نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة - المونديال في عيون أبو سارة .. صيفنا مع ألمانيا أحلى !

الهلالي- ابوسارة · #1 13/06/2006, 06:25 AM

وبعد غيبة طويله دامت أشهر ,, ها هو الهلالي أبو سارة يعود إليكم من جديد ..

ليس معي شيء ُ ُ هذا المساء ,, سوى حبكم .. وشوق إليكم ...

ليس معي شيْ هذا المساء ,, سوى الشوق الذي يدفعني إليكم بقسوة ..

ليس معي شيء هذا المساء . . سوى ... (( أقول انهج علينا وامحط بموضوعك لابو شكلك ! ))

صح اني انقطعت عنكم فترة ,, وصح انكم تعبتوا في غيابي .. وحاس والله بمعاناتكم

.., لكن وش نسوي .. عموماً بدأ المونديال .. وبدأت حمى كأس العالم .. فعدت إليكم مجبوراً .. وقديماً قالوا :

((.. ويأبى المونديال إلا أن يخرج بعض الضبان من جحورها ! ))

قبل أبدأ بس أحب أعتذر لبلاتر وأقول له روح يا شيخ جعلي أفدى جبهتك .. أدري انك متشره عشان ما حضرت حفل افتتاحكم بس خيرها بغيرها والوعد 2010 في جنوب افريقيا جعلها السيل ..

جماعة الخير .. والله إني رجال أكره ما لي الكورة العالمية سبحان الله , ما لي في الكورة سوى مباريات الهلال .. تقول لي برشا ميلان يوفي مان يونايتد أقول لك أطلع من أبو مخي ..

لكن تعرفون كأس العالم شيء ثاني .. (( قل قسم ! )) , ولازم تتابعه عشان تكون في المود .. وجيزك جيز خلق الله .. وافلقوني كانكم فهمتوا كلمة ( جيز ) يا عيال المودرن

الزبدة ,, خلونا نخش على المونديال وهمومه لأني لو قمت أبربر عليكم انتهى المونديال ما خلصت ..

-----------------------

الافتتاح :-

ألله عليهم هالأوروبيين الله يجزر لي أعمارهم ,, من جد ياشيخ الله عليهم .. افتتاح مبسط . . غير متكلف .. وهو ايش ؟ مونديال .. مونديااااااااااال مهوب كأس خليج ولا بطولة عرب ..

حنا يا العرب لو سوينا بطولة كيرم .. ما عنك وعن أربع ساعات افتتاح .. وليزر وحركات نص كم ومدري ايش .. واستعراض فرق مشاركة يلفون لك الملعب لين تدوخ ويجيك النوم ..

عندهم هالأوربيين لا .. حفل ما كمل ساعة .. ثم سنترت المباراة .. مع انهم مطنوخين فلوس أكثر منا .. ويقدرون يسوون شيء ما نسويه حنا وخششنا ..

ثم جابوا كلوديا شيفر .. ومطربة ثانيه طخمة .. وقاموا يغنون للمونديال .. ناس تفتح النفس .. ناس تخليك تطرب للأغنية مع انك ماتفهم ألماني ..ناس يخلونك تتراقص على الأنغام مع ان اللحن مدري وش يبي .. مهوب مثل ربعنا جايبين لنا رابح صقر اللي لا منه تحمس حول ما تنطلق رقبته ..! إيييه ما علينا وأصلاً الأغاني حرام (( وش عقبه يا الهيس

))

----------------

ألمانيا .. أيطاليا .. هولندا .. السعودية .. البرازيل .. الارجنتين .. فرنسا .. البرتغال .. التشيك .

واحد من هالمتخبات التسعة راح ياخذ البطولة ,, لا أحد يحاول يقنعني أن فيه منتخب غيرهم بياخذها .. بس تعالوا .. بيني وبينكم ماتحسون أن فيه منتخب خش معهم بالغلط بقوووووة

أم اللي كذا يا شيييخ دخلة مدري وش تبي يا الأخضر

وعلى طاري الاخضر ., فيه أغنية تقول : اذكر الله وشوف وانسى الحذر والخوف ما يعرف الخوف من هذا فريقه .. أنا مدري متى هالأغنية تم تسجيلها لكن أجزم لكم أنها قبل الثمانية ..!

حسبي الله على ذيك الثمانية يا جماعة الخير .. إجراااام .. والله ان السعودي فينا لا جت الساعة ثمان الصبح أو الساعة ثمان الليل يحس أن عينه مكسورة .!

بس سؤال بالله : تخيلوا ربعنا الصقور الخضر ركبوا الباص وقاموا يلفون ألمانيا سياحة ,, ووقفوا عند إشارة .. يوم التفتوا لقوا الباص حق منتخب ألمانيا ولعيبة ألمانيا واقف جنبهم في الاشارة , وكلوزه عند الدريشة ! تتوقعون ربعنا وش موقفهم ؟ يحطون عيونهم بعيونهم أو يناظرون السماء ويسولفون عن الجو والغيم ويصرفون ام الموضوع

ايييييييه يا الأخضر الله معاك وما هذه الدعابات التي أسوقها إلا مجرد دعم ورفع معنويات لكم شدوا الحيل .. (( الله يخسك انت ودعمك تكفى لا عاد تدعم أحد

))

-----------------------

نجي للمرشحين الآنف ذكرهم ,, وركزوا بالله على كلمة آنف ترى متعوب عليها بقوة ..

