|
دوري ابطال اسيا خسرناه من الرياض وليس من سايتاما
السلام عليكم ورحمة الله وبركاته
ف البدايه هاردلك خسارة نهائي دوري ابطال اسيا البطوله المطلوبه عند الجمهور الهلالي ككل واقوى بطوله للانديه في اسيا
اولاً خلوني احدثكم عن اهمية البطوله وايش يعني الرياده فيها..
دوري ابطال اسيا اكبر بطوله للانديه في القاره الصفراء وتحقيقك لها يعني انتشار وزيادة زخم وتوهج للفريق ولعلامته التجاريه عالمياً مش بس اقليمياً
تحقيقك لها دائماً والمنافسه عليها كل موسم يعني سهوله في مفاوضات المدربين و اللاعبين الاجانب وانتشار وازدياد لجماهيرية النادي على مستوى العالم..
وكون الفريق حالياً هو اكثر من حقق لقب دوري ابطال اسيا اتمنى يكون الهدف الاول للإداره في كل موسم تحقيق البطوله وبعدها تحقيق الدوري وكأس الملك مثل كل اندية اوروبا ولحد يجيني يقول خلاص حققناها مره ومرتين وخلاص .. احتكار البطوله وتزعمها يجب ان يكون اول اهداف الفريق في كل موسم وخاصة الحين تعدل توقيت انطلاقها وبتكون مع الموسم من بدايته ل نهايته.
ثانياً من بداية الموسم كان واضح صعف الاعداد للفريق مع المدرب اللي ( ما ادري وش الميزه اللي عنده غير ضعف شخصيته ) وهالشي محبب اللاعبين فيه .. قوة الهلال في موسم 19 و حتى مع جارديم وكانت فارقه مع الفريق هو قوة الاعداد واللياقه اللي عند الفريق وهذي فرقة كثير معنا وقتها اولاً لقلة الاصابات ف الفريق وثانياً كقوة في الاداء حيث ان الفريق وقتها يحسم اغلب المباريات ويريح اهم اللاعبين ويزج بلاعبين صغار ف السن لاكتساب الخبره.. وهذي مع طيب الذكر جيسوس ومع رزفان ومع كذلك جارديم بصوره اقل
ثالثاً خسارة البطوله مو من مباراة الاياب خسارة البطوله بداية من زيادة وزن سالم الدوسري + واصابات سلمان الفرج العضليه واللي سببها الرئيسي ضعف الاعداد البدني واللياقي + وضعف اداء كنو اللي كانو موقوف طول الموسم ومفترض يرجع بأكمل جاهزيه له ..
من مباراة الذهاب انت دخلت المباراه وانت ماتعرف وش تبي لاتبي تحسمها ولا تبي تلعب المباراه على لقائين
انت افرغت النص تماماً من اهم اللاعبين كاريلو كويلار وفييتو بدرجه اقل .. الفريق افتقد للاعب اللي يطلع بالكوره وصاحب فكره في بناء او تمرير وهالشي ظهر بس مع نزول عبالله عطيف
سلمان ف اللقاء ما احكي لكم عن كمية العك اللي عنده ب التمرير بخارج القدم والعرضي اللي ما استفدنا منه اي شي طول المباراه التركيز على خروج الكره الجمالي عنده اكثر من اهميتها
فييتو لو مكانه ونلعبه في مركز غير مركزه اجزم انه بيخلق فرصه وبيلعب افضل منه ب 100
الفريق الياباني جميع اللقطات اللي تفكك دفاعه فيها هي من اللعب ون - تو بين اللاعبين وهالشي ما شفناه الا مره مرتين وفكك دفاعهم ليه ما استمر الفريق اللعب ب الطريقه هذي حتى لو تكون طول المباراه .. انت امامك فريق كله دفاع .. لا عندك لاعب ينطح ويجيد الضربات الرأسيه ( وبجي له المهاجم الفاشل ب جي له ) ولا عندك احد من الوسط يسدد لو قلنا بترجع الكوره من الدفاعات اليابانيه .. يعني الطريقه اللي بتلعب فيها محدوده وافضل شي وشفناه فكك الدفاعات اللعب السريع والثنائيات اللي تقدر تدخل فيها من عمق دفاعاتهم او حتى من الاطراف انت كسبان بكل الحالات اولاً زعزعة الفريق وثانياً لو ماحصلت على فرصه تهديف انت ع الاقل راح تكسب فاولات قريبه او حتى ضربات جزاء ...
الفريق تقدم مع اول هدف وكان ب امكانه يفوز ب 6 و 7 حتى بس ليه تهدي اللعب .؟؟؟؟؟؟؟؟؟؟؟؟؟؟؟؟؟؟؟؟؟؟؟
ليه ما تستغل ارتباك المنافس .؟؟؟؟؟؟؟ المدرب مايشوف اللي نشوفه ؟ كابتن الفريق مايشوف ارتباك المنافس ؟؟
الفريق الياباني ماكان عنده شي ولا كان يقدر يبني هجمه حتى لاعبين مرتبكين .. يلعب على اخطائك حتى المرتدات اللي انت متخوف منها وحاسب حساب هدف بهدفين عشانها .. ماسنحت لهم ولا فرصه مهاجمهم عمره 36 ي الله انه يقدر يسوي كنترول ع الكوره لاعب واحد ورى كان يقدر يغطيه ويغطي اي مرتده ..
