بسم الله الرحمن الرحيم
السلام عليكم ورحمة الله وبركاته
اخواني واحبتي جماهير الزعيم وهذا الكيان الكبير
اتقدم لكم بالاعتذار جميعا على موضوعي الاخير اللي كان بالانجليزي ولكن لعدم توفر كيبورد عربي
واما عن من سال كيفية كتابة عنوان الموضوع بالعربي فقد كان عن طريق النسخ واللصق من احد الاخوان بالماسنجر وتعرفون صعبة احد ينسخلي موضوع كامل .....
واتأسف اذا احد واجه صعوبه في قراءة الموضوع واشكر كثيرا كل من قام بالترجمة والف تحية وشكر لكم جميعا
والاهم والحمدالله عن طريق احد الاخوان عرفنا طريق لكيبرود عربي
على العموم انا اجيكم ومعي موضوع خطييييييير
حتى في بريطانيا البلوي يحارب الهلال ........
طبعا انا زيي الرسمي هنا تي شيرت الهلال القديم اذا صار الجو معتدل وغير بارد
وامس ولله الحمد كان الجو زين ونزلت لمطعم وقبل ما ادخل المطعم اشوف ناس متحمسين ويصارخون
وقلت ابي ادخل اشوف شالسالفه .....
دخلت الكل سكت !! ولا احد تلفظ بأي كلمة
قلت بس لا اكون ببالهم ارهابي وخافوا !! بس اناظر بوجيهم عرب !!
قلت السلام عليكم ردوا وعليكم السلام ...... طلبتلي شي وجلست جنبهم
فجاة تكلم واحد منهم وقال : طيب وليه الهلال كذا ؟
انا سمعت السالفه فيها هلال ترككككت الغدا وجيت لم الهلال
خبركم اني مشتاق لاي شي عن الهلال !! @@
خشيت بالسالفه : من فيكم هلالي ؟ ولا احد رد
قلت افا نصراويه ؟ قالوا هد اعصابكم خلنا نتعرف
تعرفنا واذ زعيمهم يدعى : ماجد البلوي
على طول قلتله من جماعة منصور ؟ قال اي نعم
عالعموم كان واحد سعودي مب حول الكوره واثنين كويتين متحمسين
وماجد البلوي اتحادي طبعا وخويه نصراوي ..........
قلتله مع احترامي لك ولعمك منصور (طبعا الولد عمه منصور على كلامه ) الاتحاد فريق ماعنده سالفه
وش رايكم تشجعون الهلال ولا الشباب ولا الاهلي احنسلكم عاد من الاتحاد
عاد شايف نفسي انا الحين هلالي محد قدي ولا شرايكم انتم ؟
فجأة الكويتي :حالتكم حاله والله يالسعودين شوي نسمع الهلال فريق النصابين واكبر الفاشلين وماعندهم سالفه وفريق واسطات
والحين انت تقولنا الهلال ماعرفنالكم
قلت اسمع يبو دامك ماتعرف عن الهلال والاتحاد والنصر ...... عندنا لاعب اسمه سامي تعرفه ؟
والله رد قالي الكويت كلها تعرفه وتحبه... قلت عليك نور هذا بطولاته مع الهلال اكثر من بطولات الاتحاد بكبره
الكل سكت !!
قال النصراوي : بطولات بالغش وعن طريق امراء الهلال !!
والبلوي يزيد عليه ويدعون ان امراء الهلال هم من غصبوا ياسر وهددوه ان لم يلعب للهلال بيصير فيه اشياء مايلعمها الا ربك
لاوضحكني خوينا يقول وههدوه مايلعب بالمنتخب !!! ولا كيف مجنون يترك 50 مليون !!
الحمدالله والشكر يحسبون الدنيا كلها فلوس
ويدعي ويقول اشياء اقسم بالله لا سمعتها بامنتديات ولا ديوانيات
وطفشونا وهم يقولون امراء الهلال وامراء الهلال وراء البطولات
لين لفت انتباهي بجملتين
النصراوي يقول يكفي ان النصر مطفش الهلال ومعقده : مسكين نسى صارلهم كم سنة مايعرفون البطولات وين
والبلوي يقول : يكفي ان عمي كل فريق وكل لاعب يتمناه !!!!!!!!!
قللته وقسم باله جمهور الاتحاد بداو يكرهون عمك من اللي سواه دمر فريقهم
رد : بالعكس عمي بنا اقوى فريق والدليل لاعبين الاتحاد بالمنتخب !!!!!!!
هذا الشي لفت انتباهي كثيرا
قلتله ماشاء الله شوف براعم الهلال كيف تطلع ؟
عزيز العنبر الصويلح الشلهوب التمياط سامي المفرج الدوخي الجمعان الثنيان النعيمة ....... نجوم ماتنتهي ماشاء اللله تطلع من النادي وبشكل مستمر
وشوف بالمنتخب كم لاعب هلالي بدأ احترافه مع الهلال؟ العنبر التمياط سامي العتيبي عزيز الشلهوب
على الاقل عندنا قاعده بناء وعندنا فريق شباب قوي
شوف الاتحاد الشباب كيف؟ والله انه بنفسه مايعرف اسم اي لاعب
وقلتله لاعبين نادي الاتحاد بالمنتخب ؟
المنتشري وزايد هم اللاعبين الوحيدين اللي احترمهم بالمنتخب صراحه
تكر انتقل من الشباب
كريري من القادسيه
مناف : يمكن لاعب جيد لكن مستواه محدود جدا
سويد : وياويلي على مردونا جاهم من الاهلي
يعني الواحد يدور والله مايلقى مقارنة بين الناديين
قلتله كل لاعبينكم من الاندية المجاوره او من الخارج ويرد : بس بفلوسه !! ودام بفلوسه محد يكلمه
مطفشنا بفلوسه وللاسف اكتشفت بعدها عن طريق الاخوان الكويتين انهم طايحين حش بالهلال ومخربين صورته عند العرب والخليجين بالخارج ومطلعين اشاعات الله لايوريكم
مادروا ان الهلال شهرته اكبر من كذا .... وانا لي معكم موضوع قادم انشالله بالصور في مفاجأة حلوة لكم
الله يحمي الاهلال من اشكال الحاسدين والحاقدين
بس صراحة بعد ماطلعت من عندهم فرحت وقلت يوووه هلالنا بكل شبر بالعالم له حاقدين وهذا يدل على ان زعيمنا ولله الحمد كبيـــــــــــــر
وصدقني يالبلوي مايمديك على الهلالي يالتعبان
هههه بس على فكره طفشتهم لين غيروا السالفه ..........
واتمنى من الاخوان اللي يقرون الموضوع ويواجهون مثل هذه الاشكال يردون عليهم ويسكتونهم بقوة
مع الف تحيه لكم جميعا والف سلام
والله يوفق زعيمنا بكل مكان
هلالي تشيلساوي
لاتنسونا بدعوتاكم
