل مدري الظهران المنطقه الشرقيه عشان ما نغلط احبه كثر الرمل وحباته والبحر وموجاته والهواء ونسماته ودي اهديه كل الاغاني الحلوه والشينه بعد وعشان مااطول عليك انت والمشاهدين الاعزاء ودي اعطيه قلبي يشوف وش له فيه ويرجعه بسرعه قبل اموت باكتم انفاسي لين يرجعه عشان مااموت

وبعيد عن المزح ابي اقول له من لامني فيك مايعرف كبر قدرك مايدري انك على كف الثرى جنه

ومن ناحيه ظلم اكون خاله اتفق معك مشكله لما يكون خالك احسن منك بكثير لانك بتقارن نفسك فيه دايم وماراح تصير مثله بعدين تتحطم ويمكن ترتفع حرارتك او يجيك كحه وانا فعلا احس بوريمان مظلوم لان الله رزقه خال صعب يقارن نفسه فيه والمشكله الناس دايم جعلك اطيب من خالك جعلك اطيب من خالك والولد يدري ان هذا مستحيل بس ما عليه بوريمان واوجه لك النداء من هنا واقول لاحول ولاقوه الا بالله وقدر الله وماشاء فعل وعظم الله اجرك

إقتباس الرسالة الأصلية كتبت بواسطة هلالي الظهران 2- يقولك فيه نصراوي طلب اثنين شاهي .. واحد عشان يشربه .. والثاني يستناه يبرد ( غطيت على مصالتك في تاليف النكت ) .. المهم اشرب جغمه لانك بتحتاجها في السؤال .. وش يعني لك العنا ؟ ومن هي ذكرى اللي بتوقيعك ؟ وما سبب تحاملك على الجنس الناعم؟ وهل ياترى هذا كله بسبب موقف معين حصل لك ؟؟( هذا بس سؤال واحد ),,

انا ميزتي اني خفيف دم حتى بوريمان دايم يقول لي هذي ميزتك والا عيال الناس واجد >>>> يحسبها مدحه :p

العنا يعني لي شي كبير اللي هو انا نفسي عضو هنا شفتني :p قاعد اجاوب على اسئله واحد ثقيل دم الحين وذكرى هذي مو اسم بنت ياغبي هذي ذكرى من ذكريات عكس نسيان من نسيانات اقصد يعني توني اذكر مانسيت وان نسيت باذكر وودي انساك انت اتمنى انك فهمت ان ذكرى هي وحده كنت احبها :p

العنا يعني لي الرفيق المخاوي
وانا مبسوط على هـ الخوه ومرتاح والعنا اذا هو بسبب محبوب تراه احلى واطعم من الراحه مع غير محبوب ;)

تحاملي ع الجنس الناعم بسبب ان فيو منهم عاد بالله عليك فيو جنس ناعم يا شيخ ردودها تذكرني بالليفه الخشنه :p احس لو يصير وجهك كيبوردها عينك اليمين حرف ع وعينك اليسار حرف غ وخدك اليمين حرف ق وخدك اليسار حرف ج وحواجبك واحد ت والثاني ث وخشمك الشفت يعني خشمك مع عينك اليسار يطلع الف همزتها تحت ونااااااااااااااااسه والله :p المهم وش كنا نقول
اي اقول لوك الكيبورد حقها كان تبريت منها :p
المشكله ان فيه ناس امثال بوريمان بس تدلعهم وش تبون وين ودكم نروح وين ودكم اوديكم يفوتنا جمعات وطلعات عشان يروح يمشي له بنتين دلوعات ويمشيهم ويعشيهم ويقهويهم ويشتري لهم وكل سنه ينجحهم

بعدين ترى اسمي العنا مو ترى
اقول هلاليوه صاير تعرف تحكي وهل يا ترى وحركات :p اقول اها بس اها
المهم نرجع لسوالك اللي وجهته لترى ويقول لك ترى ما في موقف معين كل يوم اوقف سيارتي بموقف مختلف حسب الظروف بس طبعا افضل المواقف المضلله خاصه في الصيف

:p

إقتباس الرسالة الأصلية كتبت بواسطة هلالي الظهران 3- اسمحلي العنا اني اشكك في هلاليتك ..!!! يدعم هذا الشك بعدك عن مواضيع الهلال .. نريد القول الفاصل في ذلك؟؟

تصدق حتى انا عندي نفس الشعور بس رجاء لا تسالني وش شعوري ترى سوالك الاول صعب :p
والقول الفاصل من وجه نظري الشخصيه والمهمه لانها وجه نظري انا فهو القول اللي يجي بآخر دقيقه بشرط ان الفريق الفايز يضيع الوقت

بعدين انت كيف تتجرا تشكك في هلاليتي وانا ماني هلالي اصلا
انا تركت التشجيع من زمان زمان هذا انعدم فيه المنافس الشريف وصار بالنادي اشخاص يقدمون مصالحهم الشخصيه ع النادي ;)

إقتباس الرسالة الأصلية كتبت بواسطة هلالي الظهران 4- العنا تخيل ان لك اخ متزوج وماعنده عيال وبعدين ربي رزقه بولدين توأم في نفس التوقيت وسماهم فهد وسلطان .. وش بتناديه انت ابو فهد ولا ابو سلطان ولماذا؟ وفي حالة مسكت مع اخوك يسمي ولده الكبير ابو بكر .. وشلون بينادونه ؟؟ ( الله من السؤال اللي مدري وش يبي:p )

