|
مشكلة الهلال الهجومية ( العقم ) والحل
السلام عليكم ..
كلنا شفنا الهلال في هالموسم اللي اعتبره اسوأ من سابقه , شاهدنا هلال ( ضعيف ) ( غير ممتع ) ( سهل )
نعم وصل نهائي اسيا نعم وصل نهائي الكاس .. لكن كلنا ندري انه تأهل بمستوى - اي كلام - نادرً نشاهد تكتيك داخل الملعب .. اذا وصلت النهائي بمستوى سيئ هذا يعني ان الطرف الاخر وصله بمستوى أفضل واخرج فرق اقوى من اللي قابلتها
لا نخدع بعض ونقول سبب الموسم السيء هو نهائي اسيا .. عفواً من قبل نهائي اسيا والهلال ماهو الهلال
المباريات اللي فاز فيها الهلال بمستوى مرضي تنعد على الاصابع هذا الموسم .. مباراة السد ذهاباً 1-0 و ومباراة العين 3-0 .. مباراة سيدني ذهاب واياب ( قدم فيها مستوى ممتاز ) لكن الحظ لم يحالف ..
مباراة الاياب مع سيدني اغلب الفريق قدم مستوى ماعدا اللاعب الوحيد اللي خذلنا بالذهاب والاياب اللي هو ناصر الشمراني .. وانا من زمان وانا انتقد فيه والجمهور يطبّل له وانا قلت الجمهور ماراح يعترف ان ناصر منتهي الا اذا ضيع انفرادة في نهائي .. وفعلاً كلنا شفنا وش سوا بالنهائي مع الاهلي والحمدلله ان مستواه انفضح ..
مشاكل الهلال كثيره منها خارج الملعب وداخله لكن في هالموضوع ماراح اتكلم الا على المشاكل الفنية اللي انا اشوفها واضحه ولو تفكرون فيها بتجدون ان كلامي صحيح
الهلال يعاني هجومياً بشكل كبير .. قدام الفرق المنافسة يلعب وكأنه فريق صغير ومايقدر يهاجم .. واذا خطف هدف يدافع لين يلقم
اللاعبين ماعندهم حلول احيانا تحس فيهم كمية غباء داخل الملعب ماعندك لاعبين وسط عليهم القيمة يوصلون الكرة بشكل ممتاز للمهاجمين .. ولهالسبب ساماراس نشوفه بالغالب يرجع ورا ويستلم كورة .. لانه غاسل يده من اللي وراه!
اول خطوات التصحيح ابعاد كم لاعب منتهي زي ناصر الشمراني اما الشهراني لازم يقعد عالدكة لأن له سبب بالعقم الهجومي اللي صاير ..
بنهاية الموسم الاستغناء عن احد قلوب الدفاع اما كواك او ديغاو .. والتعاقد مع محور هجومي وجناح سريع ومهاري (اجانب) واستبدال نيفيز بصانع لعب اذا استمر مستواه بانخفاض.
التشكيلة اللي اتمنى اشوفها بالموسم القادم
شراحيلي
الزوري - ديغاو - جحفلي - درويش
عطيف- (اجنبي)
العابد (اجنبي) (اجنبي)
الكعبي او القحطاني
الاحتياط : سالم الدوسري, الشمراني, كريري, ياسر الشهراني, السديري ,
فريق جديد هجومي + احتياط قوي ..
بهالطريقة بترجع قوة الهلال الهجومية ممكن يضعف الدفاع بس بيكون فيه توازن بين الدفاع والهجوم وبتشوفون فريق ممتع .. اللي يقول عندنا افضل محليين فهو يضحك على نفسه
انا كنت اطالب بهلال قوي دفاعياً لكن مو لدرجة العقم الهجومي! فريقنا مايليق فيه الا الهجوم القوي الكاسح .. مانبي اسيا عمرها ماجات الاهم مانغيب عن البطولات
 | 