|
خذ كرت اصفر واحصل على الثاني مجانا ..
لاحظت على لاعبي الفريق الهلالي عادة .. لم الاحظها من قبل الا في فرق دوري الدرجة الاولى .. ومنتخبات الخليج وفريق معروف عندكم جميعا ما ابي اقول اسمه ..
وهي عندما نكون فائزين يقوم لاعبي الهلال ( بعضهم ) بتضييع الوقت والاستهبال على الحكم .. وللاسف انهم يقومون بها ولا يجدون القيام بها جيدا .. !!!
الغريب في الامر .. انهم يضيعون وقت وهم فايزين بنتيجة كبيرة .. والفريق اللي قدامهم ما فيه امل يجيب حتى هجمة خطرة على الباب .. واحيانا يكون فريق الهلال ضاغط بقوه على الفريق الثاني !!!
مباراة الهلال والانصار .. اللي انتهت اربعة ما ادري خمسة .. نص اللاعبين خذوا كروت صفراء .. والمشكلة ان الانصار مطورد منهم اثنين ؟؟ والهلال كان ضاغط على الانصار ؟؟ مما سبب هبوط اداء لاعبين الهلال وزرع الحماس في لاعبي الانصار .. عكس الهدف المطلوب تماما .. غير هذا سبب خروج الجماهير من الملعب عشان اللعب اللي يرفع الضغط !!!
مباراة الفريق الطاجيكي .. !!. كان الفريق الطاجيكي متحطم تماما .. وكان التمياط يبدع ويوسع صدرونا .. ومن يوم ما اشوف فاول لنا .. والصويلح جنب الكورة يبدا معدل السكر يرتفع عندي .. ولين جت ضربة مرمى لنا .. انهبل والضغط يطق عندي وافتح درجي واخذ لفي حبتين ضغط .. واحدة عشان العتيبي والثانية عشان المفرج ..
ما ادري .. .. !! ؟
انا اخبر ان فيه هواية اسمها جمع الطوابع .. بس اول مرة اسمع عن هواية جمع الكروووووووت !!
المباراة الجاية انا اتوقع اني ما راح استخدم حبوب الضغط فيها .. لان الصويلح والمفرج مهوب لاعبين بسبب الكروت الصفراء اللي عندهم ..
ما ادري لايكون فيه لاعبين ثانيين يبون يجمعون كروت بعد اخاف يحطونها مع غطيان كوكا كولا والا بيبسي ؟؟
اخر ما توقعت ان الهلال يسوي حركات تضييع الوقت ؟؟ احضر مباراة في الملعب وادفع 15 ريال اقل شيء ... عشان اتفرج على تضييع الوقت ؟؟
اللي قاهرني انهم يغصبون الحكم يعطيهم كرووت .. خمسة يتعازمون على شوت ضربة المرمى .. والصويلح يهوب على الفاول ثلاث مرات ويناظر الحكم .. على وزن عدني كرت عشان يضيع الوقت بعد زيادة في تسجيل البطاقة ؟؟ وفي النهاية .. يضغط الفريق الطاجيكي .. ؟؟ ووقت ضايع خمس دقايق !!
ياليت الاداراة تشوف حل مع اللاعبين المستهترين ؟؟
اجل لو لعبنا مع فريق كبير وجبنا هدف مبكر ؟؟ الظاهر بتصير المباراة كلها كروت صفراء وحمراء ووقت ضايع ربع ساعة ..!!
هذا اسلوب تلعبون به قدام ريال مدريد لو وافق على التوأمة ؟؟ والا في كاس العالم للاندية ؟؟
والله اني متفشل وانا اكتب الموضوع هذا عن زعيم نصف الارض ؟؟
اتمنى ما تزعلون مني .. بس والله من حبي لهالفريق ومن غيرتي عليه واني ما ارضى اي احد يقول ا كلمة عنه ؟؟
| 