مرحبا بالجميع مرة ثالثة ..

أشوف الرمي زاد والله يستر لا يجيني شيء في هاللقاء

والله يا فيه ناس ودي أطلع لهم مع الشاشة مثل هذا ..

المهم نرجع للأسئلة وبسم الله نبدأ ..


بو وليد
هلا والله براعي البالتوك ..بس من اللي علمك باللقاء ..

إقتباس عندي لك ثلاث اسئلة ;)

خذ راحتك باللي تبي ..

إقتباس الاول: بما انك المشرف هنيا من اكثر الاعضاء ودك تحذف ردوده بس ما تقدر لانها ما تعدت قوانين المنتدى؟

ما يبي لها كلام ذي .. عندك كيفي كويتية وحبي تيماوي وما شاء الله بعد الفيروسة

ولا يهون اللي يبي اسم أمي ..

إقتباس الثاني: المجلس العام كثيراً ما يعاني من فترات ركود وقلة مشاركات!! الى ماذا تعزو هذا الامر ومالحلول برأيك؟؟

لو أملك معرفة السسب والحلول زينتها .. لكن من جد ما أدري وش المشكلة ..

عاد لو تاخذ أي جولة في أي منتدى في النت - تعرفه من قبل - تلقاه أقل من المستوى السابق !! ما أدري ليه مستوى المنتديات كلها تقريباً قل بدرجة كبيرة ..!!!!


ألف شكر لك يا أخوي على المشاركة وبالفعل شرفتنا يالغالي ..



فتى القصيم
هلا والله بك يا ولد ديرتنا ..

تصدق ودي عاد أنقزك على باقي الشباب بس خفت يقولون واسطة .. <----- الله من وسع الوجه

إقتباس - ايهن ازين: نوم الشرقية ولا نوم الرياض <<<=== الله من زين السؤال

شف عاد .. النوم الشيء الوحيد اللي ما يحكمه مكان محدد !! بس بشرط تكون والفت المكان ..

إقتباس 2- اذا انت راكب موترك ومتوجه ناحية خط القصيم.. من اي محطة تعبي واذا وقفت عند البقالة وش تشري

يوه شكلك من حقين منول اللي لازم يوقفون ويغير زيت ويشيك على الكفرات ويعبي بنزين في أول محطة ..!! ما أدري ليه ما يضبط أموره من بدري ..

لكن عاد تصدق إن الواحد يرتبط بمحطه معينة وتلقاه دايم يمرها عندك مثلاً " خط القصيم " و " فيحاء العتش " و الحين طايح في اللي فيها كفي شوب أظن اسمها البساتين ..

عاد وش تشتري .. مايبي لها كلام نفرين بخاري مع الدجاج ..

إقتباس 3- لو فزت بجائزة مقدارها مليون ريال وش بتسويبها

بصرفها ريالات وأعطيك إياها عشان تعدها ..

إقتباس 4- وش رايك بظاهرة سرقة الجوالات؟؟

أنصحك إنك تتركها لأنها ما توكل عيش إن بغيت تسرق عليك بالذهب تراه مربح ..

إقتباس 5- وش رايك بصالح النعيمة <<<== طراه الرقم

الله يذكره بالخير .. من اللاعبين القلائل اللي تحس إنه يحترم الشعار اللي يلبسه ويحترق عشانه ..

لكن عاد يوم قال إن العين هو الزعيم .. اعتبرها كبوة ..

إقتباس 6- وش رايك بخالد عزيز <<<=== بعد طراه الرقم

عكس اللي قلته في اللي قبل ..

من جد خالد عزيز الموسم قبل الماضي وأول الموسم الماضي من أفل اللاعبين في الهلال .. لكن من نصف الموسم اللي فات وهو ما أدري وش جاه ..!! حتى إن مستواه انحدر انحدار لدرجة إنه انقلب ..

إقتباس 7- لو عندك طالب بالفصل جيد.. وانت معجب بمستوى هالطالب ودايم تقول لزملائه صيروا زيه.. بالصدفة اكتشفت ان الطالب هذا نصراوي ومتعصب بعد.. كيف بتكون نظرتك له..

تصدق عاد .. من أفضل الطلاب اللي مروا عليّ نصراوي !! صح إني حاولت اقلبه هلالي لكن ماش ..

