إقتباس الرسالة الأصلية كتبت بواسطة ابوساري يا أهلا و سهلا أستاذ أيوب.. موضوع جميل و طرح كالعادة راقي .. بالنسبة لي المباراة الأولى ضد الطائي ثم مباراة التعاون لا تعكس المستوى الحقيقي للهلال لأسباب منطقية .. أولها .. إن الفريقين اللي قابلهم الهلال نوعيتهم صعبة على أي فريق وليس الهلال فقط .. الطائي فريق دفاعي بحت .. ماعنده مشكلة يخسر بس بطلعة الروح .. جايب قلبين دفاع يحبهم قلبك و حارس متمكن و أتوقع يكون أفضل حارس بالدوري .. التعاون للأمانة فريق يعتبر من صفوة الأندية من خمس سنوات .. فقط تاريخه مايشفع له يكون ضمن الفرق الكبيرة .. وإلا بالنسبة لي هو أصعب من الشباب و الأهلي و الإتحاد كمستوى جماعي و فردية لاعبين .. فريق يملك توامبا و أميسي و سانتوس و كاسيو و مانويل .. خماسي قارنهم بأي أجانب بأي فريق بالدوري .. حتى بأجانب الهلال و الله من وجهة نظري أفضل .. و تخيل لو هالخماسي معنا بدل أجانبنا الهلال يفرق معه اللاعب المحلي الممتاز جداً .. بل مرات أفضل من الأجنبي .. بالنسبة لبعض النقاط .. نقطة جحفلي .. عني أنا .. أشوف جحفلي كان مميز دفاعياً بالمحور .. بس الناس أحسهم أخذوا صورة و انتهت .. مباراة التعاون كان له أكثر من افتكاك جميل و تغطية في مكانها .. لكن يعيب عليه إنه هجومياً و في بناء الهجمة صفر على الشمال .. مع هذا .. هو أفضل من البليهي بكثير .. البليهي يعتبر قنبلة موقوتة .. انبراشي .. ماتدري متى تمسك معه ينكبك بكرت وإلا ببلنتي.. نقطة ماريقا .. لحد الآن أشوفه كامكانيات فردية ضعيف بالحيل .. و أجزم لك جزم لو يرجع ناصر الشمراني بهالعمر ممكن يأدي أفضل منه .. كنتروله ضعيف .. و تحسه يهابد يمين و يسار و أساساً مايدري وش بيسوي بالكورة .. بس يضيع وقت بالكورة لين يحله ربك .. لكن .. و حط تحت لكن خمس خطوط .. رأسيته غيرت وجهة نظري من ناحية حاسته التهديفية .. ضربته للكورة خلتن أقول إن المركز اللي ممكن يلعب به هو مهاجم صريح .. تجيه الكورة و ينهيها .. يستقبل العرضيات و يطلع عليهن.. خاصة جسمه يساعده بالالتحامات مع المدافعين .. يقدر يهابد داخل المنطقة و يكسب الكورة و يسدد بدون فلسفة .. نقطة الشهراني و سلمان .. الشهراني و سلمان أتوقع المدرب تعمد مايبدا بهم .. من ثلاث سنوات و هم يلعبون خاصة هالسنة .. سلمان أصلاً الإصابات ماتبي شيء معه .. أما الشهراني فانكرف كرف المسكين .. و مركزه مركز مجهود .. طالع نازل مع الهجمات .. فأتوقع المدرب يفكر إنه يعطيهم دقايق معدودة بداية الدوري .. بعده تدريجياً يلعبهم مباريات كاملة إذا ريحوا .. بالأخير .. مشكلة الهلال أشوفه بتواجد البليهي + البريك + المعيوف .. ثلاثي من كم سنة و هو يكب عشاك في مباريات مهمة .. ومهب أول مرة المعيوف يستهبل .. كثير لقطات أذكرهن .. حتى طريقة اعتذاره سبحان الله تجيب لك كل الذكريات.. من خماسية روسيا .. لأهداف الاتحاد و النصر الموسم الماضي .. هدف بيتروس و هدف عبدالحميد .. مابين روسيا و الاتحاد .. مباريات كثيرة المعيوف أبدع فيها .. لكن في مباريات كثيرة كان نكبة .. مثل هالحراس ماتآمنهم .. و يخلونك تحت ضغط نفسي كمشاهد و متابع .. الحل؟ الحل مادام عندك ناصر الدوسري لاعب ممكن تخسره لتواجد كمية نجوم بالمحور .. عطيف و سلمان و كنو و كويلار .. أربعة يمسكون أساسي عليه .. فالأفضل تحويله للظهير الأيسر و ارجاع الشهراني لخانته الأصلية و لرجله الأصلية الرجل اليمنى .. مع اعتماد جحفلي و الكوري كأساسيين .. و البليهي و المفرج كاحتياط ..

حياك الله أبا ساري
كعادتك حضور حرفك طاغي
تعليق بمرتبة موضوع و أكثر
تعليقك يؤكد أنك تملك رؤية لكل قضية
و تقدم استقلالية رأيك و بعد نظرك
و اضافت لي الكثير