لو اندفع الفريق وتجاهل مسألة الهدف اللي بيتسجل عليه فزنا 5 اقل شي بس ضاعات المباراه وضاع وقتها كله من التهدئه وايضا من اللعب العرضي اللي ابثرنا فيه الكابتن
كاريلو كان مفترض يلعب جناح وفييتو وسط وماريغا مهاجم .. لو لعب الفريق ب الثلاثي الاجنبي مع جانغ فزنا 9 مو 1-1
مع الاسف بطولات سهله تتعب فيها وتضيع بطولات اخرى عشانها واخر شي توصل النهائي تلعبه وانت ماتعرف وش تبغى ؟ تبغى تفوز تبغى تعادل تبغى تخسر .؟؟؟؟
نجي ل اهم نقطه وهو المهاجم ذا اللي تحت اللي حرام انه يكون معوض لطيب الذكر قوميز
مميزات ايغالو في وجهة نظري هي كالتالي :-
1- انا ماعمري شفت مهاجم ينخش بين المدافعين و ينتظر الكوره توصل له !!
2- ماعمري شفت مهاجم يحظن ع كورته في الوقت اللي مفروض انه يلعبها من لمسه !!
3 مهاجم برغم طول قامته مستحيل تستفيد منه في الكرات الهوائيه ليه .؟؟ لانه يخاف !!
4- مهاجم ضعيف في قراءة اللعب واللاعب اللي بيمرر له وبيعتمد عليه في لعبه ثانيه يحلم انه يرجعها له !!
5- انانــــــــــــــــــــــــــــــــــــــــــي !!
6- يسدد الكثيرر من الكرات ف التمارين بس تجي المباراه اتحدى تشوف له هدف من تسديداته !!
7- مستحيل تشوف له لقطه يطلب فيها كوره ورى الدفاعات !!
8- مايضغـط على المدافعين و لا على حتى محاور الفريق المنافس
9- مستحيل تلقاه امام المرمى في اهم الكرات او العرضيات وا لدليل هدف سالم الدوسري
10- بطئي في اتخاذ القرار الصح
مستعد اوصلها 20 ولحد ينبرش علي يقول لاعب مانشستر ومدري وش ... قوميز مالعب في مانسيتر ومع ذلك افضل منه ب 10000 مره
وحتى الحمدان وماريغا اقسم بالله بيفرقون معنا افضل واكثر منه
اختصاراً للكلام اللي فوق واللي باقي بقوله لاني طفشت وتعبت
دياز وطاقمه اوت نهاية الموسم
ايغالو اوت نهاية الموسم وحبذا من الحين
كويلار اذا ماتقدر تجيب افضل منه ولاعب بمميزات لعب هجوميه خليه
فييتو اوت وشكراً على كاس العالم مع ايماني التام بأنه كان بيفيدنا في لقاء اوراوا لو لعب
ميشيل < اوت اوت اوت .. لقطاته وهو يراوغ ويتحرك تجيب الهم وتوحي لك بأنك ماراح تحقق شي لان جميع مراوغاته ما استفدنا منها شي ابد سوا سلكان الهدف ف الذهاب
بيريرا < بيع عقده
جانغ جيد واحس قدم كل اللي عنده وينطبق عليه نفس الكلام عن كويلار .. اذا ماتقدر تجيب اسيوي افضل منه خليه
الوحيد اللي اتمنى يبقى هو كاريلو بس واللي رغم الهدف ب الاياب الا ان ادائه وقتاليته تجعلـنا نخجـل من انتقاده
وشكراً ل سامي الجابر اللي جابه لنا
ملاحظه هدف اوارا ف الاياب كان فيه خطأ على سعود عبدالحميد وضعف ف التغطيه ... ليه ترك المدافع يلعبها على راحته لاحد يقول المدافع اطول كان ب امكانه يضايقه
نقطه تخص المعيوف برغم اداء المعيوف الجيد ف الحراسه .. الا اني اتمنى حارس اجنـبي الموسم الجـاي
وكذلك اتمنى يكون دياز اخر مدرب لاتيني يقود الفريق ... لان ولا زمان المدرب اللاتيني .. تحتاج مدربين يشتغلون على الاعداد واللياقه وهي اهم شي في الكره الحديثه وكذلك مدربين اصحاب شخصيه قويه مثل جيسوس
مجاملة اللاعبين ماراح تحقق لك شي .. اللاعب بنفسه يجب ان يحس بالمسؤليه واهمية التي شيرت اللي يرتديه .. فانيلة الهلال ثقيله يجب ان يعرفها ويحس ب اهميتها جميع اللاعبين
وشكرا تعبت مليت باقي ب صدري حكي كثيررررررر
اي مشرف يقدر يغير اسمي ياليت يراسلني
 | 