ألمانيا :-

منتخب طاحونة , صدأت مكائنهم بفعل الزمن كما ذكر الجوهر بعد قرعة عام 2002 ,, ولكن سرعان ما عادت مكائنها للدوران ، والبركه في تكتيك أبو جوهر والثمانية الأليمة

ميزاتهم أنهم لو لقموا أربعة أهداف في مرماهم عادي , ولا تأمن لهم .. يرجعون في المباراة ولا شيء .. والتاريخ يشهد لهم في هالشيء .. ناس متربين على ثقافة هتلر ما تربوا على ثقافة خطط مدروسة ومافيه شك ..! (( ياخوي انت حالف الا تجيب العيد يعني ؟ ))

دفاعهم في العمق شااارع , لكن ميزتهم في الأطراف .. أوفرات وعرضيات إلين يفوزون .. بس ما أحس أنهم ياخذون المونديال لأن كلينزمان مدربهم وأحس انه دلخ .. قام من النوم لقى نفسه مدرب ألمانيا ودنيا حظوظ دنيا حظوظ ..!

إيطاليا :-

منتخب عريق ,, يملك دوري قوي نوعاً ما .. مشكلتهم إعلامهم .. وأسألوني عن الاعلام الايطالي ,, تلقاه يركز على قصة شعر اللاعب الفلاني ,, وغراميات اللاعب الفلاني .. والحسناء زوجة اللاعب الفلاني .. وخذ تسطيح ونفخ راس واللاعب الايطالي يجيك منفوخ ثم تلقاه أول من طلع من البطولة .,,

هم لو يفكهم الله من أم العبيد اللي تطق توتي حقهم ,, كان أفلحوا .. لكن مااش هذا توتي وهذي خلاقينه ولا فيه أمل يتغير ,, لو إني مدربهم لأركنه احتياط وأطب في بطنه بعد ..!

أيضاً مشكلتهم الإغراق في الدفاع . تشوف محاورهم ودفاعهم وااااااجد .. تحلف بالله بزران توهم طالعين الطلعة !! لكن لا يمنع أنهم يبقون مرشحين أقوياء للقب بس ما ياخذونه .. حلوها عاد

.!

هولندا :

منتخب شاب,, بس عندهم مدرب حليو .. فان باستن هذا مهوب بسيط وأسألوني عنه مع اني ما اتابع الكرة الاوروبية .!! .. ومادام روبن ونستلروي في الأمام وحارسهم فان درسار فوكلوا الله يا الهولنديين تراني رشحتكم .

البرازيل :-

يا ويل حالي .. ياويلي ويلاه .. هذولي ناس ما عندهم مزح.. هذولي قشران مافيه نيني نيني يمه ارحميني .. لعيبتهم سمران وشعورهم فلافل .. لا حب عندهم ولا رومانسيه زي الأيطاليين .. عندهم شيء واحد : سنتر الكورة وألعن أبو المنتخب اللي قدامك وعطني الكأس خل أروح ساوباولو أحتفل هناك .. أقول لكم ماعندهم وقت ..

صح أن رونالدو أحيانا يخربها هو وضروسه اللي كنها ضروس سنجاب يتيم ,, ويحب أحياناً ويقلبها سهرات حمراء هالمارج الخبيث ويقعد يغازل ويرقم في مدريد .. لكن تراه لا جاء المونديال يقولون والعهده على الرواي أنه يكنسل رقم جواله ويبعد عن البنات ويركز في الملعب . . يعني وش نستفيد ؟ نستفيد أن رونالدو ناوي هالبطولة ياجماعة الخير واذكروا كلامي

الأرجنتين :

آآآه يا التانجو .. أحبهم والله وهم منتخبي المفضل .. لكن مااش ماحولهم بطولة هالسنة !
خسك الله يابيكرمان ,, أجل جاحد زانيتي وفيرون وضام لي سافيولا وماكسي وجحلط مايدرون وش السالفة !!

قسم بالله أن بعض المدربين ودك يا شيخ تجيب لك عسيب نخلة وتحطه في موية ملح عشان يشتد ثم تلعن خامسه ..

على الله يا الارجنتينيين الغلابة ثم على ريكلمي .. عساه يسد السيل بعباته مع اني ما ظنتي ..

