RAID2001 : هين وعدك عندي مصيرابو سليمان يستضيفك على الاقل حط اختيارات حطي شي !!!


سؤالي الاول للظيف :

الاسم عاشق النمر

<------ يقاله جاب شي جدد

اسمي : خالد وكنيتي ابو وليد

العمر: عشرين وكم سنة

الحالة الاجتماعية : اعزب ماتأهلت للادوار النهائية .

الجنسية : سعودي مع ان الناس دايم تقولي انت لبناني

عدد الابناء : ثلاثة بنتين وولد وشفيكم تناظرون ؟؟؟

العمل : موظف بس ماني قايل وين اخاف تقتلوني

<----- موظف في مكان تكرهونه


سؤالي الثاني : اطرف موقف مر علي وفي نفس الوقت موقف محرج كان في مدينة الرياض وبالتحديد في منطقة الثمامة كنت مع العائلة قبل تقريباً اربع سنوات المهم استأجرت دباب وكانت اول مره في حياتي اركب دباب (( ابو اربع عجلات )) كان حدي سيكل ويخب المهم ركبت الدباب وامشي عليه قلت ياولد اثره سهل وانا اللي ادوس واكيم عليه وانا امشي تذكرت سلفستر استلوني في فلم رامبوا ههههههه المهم المهم انا امشي بمحاذات العوائل والشباب اللي جالسين من حظي العاثر كان في مجموعة شباب جالسين وفيهم واحد اعرفه المهم
لما صرت جنبهم بالضب نادا علي واحد منهم قال خالد المهم انا سمعت خالد (( وطبعاً من عادة الملقوف اذا ناداه احد يلتفت على طول ))بس ماالتفت لحالي التفت انا والدباب بسرعه ............ وعينك ماتشوف الا النور انواااع التقلبات وانواع الحركات البهلوانية التلقائية طبعاً واطيح في جهه والشماغ في جهه والعقال في جهه والسنون في جهه والخشة تنزف دم والسعابيل تقاطر المهم لملمت نفسي والعالم تجمعت علي (( تقول جايب هدف التعادل في الدقيقة الاخيرة )) وجمعت بقايا وجهي وقمت والناس تقولي سلامات عسى ماتعورت وانا اقول لا عادي ماجاني شي وانا تسبدي حايمه من الوجع واشوف الدنيا تغير الوانها المهم وحمدت ربي اني ماجاني كسور وتبت عقبها اتميلح بالدباب

سؤالي الثالث : احلى موضوع والله ما اقدر احدد لان كل المواضيع مثل عيالي <---- (( نجيب محفوض النمر )).

سؤالي الرابع : سبب اشتراكي في منتدى الزعيم لاسباب عديدة منها انه موقع يستحق الاشتراق فيه لانه صراحة من افضل المنتديات على النت ولاني احب ان افيد واستفيد والاهم من هذا لحبي وعشقي للزعيم .


سؤالي الخامس : المواقع الخاصة لي اكثر من موقع بس كلها مجرد تجارب داجة ولم اصل للموقع الذي احس انه يستحق النشر ويستحق ذوقكم الرفيع
وانا الان لي اكثر من سنة وانا اقوم بتصميم موقع شامل كل شي رياضة ومعلومات وغيرها وانشاء الله انه يرى النور قريباً ;)

السؤال الاخير : خفة الدم ماتجي من فراغ يعني لها اسباب وهي

اول شي كل صباح تصحى بدري وتسوي تمارين رياضية ويكون احسن لو صارت قدام التلفزيون (( ما الك الا هيفا ))
وبعدين لازم تكون مملوح ولازم ماتقرب الكتشب لانه هو سبب ثقل الدم :p
الشطة معليش اذا كانت كرستال ماتضر

تحياتي اخوي رائد

=======================================================

اخوي الاعصار هلا فيك عادي

اخوي الاعصار هذول اعداء النجاء وتعرف واحد مثلي ناجح من الدور الاول وبنسبة 98% اكيد مايحبونه مثل الدافور في الفصل مايحبونه العرابجة
تحياتي اخوي الاعصار

==================================================
هلا اخوي نايف

* سـمعنا إشــاعه بأنك (( شــين ووع )) ماصحة هذه الإشـاعه..؟؟ .

- دائماً الاشاعة تكون بعكس الصحيح وانا فعلاً عكس الاشاعة تماماً ولو تشوفني تقولي وش اسمك ياحلوه من الملح اللي فيني لدرجة اني اول ما انولدت قال الدكتور لهلي مبروك بنت وبعدين طلعت الممرضة عليهم وقالت لا ولد بس اطخم


* أحيانا والشخص معصب يتبادر لذهنه موقف او يشاهد من الشخص اللي رافع ضغطه حركه ماتخليـه يمسك نفسه..( أذكر لنا موقف شبيه مر فيـك ) . ؟

- مااذكر موقف مر علي مثل كذا لو تذكرت رديت عليك بعدين


* عـاشق النـمر ماذا يعني لك ( أبو ناصر= يوسف الثنيان ) ؟؟ .

- كانك تقول وش يعني الماء للنبات والقلب للحب والهواء للبشر يوسف يمكن لو يعتزل اعتزل معه التشجيع لاني بصراحة مااسر قلبي بالفن الا هو ولو اني اميل في بعض الاحيان للاعب العالمي (( ريفالدوا )) احسن انه سعودي وان اصله حوطي هههههههه لاحضوه اذا طلع بالتلفزيون .


* هل انت من الناس اللي يتنرفزون بسـرعه.. ( مع اني اتوقع انك انواع البرود )؟؟؟ .

- والله انا مثل ماقلت ايسكريم واعصابي بارده بس اذا عصبت انسى العالم واجلس اكثر من عشر ايام ماهدت اعصابي

* الغـيره لها في حياتك نصيـب..؟؟ .

- الغيرة اكيد لها نصيب في قلب اي واحد واللي مايغار (( ديوث )) وانتم بكرامه ،،،،


* العظمه ماذا تعني لك بكل معانيها؟؟ .

- العظمه هي قطعه من الهيكل العضمي ويحبها الكلاب وهي اذا انقسرت تروح للطبيب عشان تجبرها
اما كانك تقصد العظمة الثانية فهي لله سبحانة وتعالي ;)

* آملك في الحيـاة يتمثل في أيـش.. ؟.
أملي في الحياة هو ان اعمل مايرضي ربي ووالديني قبل كل شي وان اكون انسان ناجح في جميع اموري وان ينصر الله الاسلام والمسلمين واملي الحالي هو نصر افغانستان انشاء الله وتطهيرها من الكفر والفسارد !!




تحياتي اخوي نايف وهين مردوده للك الاسئلة ;) انا شاك انك انت اللي تحط اسئلة الثانوية العامة (( القسم العلمي ))

=============================================================