خيبه ، أبلغ كلمه أقدر أوصف فيها المستويات الأخيره الحاصله للفريق .. صحيح تشلسي معودنا بالدروب بكل موسم بعد بدايه مميزه بس ها المره طولت وغير كذا ممكن تكلفنا أشياء كثيره أهمها الخروج من بطولة الأبطال .. بطل أوربا قاب قوسين من خروج مر والأسباب ؟ الأمل موجود بالتأهل لكن نحتاج إلى معجزه ، فرصتنا الوحيده معلقه على فوز شاختار فقط لا غير ، وشاختار قدها إن شاء الله بس نتكلم عن اليوفي هل ب يسلم المباراه ب سهوله ؟ كأقل تقدير خروجهم بالتعادل يعتبر فوز كون التعادل يخدمهم ويخدم شاختار بنفس الوقت .. الضغوط كلها موجهه ل تشلسي ، م أبي تخاذل من الاعبين ف المباراه الأخيره ، قدمنا مستويات مخيبه جداً والمجموعه م خدمتنا كثير لكن فوز وقدم الي عندك وإفرض نفسك ثانياً وإترك الباقي ل القدر ، إن شاء ربك فاز شاختار على اليوفي وتأهلنا ل دور ال 16 ، وإن شاء ربك غير ذلك ، ف الحمد لله على كل حال

مباراه خارج أرضك ، أمام فريق منسجم على جميع الخطوط ، وعنده الرغبه ل العوده بقوه على المستوى الأوربي ، طبيعي تفكيرك أولاً الخروج بالتعادل وهذا الي سواه ماتيو ودخل ب تشكيله واقعيه جداً ويشكر عليها ، ركنه ل توريس السيئ ، وإعتماد 5-2-3 ف حالة الدفاع وفي حاله الهجوم التحول ل 4-3-3 ، وإعتماده ب شكل أكبر على المرتدات وضرب دفاعات اليوفي ب السرعه عند هازارد أو رامي أو ب مهارة أوسكار أو ماتا ، تحقق المطلوب وطلعنا ب 3 فرص محققه ل التسجيل لكل من الثلاثي الخطير ماتا ، هازارد ، أوسكار لكن عابهم الفينيش الي كان غايب ، تسجيل أحد هذه الثلاث فرص ممكن تغير مجريات المباراه 180 درجه ، بس كالعاده إن م سجلت ب يتسجل عليك وهذا الي حصل ، سوء تغطيه من المحور أعطت أريحيه ل التسديد على تشيك ، وتغيير إتجاه الكره ساعد كثير اليوفي بتسجيل أول الأهداف ..

بالشوط الثاني تعامل بطل برضو من ماتيو ب سحب أزبي ورجوع إيفانو ل منطقه الظهير واللعب ب 4-2-1-3 ، لكن هدف ثاني قتل كل الأمال بالرجوع للمباراه وتعديل النتيجه .. وبرضو الملام رقم واحد المحور الي صار مكشوف لأي خصم يلعب قدامنا ، ميكيل أو رامي جيدين لكن محتاجين ل ساتر يغطي عنهم المساحات الي يخلفونها وراهم .. وهنا تندم حظك يوم تفرط ب الوشم أو بالدبابه إيسيان .. رجع ماتيو وتعامل ب شكل سليم وسحب المحور وأدخل ورقه هجوميه ، ولو إنها جات من نصيب الميت توريس لكن الدكه عندك تجبرك تلعبه ! أنت خسران خسران ، إلعب بالي عندك إن جات تتعادل ولا أنت مهزوم بكل الحالتين .. بس تعامل اليوفي مع المباراه جيد جداً ، فريق عرف كيف يطلع ب النقاط الثلاثه من بطل أوربا ويستحقها على مستواه البطل جداً ، وكملو تتويج المستوى بالثالث الي كان متوقع نظراً ل المساحات الي خلفها تشلسي وراه ل تقدمه لإدراك التعادل ..

الأغلبيه يلوم المدرب ، والبعض أيضاً شال الدنيا وحطها عشان غلطة تشيك بالهدف الثالث .. مع إحترامي لك إذا ب تنتقد تشيك م عندك سالفه ، تيري / لامبارد / تشيك مهما أخطئو ف هم معذورين لأنهم قدمو للنادي الشي الكثير .. ماتيو لو عنده محور صاحي وعنده مهاجم يسجلك من أنصاف الفرص م كان شفنا كل ها الإنتقادات الي عليه .. الكلام الحين على أبو خليل هل هو ب يصبر للشتويه ويدعم له الفريق ولا يشيل راسه قبل ذلك ! ، حالة المحور عندنا ذكرتني بأيام سونق مع أرسنال ، ميكيل حالياً حاله حال سونق سابقاً ، يتقدم ويترك وراه مساحات .. صحيح سونق منه فايده ويصنع ويبرد قلبك ، بس ميكيل تقدمه من عدمه .. صح إني أحبك ي خالي بس معليش مستواك مؤخراً صاير لا يطاق ، تقدمك المبالغ فيه ماله مبرر ، سوء تغطيتك ل القادمين من الخلف أو الي يسددون من خارج المنطقه .. ف كلتا الحالين حنا جالسين ندفع ضريبة تخلينا عن الوشم وإيسيان زي م ذكرت سابقاً .. وضعية تشلسي الحاليه الي يلعب فيها محتاج ل محور وحش ياكل الأخضر واليابس ..

هذا م لدي ، ولي عوده لاحقاً ، هاردلكم الهزيمه المره ي عشاق الفخر ق1