نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة

الهلالي- ابوسارة · #12 19/12/2005, 04:51 PM

إقتباس

الرسالة الأصلية كتبت بواسطة abu_riman


	خاص لأبي سارة .. " ردك ما ملأ عيني و أنا أعرف ردودك زين ، أبي رد من ردود أبو سارة الملتهبة ، إلا إذا حنا ما نستاهلها "

ابو ريماان .. أقووووووووول .. اهااا بس .

لا تحدني أدق على بيل جيتس وأحدد موقعك في الشبكة ..

ثم أقتحم عليك المنتدى العام وانت نائم وأطبع على رأسك قُبلة

واقول:

كله ولا زعلك وانا ابوي

تراني اعرف مكانك في هالمنتدى زين .. دايم تنام في سطحه بالأعلى فوق ـ كقول الشاعر:

علوُُ ُ في الحياةِ وفي المناام ِ . لحقاَ أنت معجزة المجلس العام ِ

يا غالي ترى كلكم أساتذتي وأنا أدج وااحد فيكم يعني بلاش لهجة نستاهلها وما نستاهلها كلكم على راسي .

بعدين لاتزعل مني ترى في المجلس هذا من بين كل المنتديات أحس بفقدان ثقه يعني حاولوا تمرروون لي بعض الطلعات!

لحظه بس:

قـر قـر ..

قــر قــر

قــر .. احححح الحمدلله (( شربت موية عقب مانشف ريقي

))

ياغالي وش راح يفيدكم شخص دخل السوق بـ 100 ألف عام الفين وواحد وعندما أتى 2003 إذا به يمتلك فقط 40 ألف !!

من خسارة لخسارة.. ومن عيد إلى عيد ومن جرف لدحديره ..

يجيك من يوصيك عالمكيرش وهي 103 ريال وفجأة وبقدرة قادر تنزل لـ 77 !!

وبدل لا أجيب لكم سالفة جارنا اللي جته جلطة بسبب هذا السوق قلت أعطيكم خلاصة تجربتي وطريقتي الجديده :

وقّع عقد مع مستشار مالي وأبشر بالخير واترك عوار الراس ..

أما اللي يقول اتبع الهوامير فـ الهوامير نصفهم تصريييييييف لأسهمهم الخشاش ويروحون فيها الضعوف !!

نصيحه للي أحبهم أقول: اتبع مستشار مالي معروف واترك الشاشه وغثاها .

لأننا في زمن طفرة جديده واللي ماراح ينغنغ هالوقت لن ينغنغ ابدا ..

على فكرة السووق سيستمر على هالحال حتى 2008 كما سمعت يعني :

ربح سريع او خسارة سريعه مافيه حل وسط .

طفرة غير الطفرة السابقه .. يمديك تسوي عليها كنترول من عندك ( يعني تحكم ) ---> اخس يالحمادي انقليش آرابيك

نرجع لاستفساراتك ابو ريمان :

إقتباس


	@ هل السوق بوضعه الحالي يصب في مصلحة الاقتصاد الوطني ؟!

أكيد .. يكفي ان السيولة كلها داخليه .. والبورصة السعوديه اصبحت تجتذب الاموال اللي في الخارج للهوامير السعوديين..

لكن يبي له تعديل كبير عشان يكون نفعه للضعوف والهوامير بعد . ونحل جزء من مشكلة الفقر !!!

إقتباس


	@ هل تعتبر الوضع الحالي بالنسبة للبورصة صحياً من وجهة نظرك الخاصة ؟!

من تجربه خاصه أقول: نعم صحي اذا جعلت مستشار معروف يدير محفظتك ..

أما ان تأتي بعدم إلمام كبير بالسوق وتدخل السوق فـ مغامرة غير محمودة العواقب وربحها ضئيل .

إقتباس


	@ هل يمكن للمضارب بناء قراره على نتائج دراسته لقوائم الشركات المالية ؟!

سابقا لاا .. أما حاليا بعد تحرك وتدقيق هيئة سوق المال على قوائم الشركات أصبح االوضع أفضل ..

بس تظل مغامرة في وجهة نظري

إقتباس


	@ هل الوضع الحالي لهيئة سوق المال هو الطموح ؟! و ما هو الدور المنتظر منها ؟!

عزيزي في الامارات تم سجن كم هامور ايقاف كم شركه تجاوزت وتلاعبت بالقوائم والأسهم الوهمية

أما عندنا فلا نسمع هذه العقوبات الرادعه ( على حسب علمي ) ..

منتظر منها تخليصنا من بعض الشركات اللي أكل الدهر عليها وشرب ولها في المؤشر عشرين سنه دون فائده ..

منتظر منها ان تسمح للشركات الكبرى وتسهل عملية دخولها السوق بدلا من الواسطه اللي تسمح للدريس بالاكتتاب !!!!

إقتباس


	@ هل تؤيد وضع حد أدنى لا يمكن للمضارب أن يضارب بمبلغ يقل عنه ؟! و هل تؤيد الحد الأعلى ؟!

لاا .. دعها حرة .. والسوق لا يحمي المغفلين .. واللي يرزقه الله حلال عليه

آسف عالاطاله ولكن موضوعك جدير بان ننال فيه شرف التميز ولو بالحضور بكلمة شكر ..

شكرا لك على هكذا مووضووع وهكذا طرح ..

بس سؤال :

أبوريمان .. تقرب لك اسواق ريمان ؟؟ ( دعابه سمجه تخفف وطأة حر السوق الذي بدأ الآن

)

تحياتي لكم تنساب - متأثر باكتتاب ينساب

نقطه للي عندهم خلفيه بالوضع :

الدريبي الله لا يهينه متى يرجّع فلوسي ؟؟ طبيت معه بقضّي وقضيضي