بس يظل أفضل طالب مر عليّ حتى الآن وله منزلة كبيرة في قلبي وكم تمنيت أن بحثت عن طريقة للتواصل معه فهو تخرج من عندنا وأنا نقلت في نفس السنة .. والله يذكره بالخير ويوفقه دنيا وآخره ويحرسه من العين ..فالطالب اللي يدرس (( للعلم )) ثم المستوى يندر وجوده في هذا الزمن ..!!

إقتباس 8- عندكم دوري بالمدرسة.. وكل رائد فصل مسؤول عن فريقه.. ومن القراده حطوا الطقم حق فصلكم اصفر وازرق وش شعورك بهااللحظة

على قوسيتي .. وماهوب على كيفهم ..

إقتباس 9- انت رايح لم علي الدحيم تبي تشري شماغ للعيد.. وفجأة توقف ذيك الفياقرا وينزل منها منصور البلوي ومحمد نور وعبدالله فوال وجبرتي الشمراني علشان يتقضون.. كيف بيكون موقفك وتبي تعزمهم ولا لا

علي الدحيم .. الله يذكره بالخير ..

اما موقفي .. فهو والله بقولهم ترى بنده أرخص .. وأكيد إني بعزمهم عند مطعم النور ..

إقتباس 10- ماذا تعني لك المصطلحات التالية:

البدائع / ديرة الاهل والأجداد هي الماضي والحاضر والمستقبل ..

البروستد / البيك ..وغيره لا تسميه بروستد ..

فصفص باجه الرطب / عاد ترى الفصفص بأنواعه مانيب راعيه وتاصل لدرجة إني ما أحبه ..

تفتيش ام سدره / امش 100 قبل ما تاصلهم بـ12 كيلو ويمكن تسلم

علي يزيد / أحسن واحد يخلفهم برقم 9 ..


وشرفت ولا كلفت .. ولا عمرك تعودها ..



معذبهم

يا هلا والله بك يالغالي ..

إقتباس ضيف المجلس العام اليوم شخص مميز .. بكل تـأكيــد .. اسم من الابداع .. قلمه دائماً صريح .. ردودهـ في قمة الروعة .. منيب مطول عليك داري انك تقول اخلص علينا

اولاً أشكرك على كلامك الحلو وهذا والله من طيب معدنك يالغالي ..والله يعطيك العافية ..

ثانياً مانيب قايل لك اخلص .!! بالعكس كثر من مدحي ولا تسأل ..

إقتباس 1- بما أنـك مـدرس .. وفي ظل الاختبارات هل كشفت احد الطلاب وهو يغش ؟

التفات .. يحاول يقز اللي بجنبه .. مسوي فيها ذهين .. كل ذولي مرت علي .. لكن عاد براشيم أو شيء كذا .. لا !!

تراني مرعب لو شفت ..

إقتباس 2- نصيحة لمعذبهم ؟ بدون مجاملات ..

ما شاء ا لله .. أنت اللي مفروض ينصحنا ..
لكن لو تكثر من تواجدك في المواضيع .. يعني تكتب مواضيع أكثر كان يا سلام ..لأنك بكل صراحة قلم مميز وله نكهة خاصة ..

إقتباس 3- ماهي قصتك مع شبكة الزعيم من البداية الى وصولك للاشراف ؟

إيييه كقصة طويلة !!كنت ذاك الوقت ما أدري وش السالفة ومشكلتنا إن فيه ناس تزين لك كل شيء ..

<---- انت قلت قصتك مع المخدرات وإلا الزعيم ..

والله عاد كانت البداية إني في شهر رمضان ( يوافق أواخر عام 2000 ) قال لي واحد من الأقارب إن فيه منتدى خاص بالهلال وأخباره ولهم تغطيات خاصة وإنهم بحاجة لواحد يغطي لهم في الشرقية .. انا قلت ما عندي مانع أهم شيء نخدم الهلال ..
طبعا انتظرت لبعد العيد يوم رجعت للشرقية بداية الدوام سويت بحث لشبكة الزعيم ولقيتها وسجلت باسم البارق صار رايح زودت 2000 لأني مرتبط بالاسم ذا في منتدى آخر .. وتم قبول تسجيلي ..

عاد جلست لي فترة طويلة عشان يتفعل اليوزر .. وبعد ما تفعل كنت أشارك في منتدى الجمهور كردود ( وما كان فيه الا ذاك المنتدى ) بعدها افتتح منتديات أخرى هي الكمبيوتر والعام والرياضة العالمية ..وأنا مستمر بالمشاركة في الجمهور فقط ..

