بصراحة يوم رحت من عندكم بسبب المرض الله يسلمن ويشفين والحمد لله طبت ورجعت لكم بخير وعافية
اقول يوم رحت منكم وقبل ارجع قعدت افكر قبل اكتب اول موضوع لي عقب عودتي بالسلامة وقلت اكيد هالحين المنتدى متغير عقبي وحطيت براسي فكرة توقعتها انها هي اللي صارت بالمنتدى عقبي وتوقعت بعض التغييرات بالاعضاء وحياتهم الاجتماعية وطلعت بالتوقعات هذي

1- توقعت ان ابوسليمان تقاعد وصار يجلس بالبيت لحاله ويناقر المعزبة بالمطبخ وراك ماتسوي كذا وكذا تعرفون متقاعد ماله شغلة غير مناقر المرة وتوقعت انه بهالضحوية يبسط بساطه ويقعد بالعاير حق بيتهم يتفرج على الرايح والجاي <===== الله من الفضاوة يابوسليمان .
المهم ويجمع شيبان الحارة عندهم ويدق حنق معهم لين يذن الظهر .

2- عاشق النمر توقعت انه من التنسيم اللي براسه لانه مثل ماتعرفون منزلج توقعت انه يغير اسمه بالاحوال من عاشق النمر الى عاشق (التمر) ويخلي المنتدى ويروح يبسط بسوق عتيقة حق الخضرة ويبيع تمر ومسمي محله محلات (عاشق التمر عقب العصر) وبصراحة بيع التمر اصرف له من السلتحة بالمنتديات ونقل مواضيع خلق الله :p ولا هذا وجه منتديات هذا ؟ هذا وجه منديات وتباسي

3- J.A.A جاج بياع الدجاج توقعت انه يفتح له منتدى هنا ويسميه منتدى جاج لبيع الدجاج . ويحط ملاحظة فوق المحل ويكتب علية ( من اجلكم نواصل فتح محلاتنا لبيع الدجاج حتى لو الجو عجاج ) لا ومغير اسمه عقب المحلات ومسمي روحه( رجل الاعمال بمنتديات الهلال ) امحق رجل اعمال سم روحك رجل موضي اصرف لك ;)

4- المهبول BOW.WOW باواواواواواوا يقولون انه من كثر الواوات باسمه راح لوزارة التجارة يبي يفتح محل يبيع فيه واسطة يحسب كل واوا واسطة هالخبيل مادرى ان فيه واوا واسطة وفيه واو ماسطة مثل الواو اللي باسمه واللي باسم رامبو الطاغية الا صق وينهو اشوفه متغيب وراه عسى ماهوب خاف يومني جيت ايه على باله جساس يوم رجع الزير هج بس هين اذكركم ان ماجبته لكم وتشوفون

5- عنود الصيد توقعت انها تزوجت من العضو الحريف وانه عقب المحبة صار شراني وطلب منها تستقيل من الوظيفة لانه حسب كلامه انه يحسبها موظفة في مجال التدريس اثر اهله يوم خطبوها قالو له انها موظفة ويحسبها مدرسة ويوم شاف انها كاتبة مبدعة بالمنتدى قال لها افصلي ولا تراي بطلقك واظطرت تفصل علشان العيال لانهم حسب ماتوقعت انهم جابو ولدين وبنت مالقيتي غير الحريف ياعنود شوفين انا وش ملحي وش زيني وراك ما احتريتين ؟

6- لجين لايامال الذهاب يالجين انتي لهالحين ماعرستي نعنبو دارك عجزتي ووصل عمرك 21 سنة ماعرستي وش تحترين ؟ توقعت انك معرسة واشتغلتي خطابة توفقين بين الاعضاء والعضوات وتزوجينهم واثرك الى الحين معنسة ؟

7- الشايب فهد توقعت انه فتح ورشة ومحلات كمبيوتر يترزق الله من الاعضاء من كثر ادمانهم على الانترنت وخراب اجهزتهم فتح له محلات واشتغل واسترزق الله

8- منصف الذئب توقعت انه صار مهندس معماري متخصص في تفصيل البيوت الطين بس لاكن للاسف المادة وقفت بطريقه

9- هلالي الخبر توقعت انه فتح بحر هنا بالمنتدى للاخوان اللي بديرتهم مافيه بحر لكن للاسف قفل المشروع من ثاني يوم لانه كل ماجاء لقى البعض من الاعضاء مثل عاشق الذيب والصبحي وسداح وابومنار ومحب الشلهوب يلقاهم جايبين بزارينهم وفوطهم وشامبواتهم ويتروشون مادروا انه بحر للسيحاسة بس ماهوب للتروش ههههههه

