عندي بعض النقاط المهمة اللي حبيت اقولها بخصوص هالموضوع:

-للأسف أن حنا نتباهى بدورينا وأنه من أفضل الدوريات عربيا وخلافه وحنا لم نطبق الأحتراف بمعناه الحقيقي وإذا ما اهتمينا بالأحتراف وطورناه راح نشوف الدوري يقل مستواه سنة بعد سنة حتى يفقد بريقه تماما. وحنا نشوف التكاليف المادية للأندية اللي كل مالها وتزود كل موسم بالله وين راح تجيب تكاليفها منه إلا بالأستثمار!! وإحنا نشوف كل الدوريات اللي كانت اقل منا زمان صارت تنافسنا هالحين وتعدتنا بعد. واللي يشوف الدوري القطري والأماراتي يعرف هالشي. يكفيك انهم حاطين قناة خاصة للدوري. إخراج على كيفك! وإثارة تحمسك للمتابعة! ماهوب مثلنا الله يخلف! قناة تجيب أشياء مالها سنع! بالله من يتابع منكم عالم الكريكيت! وش شايفينا ذولي هنود على غفله! المفروض يكون تركيزهم على الرياضات اللي يهتم فيها الشارع الرياضي هنا في السعودية! ويكون متابعتهم للدوري على رأس اهتماماتهم . مهوب يجيبون لي برنامج آخر الليل ويالله يجيبون ملخص قصير عن الدوري! ولا بعد نصفه مقابلات!!! فلذلك لازم نركز على الأعلام جدا جدا. عموما انا سمعت إن فيه قناة رياضية لروتانا بتفتح قريب لكن إلى حد الآن ماشفنا شي.

-بالنسبة لبطولة اسيا القادمة 2009 ماراح يشارك فيها إلا المنتخبات اللي مطبقة نظام الأحتراف الشامل والعالمي (على حد كلام ابن همام في مقابلته مع الجزيرة) ويقول انه ما فيه إلا اليابان وكوريا بس اللي طبقوا هالنظام صح (يعني هل هو بعقله إن اليابان وكوريا بيلعبون على النهائي وبس وهذي البطولة!!) ومعنى هذا ان كل الدول الأسيوية راح تسعى انها تطبق هالنظام وإن صار وقعدنا حنا نتمطط في تطبيقة فقولوا على بطولة اسيا السلام!!===> ماش ماتدخل المخ إن منتخبنا مايشارك فيها لكن هذا كلام ابن همام!!


-وبرضوه بالنسبة لبطولة كأس العالم 2010 راح يكون مستوى الكورة متطور جدا واذا قعدنا على ماحنا عليه اعتقد ان التأهل ماراح نحلم فيه. وان تأهلنا راح نقابل منتخبات متطورة جدا مقارنة بمنتخب لا يحمل أي لاعب محترف خارجيا. وفي هالحالة الله يعين على درازن الأهداف!!

-اما بما يتعلق بجانب استثمار اللاعب فترى اللاعب السعودي له صيته في كل مكان ولنا في لاعبنا سامي مثال كبير. فهاهو مثل مانشوف مؤهل انه يكون افضل لاعب في اسيا وداخل تصنيف افضل ثمانين لاعب في العالم وتحدثت عنه جميع الرأي الرياضي العالمي بإسهاب. أعتقد هالشهرة وهالمجد اللي وصل له لو وجد الإدارة الأستثمارية الناجحة راح يجد قبول وكسب كبير جدا. وانت شفتوا وشلون ذيك الكورية المعجبة بياسر القحطاني وصورت معه وطلعت في الجرايد. هذا أكبر دليل ان نجومنا لهم إعجاب وشهرة مو على النطاق الخليجي والعربي فقط! بل على نطاق عالمي.

-لازم يكون عندنا إهتمام بالجانب الجماهيري. لابد إن حنا نعطي الجمهور حقه في التشجيع عشان تطلع المباراة بشكل حماسي وممتع. بس يكون هالأهتمام في حدود. يعني ما نخلي الحبل على الغارب ونخليهم يسوون اللي يبون. ولانكبتهم ونمنعهم من فعل أشياء تعبر عن حماسهم في نطاق المعقول.

-لازم يكون فيه ملاعب اضافية تناسب حجم المباريات بين الفرق. يعني مو معقولة انه تجي مباراة للشباب والحزم في نص الموسم وتكون في استاد الملك فهد ويصير معظمه فاضي. لازم تكون هالمباريات في ملاعب تناسب حجم الفريقين وأهمية المباراة.

-في النهاية. اتمنى ان الإتحاد السعودي يركز على هالجانب بشكل اساسي عشان يكون كورتنا بمشيئة الله في طليعة الدول المتقدمة في كرة القدم وستظل كذلك انشاء الله.