صديقك من صدقك يا بلجيك من الأعضاء اللي أعتبرهم أصدقاء للمنتدى حتى وأنا ما أعرفك بشكل شخصي ..
لكن لك مواضيع و مداخلات جميلة .. مرات أتفق معها و مرات أختلف معها ..

وأنا راح اكون صادق معك و محايد و بدون أي عاطفة ..

بالنسبة لميليسي .. فوالله العظيم إنه كان زيادة عدد و تكملة و خسارة على مركز أجنبي ..
مجرد لاعب يراكض داخل الملعب كثير البطاقات كثير الهفوات ضعيف في الإفتكاك ضعيف بالتسديد ..
وضيع فرص كانت كفيلة بجلب بطولات لك و بطولات مهمة مثل آسيا بسبب اندفاعه الهجومي الغير مفيد بسبب ضعف مهارته بالتسجيل ..
وأنا أستغرب هالحب الشديد له من الأعضاء على الرغم إنه ماقدم ولا عشرة بالمية مما قدمه رادوي ..
بل لم يكن بمستوى هرماش اللي جاء بعد رادوي ..
لك أن تتخيل أن عطيف اللي أساساً مركزه مهب محور قدم مستوى بالمحور أفضل من هالعاهة .. !
ويوجد بالعالم محاور لو تغمض و تختار عشوائياً راح يكونون أفضل منه ..

كذلك الحال لأسامة هوساوي .. لاعب انتهى و كان سبب نكبات الفريق و المنتخب مؤخراً بسبب فقدانه لأهم عامل يجب أن يتوفر بالمدافع وهي القوة الجسدية و السرعة بسبب عامل السن ..
عندك البليهي و جحفلي حالياً يعتبرون الأفضل محلياً بكل حياد .. وجحفلي ظلموه بعدم ضمه للمونديال و هو أفضل مدافع سعودي السنة اللي راحت بالأرقام و باختيار الهيئة ..


اللي أتفق معك بالموضوع .. هي نقطة اختيار الأجانب .. و كذلك نقطة المعيوف ..
الأجانب لحد الآن غير مقتنع باختيارات المدرب ..
وتكرر نفس الخطأ السابق .. تشيل لاعب طرف مثل سيروتي و تجيب لاعب شبيه له .. وكأنك ماغزيت ..
تبقي على بن شرقي لحد الآن وأنت عندك ثلاث لاعبين سعوديين بمركزه..
على الرغم من موهبته لكنه عجز يتأقلم مع النادي و طريقة لعب الفرق السعودية ..
سالم و العابد و سلمان الفرج كلهم باستطاعتهم يلعبون وسط يسار أفضل من بن شرقي للأمانة ..

أخيراً .. خانة الهجوم مازالت شاغرة و ناقصة .. خربين مهب مهاجم صريح ..
وحتى لو هو مهاجم صريح فلا يوجد له بديل ! .. من بديل خربين في حالة إصابته؟ وخربين صار يخوف من كثرة إصاباته ..

الحل كان بسيط جداً حتى بدون دعم الهيئة و توجههم لدعم الإتحاد و النصر لتنويع البطل كما هي عادة المسؤولين عندنا مايبون فريق جماهيري يختفي عن المنافسة فترة طويلة كتسويق للدوري و قوته ..
وللأسف سامي كان ضحية للمرة الثانية .. يوم كان مدرب عملوا المستحيل ليكسب النصر الدوري .. وسبق وذكرتها بردود سابقة ..
والآن أصبح رئيس .. وشف الدعم للفرق الثانية و قارنها بدعم الهيئة للهلال ! ..
اسقاط ديون بمئات الملايين و جلب أجانب بعشرات الملايين لتلك الأندية ..
بينما الهلال منسي ! ..

سامي إداري ممتاز و قادر على زيادة الاحترافية بالنادي .. لكن من دون دعم و بنفس الوقت دعم الأندية الأخرى راح يكون موسمه صعب محلياً .. لكن آسيويا كان المفترض يكون فيه عمل على الجوانب اللي فيها نقص ..

لو أحضر مهاجم من مهاجمي المونديال كالروسي ارتيم دزوبا اللي أثبت نفسه ..
ولو اتجهت بوصلة الهلال لنجم بالميرس البرازيلي دودو ودفعت فيه اللي يطلب كصانع لعب ..
كان الآن أعظم مشاكل الهلال بالتسجيل و الصناعة انتهت ..


لكن ننتظر إلى نهاية الصيفية .. كل تأخيرة فيها خيرة إن شاء الله ..