بناديه اخوي اخوي
او بناديه ابو فهطان :p
مع ان شكلي بجلدهم من القهر :p
بعدين في شي اسمه قانون بالبيت ما في احد يجيب بالجمله حنا مفرق بس
ومره اخوي لو جابت توم حاكمناها وعاده انا القاضي بس في البيت >>>> لا ينهبل الشايب وباحكم عليها حكم قاسي جدا ناقصين بزران ما تحملنا واحد نتحمل اثنين
المشكله اني رسمي مع حريم اخواني وما امزح معهم وما اقعد بمكان واحد معهم وما نضحك وما نمزح لاني ماابي اعطيهم وجه بعدين يتجاوزون دستور العائله وانا طلبت من بوريمان يعلمني متى بينزل المناظره عشان اطلع من البيت اذا سيرو علينا ما له داعي انطق خاصه ان النذل وفي روايه عن فيو بنت ميسو رحمها الله الحساس بزياده اكيد راح يطبع الموضوع ويوريه حريم الاخوان

بيني وبينك المشكله مو في الطق ياما انجلدنا بس عيب ننجلد من حريم من رجال ماعليه بس حريم لا والف لا للمخدرات



واذا سمى اخوي ولده ابوبكر مايبي لها شي بناديه جد بكر :p
مع فرض غرامه طبقا لدستور العائله بسبب استخدام اسماء قد ينتج عنها مضاعفات

تدري عاد كلك على بعضك مدري وش تبي :p وسوالك مدري وش يبي وبوريمان ومناظرته مدري وش يبون ومدري ليه انا الحين ودي اصك الجهاز واحذف كل شي واخليك تناظر نفسك برااااااااااحتك انت والاب الروحي للمجلس الله يخلف

الا اقول هلالي صقيقي تعال
اذا بوريمان ابو المجلس من امه ومن عيالهم
احس طقه البنات عيالهم وما يجي لهم اولاد :p
ومابي احط بذمتي شي بس مدري ليه احس انك واحد من عيال الحاره في سن المراهقه وعليك حركات ودايمك في مركز هيئه الحي
واحس فيو دلوعتهم وآخر العنقود
اقول صقيقي الحين بالله اهل الكمبيوتر يخترعون انتي فيرس عشان يحميهم من الفيروسات وحنا ندلع الفيروسه اللي عندنا ونسميها فيو
المفروض نسميها فيروسه ونطلب من المشرفين يخلون الصوره اللي تحت معرفها صوره بف باف المطور
بعدين انا اطالب الاداره انهم يوفرون للاعضاء نسخه مجانيه من الانتي فيرس مادام ان فيروسه عضو
وبيني وبينك احس نجمه الابداع مدرسه خصوصيه لعيالهم بس لا تعلم احد انظبطططططططط ط ط
والقاضي ابو جيرانهم :p
والجاحظ خوي بوريمان وبوريمان دايم يقنعه اترك عنك هلالي الظهران لا تماشيه لا تماشيه
حبي تيماوي عمده الحي
البارق مدير المركز الصيفي
سهل مدير شرطه الحي عشان كذا انت ماخذ راحتك في الحي

إقتباس الرسالة الأصلية كتبت بواسطة هلالي الظهران 5- في موضوع العنا الاخير شاهدنا ابداع منقطع النظير في مجال التاليف والغناء .. وسرت اشاعه انك تجيد دق العود .. سؤالي هل سنراك في الساحه الفنيه عما قريب ؟؟ ولاعطائك فرصه عن التعبير عن الكبت اللي بداخلك .. اعطيني ثلاث هوايات تمارسها يوميا؟؟

دق العود من المهارات اللي خسرتها والسبب بوريمان
ودخولي الساحه الفنيه مربوط بخروج محمد عبده مااقدر اخش الساحه وفيها مطربين فاشلين مثله

هواياتي كثيره مررررررره احب احرج بوريمان واحب اقرا واصور وارسم صوره فيها شجره فيها عصفوره :p واحب الفضايح واحب اشوف الافلام واحب الكباتشينو وعندي هوايه احبها كثير بس تركتها لاني صرت مااحبها واعتقد المفروض ارجع لها لانها مفيده ومهمه بس اذا حبيتها وشرط احبها عشان ارجع لها ياخي اسال زي العالم والناس
ضاقت

واشكرك عشانك خليتني اعبر واتخلص من الكبت كنك تدري ان بو ريمان صاك علي يقول لا تفتح فمك
طبعا بوريمان يقصد ان كلامي مثل الذهب فخايف عليه يطيح

إقتباس الرسالة الأصلية كتبت بواسطة هلالي الظهران هذي هي الاسئله ابو ريمان وبانتظار اسئلة الظريف .. بالتوفيق للجميع

هذي الاجوبه بوريمان والظاهر انك غلطان قايله مناظره مع الظريف مو مع العنا بس عارف انها مقصوده لانك لو قلت له مع العنا كان ماوافق لان اكيد يخسر لو ناظر واحد زي مثلي بس ماشاالله عليك صدته وبالتوفيق للجميع >>>> وين خاشين اختبار

هلالي الظهران الله من زين الاسئله انت وخشتك اي انت وجهك اي انت وكشرتك وفي روايه انت وكيبورد فيو :p