-


ما ادري من وين ابدأ ومن وين انتهي ...

بدأت القصه حين قرائتي لاخبار الجرائد وان تمرين الهلال بعد المغرب سيكون في الرس ..

حتى اتى خبر قبل العصر وقال ان التمرين في ملعب النجمه .. واتصلت على نادي النجمه وقالوا فعلا الهلال بيجي عقب المغرب ...


المهم شغلنا الموتر انا وخويي ..

قال خويي ترا التمرين بالرس .. واترك عنك خراط سنترال النجمه ..

واقنعني .. وقلنا نبي نشوف تمرين الهلال ونبي نقص تذاكر ..


المهم اول مامسكنا طريق المدينه .. ويجيك توبيس نقل جماعي .. تلحقه سيارات فيها اعلام هلالية ..

ماصدقنا انفسنا وقطعنا الاشارة ووراهم ..

الين وقف الباص عند فندق عنيزة .. وتجمعوا الجماهير .. وبدوا يصورون مع اللاعبين ..

حسافه كنت اتمنى ان معاي كاميرتي الديجتل لكن نسيتها بالسيارة واكتفيت بكاميرا الجوال ..

ودخلوا اللاعبين الفندق ويتقهوون ... واكلوا شي خفيف ..

بعدين منصور الاحمد على باله ذكي ههههههههههههههههههه فديته هو وافكاره ..

قال لسواق الباص تعال من الباب الخلفي للفندق ..

الجماهير انتبهت وراحت تركض للشوارع الخلفية ..

طبعا المسؤلين قالوا التمرين بالرس .. حتى يضللوا الجماهير ..

والجماهير فطينة ووراهم وراهم .. وموكب رهيب .

الين وصلوا ملعب النجمة .. الذي كان الدخول بعشرة ريالات لمشاهدة التمرين ..

والحمدلله دبرنا واسطه ودخلنا بالمضمار ..

وكانت التدريبات عبارة عن احماء واطاله .. وبعدين سوى باكيتا تقسيمة مضحكه ..

الشلهوب والصويلح حراس ..

وابدع الشلهوب في الحراسة هههههههههههههه وصد اكثر من كورة لياسر .. (( مهوب بسيط ))

وياسر القحطاني الحمدلله ماتوجد فيه اي اصابه ..

وكان الجو مرح واللاعبين يتمازحون مع بعضهم ويضحكون ..

والصراحه كان الصويلح هو فاكهة الفريق ..

بعد ما انتهى التمرين .. دخلنا نصور مع اللاعبين ..

الحمدلله صورت مع ياسر والشلهوب ونواف والتمياط ..

ورحت وسلمت على منصور الاحمد وسولفت معه شوي ..

ودخل رئيس نادي النجمه للملعب وصافح منصور الاحمد قبل ان يذهب الفريق الهلالي ..

وقاله : حنا يالنجماويين كلنا للهلال .. واعذرونا على القصور .. وتكلموا شوي ..

جماهير قليلة صراحه اللي حضرت لان الغالبية كانوا متوقعينها بالرس .. ولكن نعمة من الله اننا شفنا الاتوبيس ..


اللعبه مدبره من الصحافه لتخفيف الضغوطات على الهلال .. واطلاق الكذبات وان التمرين سيكون في الرس ..


واخوكم بالله ماراح يقص تذكرة .... والتذاكر كلها خلصت ..

وانــــــــــــــــاشدكم ..... ابغى تذكرتين لو بألف ريال .. اللي يقدر يعطيني رقم جواله بالخاص .

واقابله بعد صلاة العصر عند الملعب واعطيه المبلغ اللي يبيه مع حبة خشم . .

اغلب التذاكر نفدت من الصباح .. واستأثر اهل الرس بنصيب الاسد منها .. والعشم ان يكون انصار الزعيم قد اشتروا تذاكر ..

متوقع تدفق جماهيري غفير لايتسع له الملعب .. والله يستر .. ويجيب العواقب سليمة ..




اشياء كثيرة بقولها .. لكن اعذروني على الاطاله ..