08/12/2005, 10:39 PM
|
| زعيــم جديــد | | تاريخ التسجيل: 07/03/2005
مشاركات: 3
| |
|
سعودي تكروني زعلان من الزعماء
بسم الله الرحمن الرحيم
وصلاة والسلام علىخاتم المرسلين محمد أبن عبدالله وعلى آل بيته الطاهرين
الأخوان الأفاضل في هذا الكيان الشامخ 00 الزعيم كما يحلو لمحبيه تسميته بذلك 00 والله أنا أشهد أنو ناديكم هو زعيم آسيا
دعوني أعرفكم بنفسي /
أنا من سكان مكة . أم القرى الأرض الطاهرة
جنسيتي سعودي أفتخر اني أنتمي الى هذه البلد . أبوي وجدي أيضا سعودين نشأنا وترعرعنا في ثرا هذا الوطن .
أصلنا من نيجيريا يعني زي ما نقول 00 تكارنا أو تكروني 00 وفي مننا كثييييييييييييييير على شاكلتنا .
تربينا ترعرعنا نشأنا أكلنا شربنا لبسنا عشنا عمرنا كلوا هنا نخدم بلدنا ومانعرف بلد لناغيرها السعودية نفديها بارواحنا وأهلنا ومالنا وبكل ماعندنا بالغالي والنفيس قبل الرخيص .
بل وأزيدكم من الشعر بيت في تكارنا ماهم سعوديين نشؤ وترعرو هنا وما يعرفون لا نيجيريا ولا تشاد ولا غيرها و ولائهم لاهذي البلد أكثرمن وزيادة كم مرة راحوا الجوازات يشرحوا الموضوع هذا بس ربي ماكتبها لهم و أنا مأحب أطرق الى هذا الموضوع .خلونا في موضوعنا اللي لسا مادخلت فيه أنا أنسان عمري الأن قارب 55 سنة قولوا ماشاء الله . لاتحسدوني هاهاها متابع للدوري حقنا من أيام ملعب الصبان وساحة اسلام عندنا في جدة و مكة. معليش شوى راح تقولوا مبالغ عدوها لي هما كدا أهل مكة يحبو الهنجمة الفاضية ويسوا فيها أنومحد قدهم.
وللعلم أنا اتحادي صميم بكل ما تعانيه هذه الكلمة من معنى.بس هذا مو معناتو أني ألغي كل الأندية من القائمة و أهظم حقوقها وحقوق الأخرين وفي التعبير عن أرآهم وميولاتهم .
وأعرف ناس كتييييييييير من أبناء جلدتي هلالية و نصراوية وأهلاوية ولا دحيين واحد من أولادي يشجع الشباب شيخ النوادي. والله ما ألومو فريق بمعنى الكلمة شباب كورة عصرية حديثة وووو وكملو أنتو.
والله سامحوني طولت ولادخلت في الموضوع . الموضوع يجماعت الخير أنو في منتدكم العزيز المحترم المبجل الموقر انكم بتغلطوا علينا احنا جماعة بني زنكا ليش ياخوان ما أحنا مسلميين زيكم .
الله يقول في كتابه العزيز .. لافرق بين عربيا وأعجمي الا بتقوى.
وأنتو نازلاين فينا محشات لليااااال و راسملي تعليق و حاطلي توقيع .
ليه أخوان . تقولوا روح شوف منتدياتكم والله ياخوان تعبت معاهم نصحتهم فهمتهم لكنهم بجم البعيد عنكم.
يعني يرظيكم أغلط عليكم و أقول يا بدو يا للي فيكم ويخطيكم .
بس والله نفسي ماطاوعني تدرو ليش لانكم رجال وأدري هذا بس تعصب كروي و أنتو أكبر من كذا فيكم العالم والطبيب والمهندس و الأستاذ وكم أستاذ تدرسني وأحمل له كل أحترام وتقدير . ودايم أسمع لقصيدة الشاعر والله ما يحضرني أسمو دحين اللى يقول فيه 00 قالت بدو 00 والله أنو ولد أبوه الله يرحم البطن اللي جابتو.
ولاتنسو ياحبايب كم لاعب لعب في الهلال من بني جلدتنا من النيفاوي الى عبدالله سليمان .
والله يأخوان أحنا عندنا مشاعر و أحاسيس وأهل زينا زيكم طيب أيش ذنبنا أحنا لمن تسفه في محمد نور وطقتو وتنعتوهم ما فكرتوا أنو لهم أهل زيكم وأقارب وأحباب مايحبو تنقال عليهم زي هذى التعليقات.
يأخوان فكرو شوي بس في هذي النقطة و أجلسوا شوي مع نفسكم و بعدين أحكوا أنا سايبكم لذممكم.
و با قول كلمة ولاتزعلوا مني والله والله والله ما راح أسامح أي شخص يسى لنا أحنا التكارنا لا في دنيا و لا في أخرى .
الرياضة لاتخليكم تخسروا دينكم تبغى تنتقد النتقد الشخص نفسه بذاته لاتعمم .
أرجوكم رجاء خاص من أخ لأخوانو.
في الختام أحب أقول لأبو يعقوب والله أنك كفيت ووفيت.
الله يوفقك في حياتك العملية وقبلها يوفقك ربي لمايحب يرضى.
ودمتم يازعماء
التكروني  |
