بكل فخر وبدون اي مجاملة حنا نملك دوري من اقوى الدوريات العربية. لا من حيث النجوم ولا من حيث المتابعة الجماهيرية ولا من حيث الأضواء. صحيح ان فيه تقدم في الدوري السعودي لكن للأسف ان التقدم هذا بطيء في ظل تسابق الدوريات العالمية -بل وربما بعض الدول المجاورة اللي ماتملك ولا نصف مقومات النجاح في دورينا- إلى تقديم الأفضل وكل ماهو جديد في عالم كرة القدم.

عندي بعض المقومات اللي اقتبست بعضها من الدوريات الأخرى وبعضها من عندي وبمشيئة الله انها راح تنجح دورينا اذا طبقت:

المفروض انه يدار الدوري السعودي بطريقة احترافية. وينظر إليه كدوري قوي ومنظم. ولذلك يجب على المسؤلين في الدوري السعودي يرتبون مع الأتحاد الأسيوي والعربي أو غيرها بشأن موعد مباريات الفرق السعودية المشاركة في البطولات الخارجية. ومن ثم عمل الترتيب اللازم اللي يضمن للفرق لعب مبارياتها في الوقت المناسب والمحدد. عشان ماتصير لخبطة في الجولات وتكون الفرق في المراكز الصحيحة لها. ولكن للأسف نرى ان فيه بعض الفرق وصلت للجولة السابعة والبعض الأخر توه ما كمل الجولة الرابعة. ومن كثر التأجيلات صرنا مانعرف أوقات وأمكنة المباريات لدرجة ان بعض الفرق ماندري هي تلعب معنا في الدوري ولا لا؟!!

-لابد انه تبتعد القناة الرياضية عن الروتين الحكومي الممل وتطور نفسها وهذا هو أقل الطموحات. أو يكون فيه قنوات تجارية محترفة في مجال نقل الرياضة. واللي يشوف الدوري القطري أو الإماراتي -مع ان دورينا يفوقهم بمراحل عديدة- يلاحظ انهم يعطون الدوري اهتمام إعلامي كبير جدا. شوفوا قناة دبي الرياضية أو قناة أبو ظبي ولاحظوا الفرق الشاسع بين برامجهم وبرامجنا وعلى سبيل المثال برنامج الجماهير في دبي اللي استطاع انه ينقل حس الشارع الرياضي ويعبر عن صوت الجماهير و الحماس اللي يصير في الملعب للجمهور بينما قناتنا الموقرة ان كثرت والتقت بالجماهير فهي ماعندها إلا السؤال المعروف: وش تتوقع النتيجة بين الفريقين؟!! وبس!!
بل ان قطر فتحت قناة كاملة للدوري وحنا لا زلنا محصورين في قناة تبث على مدار عشر ساعات فقط على جميع الرياضات. وحتى ان ثلثين بثها يكون في برامج مالها سنع (مثل عالم الكركيت -على ماقال هجمة مرتده- , سباق التريلات)

-بالنسبة للجماهير لازم ينظر للأسباب اللي أدت لعدم حضورها للملعب ومن هالأشياء: تخفيض تذاكر الدخول للملعب
إعطاء الجمهور حقه في التشجيع عشان تطلع المباراة بشكل حماسي وممتع. بس يكون هالأهتمام في حدود. يعني ما نخلي الحبل على الغارب ونخليهم يسوون اللي يبون. ولانكبتهم ونمنعهم من فعل أشياء تعبر عن حماسهم في نطاق المعقول.
لازم يكون فيه ملاعب اضافية تناسب حجم المباريات بين الفرق. يعني مو معقولة انه تجي مباراة للشباب والحزم في نص الموسم وتكون في استاد الملك فهد ويصير معظمه فاضي. لازم تكون هالمباريات في ملاعب تناسب حجم الفريقين وأهمية المباراة. ولو كانت هالمباريات في مقر الأندية يكون أفضل عشان تعطي الجماهير دفعة قوية لمساندة فريقهم في ناديهم.
لابد انه ينظم حظور الجماهير بحيث انهم يكونون امام الكاميره عشان ينقل الحضور والحماس الحقيقي للجماهير. واللي شاف مباراة الوحدة والهلال امس يلاحظ ان المدرجات اللي قدام الكاميرا تكاد تكون خاليه. بينما هي ممتلئة وراها. وعلى كذا اللي يبي يفكر انه يحظر المباريات يبي يقول وشو له احضر وهو مافيه جمهور اصلا!!
يجب ان يكون فيه تفعيل واهتمام وتنظيم لروابط الأندية على جميع الفرق لأنها هي اللي تقود الجماهير في التشجيع.
وضع محفزات على الحضور الجماهيري. مثل السحب على جوائز, الحضور مجانا لمن يحمل عدد معين من تذاكر المباريات السابقة, وضع خصومات لحامل التذكرة في عدد من المحلات التجارية....وغيرها.

