مساء الخير ..

الظاهر هذا بيكون أول و أخر موضوع اكتبه بالمعرف هذا .. بس مو مشكلة ... كلمة الحق لازم تنقال ... ومافيه أحد كبير على الحق ...

بكل أسف اقدر اقول ان ( ثلث ) الهلال راح ... كل السنوات اللي راحت وانا أقول أن الهلال قايم على ثلاثة ... سامي والدعيع وخميس ... اما الباقين ومع احترامي الشديد لهم ... جوا ولا راحوا ... مايأثرون كثير ..


راح خميس علشان يعطينا صفعة تصحينا على الواقع الأليم اللي حنا عايشين فيه ... حنا الهلاليين اللي ضعنا مابين الأدارة الورقية ... وأعضاء شرف الترزز...

ماعتقد أن فيه نادي بالعالم نكسته تجيه من الداخل .. زي الهلال ...

الهلال ياسادة ياكرام اللي بدأ السقوط من مدة ... والحين أوشك على النهاية ..

مااحد فيكم سأل عن سبب أختفاء فيصل أبو أثنين ؟؟؟

ماأحد أستغرب اعتزال التيماوي المفاجيء ؟؟

مااحد سال نفسه ليش خميس هج بجلده من النادي ( المعوق ) ؟؟

نسيتوا كيف أن حسن العتيبي كان على وشك الانتقال للنصر قبل كم سنة ... قبل مايرجعونه بطريقة مالقوها ولا المسئولين ببرشلونة ... ناد عمه وحب خشمه !!!

هذا غير نواف اللي حجز له غرفة باحد فنادق جده خلاص ... لولا أنه تراجع باخر لحظة ...

وبكره بيروح الشلهوب وسامي والدعيع .. الين مايبقى بالهلال الا المتردية والنطيحة .. المسعري والقحطاني .. وشلة ( اركض اركض اركض ...تراك ماهناش ) ...

لا يجي أحد ويتفلسف ويقول لي هذا عصر الاحتراف ..

أحتراف مين ياعمي ... فيه لاعب ( عاقل ) يترك الهلال ويروح لغيره لو كان لاقي الجو النفسي المناسب .. والمردود المالي الجيد ..

مشكلة الهلاليين أنهم يعتقدون انهم في زمن الاقطاعية ... وهذا (ولدنا مايروح لغيرنا ) !!!

أي ولد وأي بنت ... هذولا لاعبين محترفين .. رزقهم ورزق عيالهم من الله ثم من هالكورة ... لا تعتقد أنه بيترك الملايين اللي تجيه من نادي ثاني علشان سواد عيون فلان .. ولا بياض وجه علان ...

ياأدراة الورق ...تبغون لاعبينكم ... عطوهم مايستحقون من الفلوس ...

اللاعب مايلعب تبرع ولا رحمة والدين ... يلعب علشان يحقق مردود مالي ...

وغير كذا ياالادارة الموقرة ... أتركوا عنكم الكيل بمكيالين بين اللاعبين ...

اشمعنى الدوخي تعطونه مليونين علشان يوقع .. وخميس لا .. هذا مع العلم أن لو خميس عملة ... كان أنصرف بعشرين من نمونة الدوخي .. اللاعب المغرور... ونقطة ضعف الهلال الكبرى السنة هذي ..

الدوخي جته الملايين لان وراه الامير خالد بن الوليد ... الامير خالد اللي يصنف ضمن اعضاء الشرف الداعمين .. ومع ذلك يقول لاحدى الجرايد ( يجب على أدارة الهلال ان تعطي الدوخي مقدم عقد ... ولا بوديه لفريق ثاني ) !!!

مدري وش مفهوم عضو شرف اليومين هذي !!!

يعني استغرب ليش الامير خالد ماعطى الدوخي بنفسه .. مو هو عضو داعم ؟؟

هذي مشكلة الهلال ... انه ضايع مابين ادارة هامشية ... تحاول ترضي اعضاء الشرف على حساب بعض اللاعبين ... ومابين اعضاء شرف يبحثون عن الظهور الاعلامي ... ويسعون خلف الشهرة ... واللي أول مايحققونها ... ينسون الهلال وسنينه .. وكلنا نذكر المشرف على السلة زمان ... وينه الحين ؟؟؟


لو خميس وراه عضو شرف يهتم فيه زي الامير خالد ..كان ادارة الهلال عطته بدل المليون خمسة .... مو حباً فيه ... الا تقربا و(رضاوة ) لمعزبه !!!


ذبحتنا المجاملات ... والتفريق بين الاعبين ... وكله بالاخير بيرجع على الهلال وسمعته ...

الهلال اللي جالس ينذبح من الوريد للوريد من قبل ادارته الهامشية ... واعضاء شرف ( شوفوني أنا هنا ) !!!

ياليت ناخذ عبرة من اعضاء شرف الاتحاد ... اللي تاركين الكلام لنا .. ومستأثرين بالفعل ...

نادراً مانشوف اعضاء شرف الاتحاد بالمجلات والصحف... بس نشوف شيكاتهم اربع وعشرين ساعه رايحه راجعه ...

بينما حقينا ... صرنا نشوفهم بالجرايد اكثر مانشوف اعلان شماغ ملكي ...عجلان واخوانه ... اما ساعه الدفع ...فيالله تطلع منهم العشرة الاف رسوم عضوية الشرف ..لا وبالاقساط بعد ...


مختصر الكلام ... اذا كانت ادارة الهلال عاجزة عن حفظ لاعبيها .. وعاجزة عن جعل الاعضاء يقومون بدورهم الايجابي ..فانا اعتقد انه ماله داعي بقاءها اكثر من كذا ..لانها اثبتت فشلها التام ....

ونفس الكلام ينطبق على اعضاء الشرف ... اما دعم يوازي الشهرة اللي حققتوها من الزعيم ... ولا ريحونا منكم الله يريحكم دنيا وآخره ...

وتأكدوا ان لو ترك الامر لدعم الجماهير ..فوالله مانقصر ...

انتم بس اطلبوا . وحطوا حساب او تذاكر تباع في بداية الموسم .. .وبتتفاجأون بالنتيجة ...

دعم الجماهير راح يكون خالصاً لمصلحة الهلال ... مو زي اللي يدفع مليون للهلال علشان يحتكرهم عشر سنين يشيلون دعايات شركاته .. واول مايفوز أي فريق غير الهلال باي بطولة .. نلقاه داعمهم زي مايدعم الهلال ويمكن اكثر ...


اشياء غريبة تحدث خلف كواليس الهلال ... وانتظروا اخبار سيئة مثل خبر خميس .. ويمكن اشد ...

مااقول الا ..الله يرحمك ياعبدالله بن سعد ...ياللي كنت تحترق علشان الهلال ... مهوب مثل اللي يحرقون الهلال علشان مصلحتهم ...