حتى بدأت بكتابة موضوع ( احلى كاريكاتير لأحلى صباح ) كل يوم قبل الدوام .. وكنت أكتبه بمنتدى الجمهور .. وكان الهدف إن الجماهير تشاهد لها كم كاريكاتير في الصباح .. المشكلة كنت إذا رجعت من الدوام ألقى الموضوع منقول للمنتدى العام .. وأنا ما أدري وش السالفة

حتى أرسل لي المشرف ذاك الوقت ( أبو ناصر ) الله يذكره بكل خير يطلب إني أنزل الموضوع في المجلس العام مباشرة ..انا قلت له طيب خل الموضوع إلى الظهر في الجمهور بعدين انقله .. لكن أبو ناصر إلى اليوم مارد علي ..

ومشيت على رأيه وبديت اكتبه في العام .. عاد لقيت شله في المجلس العام إنما إيه كأنهم أسرة واحدة ..

استمريت في المشاركة في ذلك الموضوع بشكل يومي إلا في شهر رمضان أتوقف ..

حصل ما حصل من انسحاب لبعض المشرفين من ضمنهم مشرفي المجلس العام في رمضان عام 2002 وكنت في نهاية الأسبوع في الرياض.. وقبل المغرب بعشرين دقيقة تقريباً كلمني واحد قال لي إنه سلمان العنقري .. طبعا أنا ما صدقت انه هو من جد لكني تأكدت إنه هو .. وعرض علي فكرة الإشراف .. شرحت له جميع الظروف وقال لي إنها ماهيب مشكلة .. وقال إن معك أبو سليمان وحبي تيماوي .. وهذا اللي خلاني أوافق خصوصا في ذلك الوقت الحرج .. والحمد لله عدت ذيك المرحلة على خير ..

إقتباس 4- بحكم إشرافك في شبكة الزعيم ماهو سر غياب الكثير من الاعضاء المميزين والمشرفين وعلى رأسهم ابوهيا وسلمان( أبوالتسعات ) والاعصار .. ؟

أغلبهم لظروف عمل أو اشغال خاصة ..

عاد تراهم شيبان .. يعني المفروض يتركون المجال لأحفادهم ..

بس من جد .. والله لهم وحشة ووحشة كبيرة بعد ..

إقتباس اتـمـنى اني اكون خفيف عليك بهذه الاسئلة ..

إيه هذا الخف ماهوب خف حبي تيماوي ..

شرفتنا يالغالي .. وألف شكر لك على هذه المشاركة ..



ريفيلينو

يا هلا والله بأبو شنب .. وأطلق شنب عرفته الملاعب السعودية ..

إقتباس اول هاااااااااااام : انا ارسلت لك ع الخاص اهنيك بعيد الفطر...... ليه ما رديت علي؟؟؟ <== منقهر وشايلها

هههههههه ما دريت غنك مثل البعير ما تنسى ..
والله يالغالي ماهوب حقران لك ولا لغيرك .. لكن المشكلة في مثل هالمناسبات يكون الدخول للنت محدود جداً .. وبحكم الإشراف بيكون الدخول لقراءة المواضيع أهم شيء والمشكلة إن التهاني تكون كثيرة جداً وما يمديني ألحق عليها .. وصعبة ارد على ناس واترك غيرهم .. فأتركهم كلهم ..
وأنا معترف إني مقصر جداً من ناحية التهاني في المناسبات وكذلك الرد على المهنئين ..

إقتباس ثاني سؤاااااااال : اذا اضطريت تغيب عن النت كم يوم، لأي سبب - طالع كشته مثلا - وش شعوك وانت بعيد؟؟ وهل أول ما توصل البيت تروح تشيك النت؟

بكل صراحة .. إيه ..
المشكلة في الزعيم كل ما تغيب تتذكرها وتفكر فيها أكثر ..

إقتباس ثالث سعاااااااااااااال : المجلس العام ومع وجود كذا مشرف، هل حسيت يوم بالقهر من تصرف واحد منهم - مثلا حذف او تثبيت موضوع - ووش ردة فعلك؟

الحمد لله تواجدت مع مشرفين يتمناهم أي منتدى .. ودرجة التفاهم كبيرة جداً بيننا ..ولله الحمد ما قد مر عليّ مثل الموقف اللي تقول ..
عاد لو كان الجواب نعم .. هل تتوقع أنه من المصلحة إني اجاوبك هنا لأنها - إن حصلت - بتكون بيني وبين المشرف سواء بالهاتف أو الرسايل الخاصة أو حاقه تانية ..

