السلام عليكم ورحمة الله وبركاته
يالله انك تحيين انا والربع الي يقرون
لاحاطتكم علما اخبركم
باني بعد ما قدمت القصه لاحد حطمن وقال وش القصه ذي احلت الاوراق بالزباله , الله يتسرمكم
انا الصراحه ان القصه كانت كبيره بعيني وقلت والله ما احلته , بكمله وبالعامي بعد
ما يستفاد من المكتوب فالاعلى اني بكمل باللهجه العاميه القصيميه
وتقديرا مني وراعاة لشعوركم << اقول لا يكثر , عدلت بعض المصلحات الى مصلحات مفهومه للجميع
بسم الله
عرفنا ان سوسو ما كان يتكلم عربي اطلاقا , لكن بعد مرور الايام صار يعرف شوي من الكلمات , يعني صار التفاهم بينه وبين الشايب ابو صالح سهل وصار كل واحد يفهم للثاني .
ابو صالح جاه مرض والزمه مصاحبت الفراش , كانت الزياراة تتوالى على مزرعة الشيخ ابو صالح , وسوسو ما قصر بالخدمه , قهاوي وعلوم ارجال ويقرب التمر للضيف ويقوله (اقدأ) يعني اقدع .
اشتد مرض ابو صالح ومنع ابناء ابو صالح الناس من زيارة ابوهم , لانه موب ناقص ازعاج .
اشتد مرض ابو صالح في احد الليالي الي كان منفرد فيها مع العامل سوسو , وطلب من سوسو انه يكلم الاسعاف , سوسو فهم كلام الشايب بالاشارات وحركات يده, ولما جاء سوسو بيسال ابو صالح اغمي على ابو صالح .
سوسو ما يعرف رقم الاسعاف , ولا يعرف يسوق ددسن ( الونيت ) ابو صالح .
بعد ما جلس سوسو مع نفسه , وبعد العصف الذهني ما لقى الا حل واحد , سوسو استخدم هذا الحل لان الوقت يحتاج تصرف سريع ولا ممكن يصيب ابو صالح شيء ما ينتظرونه ابناؤه .
بعدما نتهت جميع افكار سوسو قرر انه ينفذ الحل هذا وخلاص .
1-جاب العربه الخضراء الصغيره الي ينقلون عليها البرسيم والعلف .
2- جاب اضخم ثور بالمزرعه .
3- حبل قوي .
ربط العربه بالثور وضع ابو صالح بالعربه , لحظه بسيطه لهى سوسو عن الثور .
الثور شغل التيربو ودعس الفرامل والبنزين على اقوى شيء وفك الفرامل , وينطلق بسرعته القصوى نحو جدار المزرعه سوسو عجز يصدق , لانه ان صدم الثور الجدار فعلى ابو صالح السلام , بعد ما انطلق الثور من شبكه اتجه للباب ضرب بعض الخشب الي جوا الشبك , بما ان الثور ضخم وثقيل تمكن سوسو من اللحاق بالثثور .
مسك سوسو طرف الحبل على انه بقدر يوقف الثور , لكن ما فيه . . . الثور خلاص صافط الطبلون كله وفصل بعد .
ما بقى قشعه او جذع او رشاش ماء او حوض او نخله او شجره ما صدمت سوسو .
سوسو راح وطي خلاص انتهت طاقته ليتحمل انه يمسك بالحبل , لكن الي خلا سوسو متمسك للحين خوفه على الشايب .
وانواع المطامر . . . (( يعني يروح فوق بعدين يجي صاروخ على الارض دردب))
بعد ما جلسو 3-5 دقايق في المعركه .
صك وجه الثور في جدار المزرعه بسبب الظلام وانشق راسه ودخلن قرونه في راسه وتقطع اشلاء بعد الحادث الشنيع .
لكن وش صار عل سوسو .
بعد ما صدم الثور الجدار فقد سوسو الامل بان يبقى الشيخ حي .
سوسو من قوة الصدمه طار فوق وصقع الجدار وانكسرت يده وانشق راسه وما بقى عليه ملابس الا شوي يغطى ما يطلب تغطيته .
عز الله الي اجتمعت كل المصايب عليك يا سويس , انت تكسرت والثور الوحيد مات والشايب وش صار عليه يعني ؟؟؟
سوسو قال لا عادت على الي يهتم بالشيبان . . . . . . . . . وما يشعر بنفسه الا هو كد نااااااااااااااام.
ويصحي على هواش كفيله ولد الشايب بد ما وجه لسوسو كف طازج من الكيس الى الفم
سوسو من الروعه راح ضم كفيله , طبعا مع حمقة كفيله يجي ويضمه بعد , اخذ كفيله اقرب خشبه على الارض . . . وليته ما اخذها , كانت خشبه عريضه مطقوق فيها مسامير .
للمره الثانيه يتوسد سوسو بطن الثور بعد ما وجه له ضربه خارق مع قليل من بهارات المسامير وشوي من الغبار , كذا تكون احلى دوخه .
يصحي سوسو على حرارة شمس الظهر وكان تحته الثور الي مايت , وكان يحس وجهه يتشقق من الدماء الجافه .
بعدما استوى واقف بدا يتابع كيف وصل لسور المزرعه الكبيره هذي وهو كن في بدايتها .
ثور منجطل على الارض بدون راس , وعربه رايحه وطي متكسره , ويد سوسو متورمه مره و وجهه كله جروح من مسامير الخشبه الي ذاقها قبل ينوم النومه الثانيه .
لكن لحظه . . . . . . . . . . الشايب وينه راح ؟؟؟؟
ما فيه اثر شايب هنا ولا قريب . . . . . آها ممكن كفيل سوسو اخذه معه للمستشفى بعد ما جاء الفجر .

إقتباس اتجه للباب ضرب بعض الخشب الي جوا الشبك

^^^^^^^^
تذكرون هذي
من ذيك اللحظه طاح الشايب من العربه يعني الشايب بكل خير وسلامه مجرد كسر باحد اصابع ايدينه .
سوسو بعد ما ارتاح وعرف ان الشايب ما جاه شيء اغمي عليه لان طاقته انتهت خلااااااااااص .
أخذ بسوسو للمستشفى قبل ما يخلص دمه من كثر جروحه .
الاكمال في الجزء القادم وهو الاخير وبتعرفون الهدف من القصه .
يالله تمسون على خير