--------------------------------------------------------------------------------
الأسباب ناصعة البياض .. لتجعلك تكره مطرسة أهل الرياض !!
أكثر الأشياء اللي تضيق صدري و تجيب لي الغلقة و تخلي الدنيا مقفله معي .. هي المقارنة بين مجتمعنا و مجتمع ثاني ..
من جد و الله يا جماعة !!
يعني لو أجلس أفكر في الفرق بينا و بين مجتمع ثاني و أنا مشغل أغنية " من بادي الوقت " .. تسان يطق علينا أبو الجيران و يقول لنا ترى خزان الموية حقكم يهرب
أقول الله من خفة الدم .. كمل بس
من جد يا جماعة يجيني إحباط يخليني أفكر أهاجر لبلد ثاني ، و ما يردني إلا حبي لأهلي وكلبتي ((الله من زود الولاء للوطن !!))
أكيد كثير منك يتساءلون ويقولون وش جاه ذا أستشاط علينا و لا عاد صار يحب ديرته !!
و أنا أقول هذا مهوب شي طارئ .. هذا وليد تراكمات ثمان وعشرين سنة عشتها في ذا البلد .. من دحدرت من بطن أمي و أنا متعقدن من ذا الديرة !!
عندك الجو مثلا .. قارن جونا مع جو أي دولة ثانية .. منتب لاقي أخس من جونا .. لو تطلع يدك مع دريشة بيتكم تعفطت أصابعك من زود الحرارة .. لكن مهوب هذا اللي قاهرني .. اللي قاهرني صدق هم ذا المبزرة اللي يدورون بكامرياتهم الساعة ثنتين في عز القيظ .. ودي أعرف بس وش اللي حادهم على الدوران !!
عندك سواقة بعض الناس .. من تركب السيارة و أنت على أعصابك .. كنك في رالي .. مصاقط و هواش و محاد لدرجة أني كلما شريت لي سي دي سيارات حق البلايستيشن خلصته في وقتها من زود ما أنا متعود على المحاد و المصاقط .. صرت بدال ما أسابق بالكمبيوتر أروح أدور في شوارع الرياض يعني تدور في العليا هذي بمثابة المرحلة الأولى ، المرحلة الثانية تدور في حي الربوة و ما جاورها ، المرحلة الثالثة تسقط على راعي تريلة ، مرحلة الوحش تدور في السويدي و الشفا ، و أبن أمك تعدي ذا المرحلة !!
عندك مثلا نفسيات بعض الناس .. تدخل عليه تلقاه مكشر و نفسه في طرف خشمه .. تبادره بالسلام يا لله يرد عليك .. كنك تشحذه سلام ، زين بعد إذا ما قال الله يعطينا و يعطيك أما إذا صار له عندك حاجة جاك فاق كشرته من بعد كيلو و يقعد يدعي لك بالخير ساعةيعني عالم مصلحجية!!
تقعد مع أخوياك على طعس و إلا في روضه إذا جا الربيع ، و تقعد على الثيل و أعصابك عال العال و إذا شفت عصفور و قلت لهم ياسلاااام يازين منظر العصافير مع الروض و الطعس و السما الصافية فعلا تمازج رائع .. قالو لك هها بس بلا هبال عطنا الساكتون خل نرجده (نصيده) .. و تلقاهم مطامر يوم كامل ورا عصفور كبر أصبعي الصغير و إذا حالفهم الحظ و صادوه .. شبولك نار كبر بليس ثمن شووه .. ثمن يطبون عليه تسعطعشر واحد .. و أخر شي إذا فصفصوا عظامه قالوا لك ياشين لحمته شيناه !!
تروح للسوق أنت و أمك .. تغفل عنها خمس دقايق ثمن ترجع لها .. تلقا بزر ما تقدر تشوفه إلا بمكبر قاعدن يغازل أمك ودك تجلده .. لكنك تخاف ينقطم و يتكسر في يدك .. فتقوله عيب يا بابا اللي تسويه !!!. فيقولك : ألعب غيرها ، أنا حاجز البنت قبلك !! .. تسطره و تلزقه في الجدار فيستادب من ملاحق الحريم و يحول على ملاحق لبناني كبر أبوه
تقعد في الاستراحة مع الشباب .. اللي يلعب بلوت و اللي يناظر الدش و اللي يحرحر في شيشته و اللي يتشكى من حرمته .. أما أنت فقاعد مع واحد في زاوية الغرفة لا لكم و لا عليكم قاعدين تناقشون في مستقبل العلاقات السعودية العراقية .. و فجأة يسكتون كلهم ثمن يكرونها ضحك عليكم و يبدون يعلقون .. اللي يقول " ياشين الفلسفة على البقر " و اللي يقول " وش خليتو لكوفي عنان ، حرام عليكم خلوه يشتغل " و اللي يقول " بالله يا طارق عزيز مد لي البيالة " و اللي يقول " ترى صدام حسين توه داق و يقول أنا جاي للاستراحة ألحين تبون أجيب لكم شيء على الدرب " !!
ترجع لبيتكم في عز الليول تافلن العافية ، تدور الفراش دورة .. تدخل غرفتك تلقى بزارين أخواتك متسدحين على سريرك و نايمين .. تجي تبي تنطلهم برا غرفتك .. تطلع لك أمك من بين الظلام و تقولك " وجع ماعندك قلب ، خلهم ينامون في سريرك " و أنا وين أنام فيه !! "
تقول " هين أنت كبير و تجسر رح نم في الملحق " تروح تنام في الملحق و ما يجي عقب ثلاث ساعات إلا و بزارين أختك يرادون فوق ظهرك .. تقوم تجلدهم .. تطلع لك أمهم و تقول " هو وش فيك عليهم " .. تقولها ذبحوني ما خلوني أنام .. تقولك مالهم دخل المساكين أنا اللي قايلة لهم يقومونك من النوم عشان توديني لبيتي !! .. عاد وقتها ودك تجلد أمهم بكبرها !!
تفتح التلفزيون يطلع لك برنامج عن المدارس .. و يقولك أن طلاب مدرسة في فرنسا تمكنوا من إعادة تركيب مسبار مصغر .. و طلاب في مدرسة كندية تمكنوا من استخلاص الكلور من ملح الطعام .. و طلاب في مدرسة بلجيكية تمكنوا من تقييم مستوى التلوث في بروكسل و طلعوا بنتايج قريبة من اللي توصلت لها وزارة البيئة عندهم .. و عقبها أقعد أفكر يومنا في المدرسة وش أزين تجربة سويناها .. و أطلع بنتيجة أننا ما سوينا إلا تجربة وحده وهي أن الموية في علبة زبادي إذا صبيتها في إناء مسطح تطلع نفس الحجم !!و اللي قاهرني أننا يالله فهمنا ذا التجربة !!!
لكن يا جماعة و اللي رفع سبع سماوات و بسط سبع أراضي أني ما أتحمل أفارق ذا الديرة أكثر من أسبوعين ، أسبوعين بالكثير و أشتاق لأهلها و بثارتهم و لجتها و خيستها و للناس و سواقتهم ، و الله أني إذا جيت من السفر أول اوصل اروح احب راس " فاروق " راعي البقالة اللي جنب بيتنا .. من زود حبي و شوقي لها الديرة ..
احبك يااااااا رياااااااااض