-يجب انه يفسح المجال للأندية انها تمارس حقها المشروع في الأستثمار. وحنا نشوف التكاليف المادية للأندية اللي كل مالها وتزود والأعضاء ماراح يستمرون في دعمهم على وتيرة وحدة كل موسم. يعني بالله وين راح تجيب الأندية تكاليفها منه. وخصوصا الأنديه اللي دعم أعضاءها ضعيف إلا بالأستثمار اللي راح يفتح افاق جديدة للأندية ماراح تكون في الحسبان!! بل ربما يكون إعتماد الكلي للأندية على الإستثمار إذا اتيح لها المجال.
اما بما يتعلق بجانب استثمار اللاعب فترى اللاعب السعودي له صيته في كل مكان ولنا في لاعبنا سامي مثال كبير. فهاهو مثل مانشوف مؤهل انه يكون افضل لاعب في اسيا وداخل تصنيف افضل ثمانين لاعب في العالم وتحدثت عنه جميع الرأي الرياضي العالمي بإسهاب. أعتقد هالشهرة وهالمجد اللي وصل له لو وجد الإدارة الأستثمارية الناجحة راح يجد قبول وكسب كبير جدا. وانت شفتوا وشلون ذيك الكورية المعجبة بياسر القحطاني وصورت معه وطلعت في الجرايد. هذا أكبر دليل ان نجومنا لهم إعجاب وشهرة مو على النطاق الخليجي والعربي فقط! بل على نطاق عالمي.


-جت فتره من الفترات استبشرنا فيها ان اللاعب السعودي راح ينجح في الأحتراف الخارجي وشفنا سامي والغشيان في اوروبا ومرزوق العتيبي في قطر وسعيد العويران في الصين. لكن مع الأسف لم يتم الأهتمام بالأحتراف ولم يتابع ويفعل بالشكل المطلوب.
فيه فكرة عند اللاعبين والجماهير ان اللاعب لابد انه يبدأ احترافه من اوروبا. وهذي فكرة مغلوطة. لأن الأندية الأوروبية إذا شافت ان اللاعب ماله اي سجل احترافي خارجي ماراح تعطيه اي اهميه. على سبيل المثال من يصدق ان كالون اللي كان محترف في الدوري الفرنسي كان قبلها محترف في الدوري اللبناني؟؟
أؤويد فكرة جلب لاعبين خليجيين أو عرب مثل اللبناني محمد قصاص في القادسية والكويتي جاسم الهويدي في الهلال سابقا و العمانيين في نادي الرياض. لأنه بطبيعة الحال راح يكون لهم متابعة من محبينهم في الدول اللي جو منها. وخصوصا انهم يلعبون في الدوري السعودي. وبكذا راح نضمن متابعة قوية من الجماهير العربية لدورينا بحكم متابعتهم لنجومهم.

-بالنسبة لبطولة اسيا القادمة 2009 ماراح يشارك فيها إلا المنتخبات اللي مطبقة نظام الأحتراف الشامل والعالمي (على حد كلام ابن همام في مقابلته مع الجزيرة) ويقول انه ما فيه إلا اليابان وكوريا بس اللي طبقوا هالنظام صح (يعني هل هو بعقله إن اليابان وكوريا بيلعبون على النهائي وبس وهذي البطولة!!) ومعنى هذا ان كل الدول الأسيوية راح تسعى انها تطبق هالنظام وإن صار وقعدنا حنا نتمطط في تطبيقة فقولوا على بطولة اسيا السلام!!===> ماش ماتدخل المخ إن منتخبنا مايشارك فيها لكن هذا كلام ابن همام!!
وبرضوه بالنسبة لبطولة كأس العالم 2010 راح يكون مستوى الكورة متطور جدا واذا قعدنا على ماحنا عليه اعتقد ان التأهل ماراح نحلم فيه. وان تأهلنا راح نقابل منتخبات متطورة جدا مقارنة بمنتخب لا يحمل أي لاعب محترف خارجيا. وفي هالحالة الله يعين على درازن الأهداف!!

في النهاية. اتمنى ان الإتحاد السعودي يركز على هالجوانب اللي ترتقي بالكرة السعودية عشان تكون كورتنا بمشيئة الله في طليعة الدول المتقدمة في كرة القدم وستظل كذلك انشاء الله.