10- سلمان ابو تسعات توقعت انه مركب سفتي فوق راسه وصاير دوريات يحسب كل تسعات لازم تصير دورية عزالله انك صتيمة يالاعصار يالنجدة على غفلة ههههههههههههههههه لاومدير متابعة بعد انت المفروض مدير مكافحة ههههههههههه ياحبي لك

11- سفر المرزوقي توقعت انه فتح مزرعة ارانب ودواجن ومحرت بيع جزر من كثر ما يفكهن من ورى خط الثمانطعش بس صدقوني انه هذا مصيره بعد التقاعد تربية ارانب ومواشي ههههههههههههه

12- محترف توقعات توقعت انه صار محترف بس بدون توقعات وسجلوه الهلال عندهم لاعب يوم سمعو انه محترف وطلع صفقة فاااااااااااشلة لان رجليه الثنتين كلهن يسار ماعنده يمين ابد شكله يساري متطرف ههههههههههههههههههههههههههههههه

13- راعي المحبة ابونورة (محمد عبده على غفلة) توقعت انه اعتزل الكتابة وخلا اهله وراح يعيش بالبر وتعلم جر الربابة وعاش لوحده بين الهضاب والجبال تعرفون هواوي الولد ويوم تزوجت حبيبته الوصال من غيره طفش من حياته وهام بالبراري وسكن له بخيمة واذا جا الليل مغير يتونون ويجر ربابته ويكتب من هالقصيد والتوجد من قصيدة
البارحة ونيت خمسين ونة ====== ولولا الحيا ونيت واحد وخمسين
وانت جاي

14- ماروكو توقعت انها تزوجت غني من اغنياء المنتدى وكبار المسؤلين وحطوها مسؤلة هي بعد وخذ يامقاشر مع الاعضاء والعضوات من قدها ؟هههههههههههههه

15- جار القمر توقعت انه تهاوش مع جاره القمر وراح وخلا الحارة كلها له وسكن جنب النجوم وغير اسمه جار النجوم

16- صدى الامس المقلع توقعت انه تطوع وصار داعية بالمنتدى ويدعي للخير والله من جنبها يانايف لاوصرت محرر بعد اوالله الغرابيل

17- اللورد /allord هالانقليزي ذا ماهوب عاقل مسوي فيها انه انقليزي ثاني متابعة هذا توقعت انه على خبري ماتغر ابد ماغي دوران بهالقوايل بالخنينة حقته ومن شارع لشارع ماكني غبت عنه الحبيب هذا هههههههههه

18- حبي تيماوي يوم اروح وانا اخبره رجال راكد ومتزن مع اني ما احتكيت به زين مرة مرة بس لي نظرة بالرجاجيل انا وتوعت انه فتح بوفية بالمنتدى بس برمضان تعرفون مدمن الله يعافيه ولايبتلينا مدمن تووووووووت لو يمر يوم ماشرب توت يموت يادافع البلا بس ولو مازال راكد ولاهوب عيب يترزق الله بوفية ولا انبغى محزرة وان نوى يفتح مجزرة عندي له اثنين يحبهم قلبه محمد ثور وناصر صلوي من احسن الجزارين عندنا ومعهم شهادة خبرة

19- الوصال مع اني ماعرفها من يوم كنت بالمنتدى بس اقرى لها مواضيع زينة ولها خيال واسع ماشالله توقعت انها فتحت دار للنشر وصارت ليل نها كتابة لدرجة انها مفصلة غرفة نوم بسريرها من ورق من كثر ماتكتب ماشالله عليها

20 - نجمة الابداع هذي بعد مهيب بعيدة من الوصال خيالن واسع وفكرن متفتح وعالي وتوقعت انها كل صبح تستغل الفرصة اذا الاعضاء بالدوام وتجمع خوياتها العضوات وخذ ياهمق وسوالف مع شوي كراث وخبز تميس هالصبحية لين عقب الضحى شوي وينفض مجلس الامة للاخوات العضوات .

لكن الصدق ياخواني يعلم الله اني فعلا كنت مشتاق لكم وكنتم على بالي يشهد الله دايما اسال اخوي وشقيقي الاسير الهلالي عنكم وعن المنتدى واخباره ويشهد الله اني مانسيتكم ولا نيب ناسيكم وان كانني نسيت احد ماجبت طاريه ولاذكرت اسمه بهذا اعذرون ترى الذاكرة لكم عليها بس يشهد الله انكم غالين غالين غالين على قلبي

اخوكم حبحور مقطع البحور مذوب الصخور موسع الصدور ملحس القدور حامي الضبان بالجحور
الحبحر الحار الهلالي / الرس