السلام عليكم ورحمة الله وبركاته

صباح الخير يالمجلساوويه , من زماااان عنكم
لكن كلها اسبوعين وارجع ابثركم

قصة القصيده اني انا واختي اللي اكبر من بسنيتن يمكن
يوم اننا صغار دايم مع بعض يعني أخوان وأصدقاء بنفس الوقت < لا ياشيخ

المهم البنت تزوجت وراحت القصيم

وكتبت لها قصيده طبعا هي متزوجه من زمان بس توني افكر اكتب < مالت عليك


ياختي تراني من غيابك تأذيت
وينك تداوين الجروح القديمه

بَعْدِك ليا من جاني الليل سجيت
أتذكر أيامن مضت يالحليمه

أذكر لقافتنا على الكل بالبيت
وأتذكر الفلفل بوقت الشتيمه

وإليا زعلنا ترك البيت ونهِيت
ونقول ما نرجع لأنها ظليمه

وليا وصلت الباب هديت هديت
وانتي تقولي فكرتك ذي سليمه

ياما تهاوشنا وياما لك ارضيت
وياما عطيتيني مقالب أليمه

وياما نصحتيني ليا من زليت
كأنك على ماقيل أم (ن) رحيمه

ياختي احبك قلتها حي او ميت
وأدعي إلهي حبنا ذا يديمه



وهذا رد اختي

ياخوي تجاعيد الزمن والغربه
تلعب على اوتار بعد والعمر شاهد

يابراهيم حمام القصيد ان طارلك سربه
فدوة عيونك الحمام واحد ورى واحد

يابرهوم ويا .... للوله ضربه
توجع تفاصيل ليلن للفرح طارد

متى التقي بك وانا بقربك وقربه
حضنك ياخوي يلملم خاطر الشارد


طبعا هالشطر يابرهوم ويا .... للوله ضربه
تم تشفير الدلع

طبعا قصة الفلفل بقصديتي اذكر الماما الله يهديها اذا شاغبنا توكلنا فلفل
للحين اذكر اشكالنا وحنا واقفين بالدور ننتظر الفلفل

وانتظروني قريبا هجاء في جابر العثرات وحاليا اسمه مستر ايمن

فمان الله