إقتباس رابع استفسار : ليش ما تقترح على الادارة يخلونا نشوف " المتواجدون الآن " <== شفت الشفاحه واللقافه.

ههههههههههههههههههههههههه
تصدق عاد إنها تونس <---- بيزيده قهر ..

إقتباس وأخيرا وليس آخراً ........... عيدك مبارك ومبروك ما جاك؟ <== مدري

مانيب راد عليك عشان ما يقول أحد ليه ترد على ريفيلينو بس ..

ألف شكر لك يالغالي .. وشرفتنا بالموضوع ..



مرسول الهلال

يا هلا والله بك أخوي الغالي ..

إقتباس المنتدى اللي كنت تبي تسجل فيه اسمه : البارق قصدي اسم المنتدى موب اسمك

والله ما أدري هل فيه منتدى اسمه البارق أو لا ..؟!!

انا أقصد اسمي اللي سجلت في في منتدى قبل الزعيم كان : البارق ..


شاكر ومقدر مشاركتك وتشريفك ..


القاضي

أهلا ومرحبا بأبي عبدالله ..إنه لشرف كبير أن أرى هذا المعرف من ضمن المشاركين في اللقاء ..

إقتباس لا أنفك أحتفظ في القلب باحترامٍ و تقديرٍ لحبيبنا في الله البارق. أسجل هنا ترحيباً حاراً به و قد كنت أرتقب هذا اللقاء منذ زمن حتى أرى أجوبته ذات النكهة البارقية عن أسئلة الأخوة الاعضاء.

جزاك الله خيراً على هذه الكلمات .. وصدقني أنني متأكد أن كل من يعرف القاضي أو يتابع كتاباته لا يرى فيه إلا كل خير.. وتجده مجبوراً على امتلاك الاحترام لهذا الشخص ..

صدقني أن لك في القلب مكانه لا يعلمها إلا الخالق ..

إقتباس أذكر أن أول رسالة خاصةٍ أرسلتها للبارق - و لم أكن أعرفه إذ ذاك - كانت عتاباً جافاً بعض الشيءعلى تجاوزاتٍ شاهدتها. فأدهشني تفاعله الموضوعي مع رسالتي و لغته الراقية. و كل ما عرفته أكثر وجدته أكثر تسامحاً و صبراً و سعة صدر.

هو أنت تذكر ..
لماذا لم تقل إنه حق لك تأخرنا كثيراً في اعطاؤك إياه ..

إقتباس شكراً للإشراف على هذا اللقاء الممتع و شكراً للبارق على تجشمه عناء الرد على الاسئلة ، و ما أكثرها.

الحين ما دامك تدري عن كثر الأسئلة .. ورى ما تزهّل ببعضها .. على الأقل أسئلة الفيروسة ..

شاكر ومقدر لك مشاركتك أيها الصاحب ...



كيفي كويتية ( 2 )

إقتباس انا ارسلت لك ع الخاص اهنيك بعيد الفطر...... ليه ما رديت علي؟؟؟ انا في اكثر من مناسبة وعطاني اشكل

والله مثل ما قلت للشايب أبو صلعة أقوله لك ..ولكم جميع العذر والسموحة ..


الحاتمي

هلا والله بك يالغالي .. والله يعينك على البنزبن ..

إقتباس بصراحة استاذ / بارق كان عندي أسئلة كثيرة بس أبكتفي باثنين , تخبر توّك طالع من اختبارات و تصحيح

وش تصحيحوه
هذا تاركه من مدة .. لكني طحت بأشد منه ..

إقتباس السؤال الاول / هل عرف أحد طلابك في يوم من الأيام بأنك تكتب في النت تحت يوزر البارق ؟!

لا ..
بكل بساطة أدرس مرحلة ابتدائية وما أظن أحد له بالإنترنت .. وإن كان له فماله بالمنتديات ..

إقتباس أنت مدرس ابتدائي ,, ما هو أحرج موقف يمكن أن يعترضك مع هذه الفئة من الطلبة ؟!

المحرج جداً هو إنك تتدخل في حقين صف أول .. يعني يمكن الطالب يرد عليك بقول : ماهوب شغلك .. أو وش دخلك

شاكر لك مرورك من هنا ..



ولي عودة لبقيـــة الأسئــــلة بمشيئــة الواحــد الأحـــد


تحياتي للجميع ،،،