نتمنى الفوز لممثلنا الإتحاد والظفر بالبطولة الأسيوية والكل عارف ان الأتحاد راح يتأهل لكأس العالم اذا فاز أو تعادل سلبيا في هالمبارة. وبكذا راح يكون ثاني نادي سعودي يتأهل لهالبطولة اللي يتمنى كل نادي انه يشارك فيها عشانها تجمع أقوى الأندية في العالم. وهذا شرف لبلدنا ان يشارك نادي الإتحاد في هالبطولة ودليل قاطع على قوة الدوري واللاعب السعودي ومشاركته في جميع المحافل الدولية.

وبالنسبة للمبارتهم الجاية مع العين فأنا أتوقع ان الإتحاد مؤهل لنيل هالبطولة أكثر من العين. لأن فريق العين راح يفقد المحترف تيجادا لتعرضه لحادث مروري. وبكذا راح يفقد واحد من أهم عناصر الفريق. وإضافة إلى هذا نجد هناك مشاكل بين الفريق والمدرب ماتشلا وهالشي صار بعد استياءهم من خطته وتبديلاته في المباراة السابقة و اعلانهم عن التعاقد مع مدرب اخر. لذلك راح نشوف عدم تفاهم بين اللاعبين والمدرب مما يفقد الفريق تركيزة في المباراة. واللي شاف الفريق في المباراة السابقة يلاحظ ان الفريق واثق من ان فريق الإتحاد أقوى منه والدليل على هذا لعبهم بطريقة دفاعية مع التركيز على المرتدات عدا بداية الشوط الثاني اللي ركزوا الهجوم فيه. وبرضه يلاحظ عليهم انهم مايملكون مهاجمين اقوياء عدا انوكاشي اللي شفناه يلعب في الهجوم لحاله بدون اي مساعدة لين تعب وبدلوه ووقفوا هجومهم. وبحكم ان المدرب يعرف انه رايح رايح!! فإنه راح يطبق مثل اذا كنت رايح سوي الفضايح!!

أما الإتحاد فهو يملك ترسانة من اللاعبين الدوليين ودفاع لا يمكن اختراقة وعشان كذا لجأ العين إلى التسديدات من خارج منطقة الـ18 لأنه فشل في تجاوز دفاع الإتحاد. اضافة إلى الحارس مبروك زايد اللي اثبت بالفعل انه يستحق ان يكون حارس المنتخب السعودي بعد تصديه لثلاث هجمات كانت مؤكدة انها تصير اهداف. وزيادة على كذا ان المباراة على ملعب جدة بين جمهور الأتحاد وهالشي راح يضغط على فريق العين ويصب في مصلحة الإتحاد اللي راح يتفاعل مع جمهوره. وبالنسبة لمدرب الإتحاد فهو اثبت جدارته في المباراة الأولى حيث كانت كل تبديلاته صحيحة واثمرت عن هدف التعادل وهالشي يدل على ان الفريق متفاهم مع مدربه. ويملك فريق الإتحاد هجوم لا يمكن ايقافه ولا أدل على هالشي إلا الأهداف الكثيرة اللي سجلها خلال مشواره في هالبطولة.

ختاما...
اتمنى ان نرى جميع جماهير الأندية بما فيها جماهيرنا الهلالية في جده في صف واحد مع الأتحاد. لأن الفوز والتأهل شرف لبلدنا قبل ان يكون شرفا للإتحاد. وان نكون مثالا يحتذا به للجمهور الواعي والمتحضر والبعيد عن جميع انواع التعصب الأعمى.