نعم اقولها لك ...


العذر والسموحة يابويعقوب



قلبي منفطر من القهر بسبب اني ماراح احضر اعتزالك بسبب اني مكسور ولاقدر امشي للملعب
للظروفي الصحيه القاهرة ...

ماتركت النعيمة ولا تركت البيشي و غيرهم في اعتزالهم لانه هذا حقهم علينا كجمهور ..

بس شف القهر يوم جاء عرس الثنيان وتمنعني كسوري عنك و لا مايردني عنك شي ..


الله يوم اتذكر اعتزال ابوفهد صالح النعيمة واتذكر كيف جمهور الهلال خنق الملعب زي ماخنقني النعيمة بالعبرة
لدرجة انه من الزحمة التذاكر خلصت وبداء البيع في السوق السوداء ( مايتركون حركاتهم البلوشيه ) لدرجة انه
التذكرة جابت لي دبل قيمتها 3 مرات بس احد يبيع كرت زواج معزوم عليه ولازلت محتفظ فيه مع ارشيف النعيمه
اللي عندي مثل ارشيف يوسف وسامي وباقي الهلاليين والاكيد الكيان الهلالي اللي غير مسار الكرة السعوديه ..



حتى في فرحتك مميز ..


ابو يعقوب اقولك الله يذكر ايام متوسطة الرازي بالخير من كان يتخيل انه ذاك الشخص اللي اسمه يوسف الثنيان
بيغير مسار الكرة ويدسمها بكميات من المتعه اجبرت القاصي والداني انه يتابع اي مباراة فيها ابو يعقوب ..



ايطاليا قامت وقعدت على حركة سواها باجيو مساكين مايدرون انه الثنيان يسويها عندنا من سنين قبل
لا باجيو يدري عن الكورة



ابويعقوب مع المنتخب


الثنيان خلى الجماهير تهتف ناولها ليوسف !!! يبون يشوفون وش بيطلع لهم ساحر الكرة السعوديه من حركات

الثنيان اللي غير خطط المدربين وخلاهم يلعبون بثلاثه اظهره ( الظهير الايسر + النصف الايسر + جناح ايسر ) كلهم
يلاحقونه كنهم مضيعين ولد وكل واحد يقول وش الله رامني في هالخانه لوني حارس اصرف لي

الثنيان خل الناس تعرف اسماء الاظهره اليسار في الفرق مو من زين لعبهم لا لا من كثر ماسحب فيهم

الثنيان اللي خل الجمهور ينتقل من جهة الى اخره يدورون الجناح الايمن

الثنيان اللي خل محلات الفيديو تسوي لقطات لاعبين ويبعونها في اشرطه واسالو فيديو الهدف الرياضي

الثنيان ماراح تنقطع منه الكوره غير باسلوب الكثرة تغلب الشجاعه و مو دايم

الثنيان دخل نظرية الفكاهة في الكورة واسالو ( حسن حمران ) وباقي العالم اللي يضحك عليهم بلعبه

الثنيان لو تاخر 10 سنوات وطلع هالوقت والله لاتشوفون العجب العجاب

الثنيان اللي انحرم منه العالم في 1994 بسبب اعتذار

الثنيان يوم فكر في البطولات شال من الكووس اكثر من اي نادي غير الهلال طبعاً

الثنيان ترك الجناح الايمن لانه الكورة عندنا صارت في جهة وحده بسببه

الثنيان خل كل المهاجمين هدافين من تصليحاته لهم

الثنيان جاب اصعب واجمل الاهداف وماراح اعدها لكم لانه الشريط بتشوفونه

الثنيان خل احد اداريين الانديه يخمه يوم جاب هدف في فريقه ولا يابراهيم

الثنيان ترك الجناح الايمن وراح للوسط وسرق الاضواء من لاعبي الوسط لانه علمهم معنى كلمة انت وضميرك

الثنيان جامع المجد من اطرافه بطولات وشهرة ومحبة كل جماهير الاندية

الثنيان هو اللاعب الوحيد اللي مايختلف عليه اي مشجع رياضي لاي نادي

الثنيان هو اللاعب الوحيد اللي يخلي الجمهور بعد اي مباراة يحللون حركاته وينسون المباراة

الثنيان اللاعب الوحيد اللي خلى جماهير الانديه تحضر مباريات الهلال عشان يتمتعون من فنه

الثنيان والله اتعبتني وانا اكتب عنك وماراح اقدر اوفيك حقك بس اقوالك كيف الحال




ابو يعقوب في فاصل من فواصله الممتعه


بصراحه الجيل اللي لحق على ظهور الثنيان تقريباً 1405 هـ اعتبره جيل محظوظ لانه شاف كوره غير

نصيحة لاتحرم عيالك و احفادك من شريط الثنيان اللي راح يعتبر اخر ايام المتعة الكرويه .



هذا جزاء الموهبين في عالم الغباء الكروي


ابويعقوب ماقول غير الله يوفقك في عرسك وحقك علينا نملى لك الملعب ونردد معك ونقول وداعية ياخر ليله تجمعنا



وترجل الفيلسوف ...





جماهير الكرة السعوديه عامة والهلاليه خاصة هذا يومكم تملون الملعب