السعودية :

وش يبي أبو الشباب

هههههههههه لايكونون صدقوا اعمارهم أنه مرشحين معهم

.. أقول روحوا تجهزوا لتونس واتركوا عنكم المشية مع الكبار .. ياحليلهم الظاهر أوبريت رابح ومحمد طيرهم في العجة

فرنسا :

شوفوا .. تبون الجد ؟ ترى هالمنتخب غير مرشح أبد بس أنا جبته مع المرشحين بدال أنجلترا لأني أكره الانقليز وبيكهام وبلير ووزير خارجيتهم اللي كنه سلقة .!! (( كيفي موضوعي وأرشح وأكنسل اللي أبي

))

البرتغال:-

هذولي قولوا ما قاله الأطخم أبو سارة ,, مرشحين وبقوة أنهم يروحون بعيد بعييييييييد .. في الدفاع نجوم في الوسط نجوم في الهجوم نجوم .. مهارات برازيلية انظباط أوروبي .. محترفين على مستوى عالي .. أتوقع أنهم حديث العالم هالسنة عقب المونديال ..

رونالدو . فيجو . باوليتا .. سيماو . كارفالو .. الخ .. أسماء تعطييييك وبقوة .. بس تكفون لا ينط لي واحد منكم ويقول تراهم طلعوا البطولة الماضيه من الدور الأول .. لأني بأقول له فيه فرق ؟ ذيك السنة ما معهم سكولاري ولا عندهم هالكمية من النجوم .. اعنبوا بليس أجل منتخب يحط ديكو وقوميز أحتياط ياشييييخ عندهم نجوم تبذيييير .

التشيك :

مرشحين لسببين : يملكون نجوم ومدرب رهيب . . وعندهم انظباط تكتيكي عالي .. صح انك لا شفت نجمهم كولر الطويل تحقرهم وتقول وش هالمهابيييل السبايك , لكن ترى يجي منهم ويكفي وصافتهم في تصنيف الفيفا ..

-------------------------

هلاليات أبو سارة :-

** دي سانتوس راح يغيب عن المباراة مع السعودية , أحس أن المنتشري وتكر قلبوها طرب يوم سمعوا هالخبر , أستطيع أن أقول وبقوة أن فرص المنتخب زادت في كسب المباراة إلى الضعف .. يعني طقت نسبة , يعني يقلع أم الأسهم يا ناس ..!

** سامي وياسر يا بكتكت واترك عنك التخبيص ,, لا تقول لي مالك معاذ ولا ما مالك معاذ , ترى منتخب تونس ماهنا ذاك المستوى من وجهة نظر فنية خاصة بي ولا فخر ,, ايه عندهم لياقة واندفاع بدني لكن مهاره لا .. قيس الغدبان وما قيس القدبان وانت جاي .!

** الارجنتين وساحل العاج كانت حلوة , وكنت أتفرج انا وخويي ,, وهو يقول شف ياابوسارة مارادونا كيف متحمس ,, وأنا أقول اي والله ايييه .. وبيني وبينكم كنت اناظر بنته الله يذريها من عين الحسود..! ايه الزبدة / مارادونا يقول أنه غاضب ليش ما عطوا ميسي رقم 10 ..

تحس أحياناً أن مارادونا مازال يعاني من آثار الادمان وخرمة الهروين ,, يعني بالله يا لوح يا آرمندو كلامك هذا ماراح يحطم ريكلمي ؟ معليش على الميانة ياابو دييغو بس ياليت تاخذ كلامي بروح رياضيه كزميل مونديالي سابق ..!

** كاكا + رونالدينو + رونالدو + ادريانو + زي ربرتو + ربورتو كارلوس + جنينو + روبينيو + كافو ... الخ .. أم أم أم الاسماء اللي كذا يا هووه . . جايين المونديال يطقون ما جو يلعبون

** من وجهة نظر شخصية أحس أن محمد مسعد راح ياخذ نجومية أفضل لاعب شاب,, هااه شباب كيفي بالله وانا أستظرف ؟ :p المهم هاللقب راح يكون بين الثلاثي :

(( ميسي )) يا لبى قلبه لو يدري , بس مشكلته ما يدري ...

(( روني )) هالدب الانجليزي صح أني اكرهه وصح أنه يشبه الخنزير المحشش لكن الحق حق موهوب..

(( رونالدو )) البرتغالي ,, الله يرجه لو قدامه نملة دزها بكوبري ,,

** هالألمانيين ودك من يدبغهم بالعجراء ,, بالله المباراة اللي تكون العصر هل تستمتعون بها ؟ شمس وحر وقلة حياء , . والله اني ما كرهت الدوري الانقليزي الا بسبة الشموس اللي يلعبون فيها .. والحين المونديال ! هاه بشروا تكفون سمعت انهم ناويين يقدمون مباراة العصر ؟ يا ليت .

** برايفت ضفدع كامل :

ممكن تنثبر يا شيخ ؟ ... تشفير تشفير وآخرتها استديو كأنه حمام أعزكم الله ما يجي متر في متر .. وتحليل دمار . وفواصل اعلانية تحوم الكبد عسى رقبتك للفصل .. أما شفّر وحط خدمة صح أو لا تشفر أبد .

عشان ما أجيب العيد .. أحب أختم فأقول :

آسف على الاطالة , واعذروني على استظرافي اللي مدري وش يبي ,, إن أصبت فمن الله وإن أخطأت فمن الشيطان ومن صالح كامل لأنه رافعن ظغطي .

زلام