بسم الله الرحمن الرحيم

(إقرأ بإسم ربك الذي خلق )






إعداد : عبد العزيز اليامي ، حاتم
صور : عبد العزيز اليامي
فيديو : تصوير حاتم ، حوار عبد العزيز اليامي
كتابة التقرير : عبد العزيز اليامي
تنسيق واخراج: حاتم



الوقت : الاحد 1/4/1432هـ (من 7 الى 12 ظهرا)
المكان : معرض الكتاب في مخرج 10 ،


مدخل








أرسلي الشايب حاتم على الخاص وقال "إذا انت معزم على الروحه للمعرض فتراني خويك " وإتفقنا على الموعد يوم الاحد صباحا وتبادلنا الأرقام ليلة الجمعة على أساس يكلمني صباح السبت ونتفق على كل شي ، المهم الرجال سحب علي صباح السبت وكلمني الظهر وانا في اعز نومه وقال معليش نسيت الجوال في البيت وداومت ونسيت منك وقلت خير انشالله هذا اول العيد والفهاوة ، المهم انه قال مرني غدا باكرا في حي النظيم وخذني معك وصراحه من يوم قال حي النظيم وانا بديت اتردد بقوه لان الحي هذا ما اواطنه وبيني وبينه سوابق سوداء واذكر قبل ثلاث سنوات دخلته وكان مكتوب على جدار بيت فيه بالبخاخ عباره بليغه تختصر كل شي داخل الحي " لا تنظيم في حي النظيم " فقلت لاخونا حاتم معصي النظيم ماني جايه قال اجل قابلني في جامعة الامام ....



كلمني حاتم ليلة الاحد ووصف لي وين مكان كليته عشان امره في الجامعه وكان وصفه سهل كما يبدو ووقت جوالي فرحا بلقياه وقبل يدق المنبه صحيت قبل الفجر بربع ساعه المهم اني لقيت الوالد في المجلس يصلي الشفع والوتر فقلت يلا دامنا قمنا نصلي مع الشايب ذا يمكن تحسن صورتي في عينه ...
صليت وقمت ابي البس لقيت اخواني قد خذوا شرابي فلبست البلا ذي بدون شراب وتوكلت على الله وكنت من البارح مغسل الموتر لعيون حتومه انطلقت في الساعة 6 والنصف من ضاحية لبن الشعبيه الاشتراكيه العظمى بجوار نادي الرياض العريق وكان الطقس جميلا حسب لوحة البلدية ...





ولفت انتباهي في الشارع نوع من السيارات مدري اللي شاريها وش يحس فيه ....






المهم يوم وصلت مخرج 2 كلمني حاتم وقال وينك انت قلت في راس الدايري الشمالي قال انا فيني ثلث ساعه اللحين واللقا في الجامعه المهم اني وقفت اشتري شراب قلت فضيحه والله يالربع اقابل هالاطخم بدون شراب ..
دخلت جامعة الامام واتبعت وصف اخوي حاتم والحقيقه اني فريت ام الجامعه كلها ومالقيت كليته وبعد ما اتصلت عليه وهايطت بقوه وخاصمته على وصفه وصف لي بشكل ادق وعلى وصفه رحت وبغيت ادخل مواقف الدكاتره فقال السكيورتي يكل عنف " هذي مواقف الدكاتره ياولد ، روح صفط في مواقف الجحلط يمين ودقها كعابي لين توصل الكليه " المهم اني قلت لحاتم دقها انت كعابي وانا احتريك ...
وحين اقترب مني حاتم لاقابله ودقت ساعة السعف على قولة ابو سيف الاسلام القذافي العنزي ...
وحقيقة كنت اتوقع شايب والا ثلاثيني ولكني فوجئت بشاب وسيم ابيض صغير السن عمره ما يتعدى العشرون ربيعا متوسط الطول تقريبا 165 سم وبعد السلام والكلام ركبنا الموتر وتوجهنا كعادة أي سعوديين يتعرفون على بعض الى اقرب مطعم ....
افطرنا صحن شكشوكة جبن وصحن كبده غنم وصحن حمس لحم وبراد شاهي يعدل ام المزاج في مطعم الشام على طريق عثمان بين الملك عبد الله والامام ...

وتوكلنا بعدها للمعرض الساعه 9 الا ربع وقال الحارس يوم بغينا ندخل مع مدخل كبار الشخصيات ضفوا مع بوابة 2 حقت الجحلط وصراحه يوم شافني كان ناوي يدخلني لكن شاف حاتم وقال يمدحون بوابه 2 ....

لقينا على البوابه 2 حارس وقال الدخول الساعة عشرة ، ورحنا جنب شقق مفروشه توها تشطب وجلسنا على كراسي حولها نتبادل اطراف الحديث ونحش فيكم كلكم دون استثناء ما عدى داق لطمه كنت اعزز له ...

وخلينا موترنا برى ودلخنا على رجولنا المعرض وكان فيه عالم تقول الملك يوزع شرهات بزران ونسوان وشباب فعلا تاكدت ان الشعب السعودي اما انه مثقف جدا والا داشر جدا ..

المهم مالكم في الطويله دخلنا وفي الدخول تفتيش زي حق المطارات وحركات بعدين تلاقي مكاتب الخدمات على يمينك من استعلامات ومراكز اعلامية ومكاتب الشرطه وعلى يسارك مطاعم وخدمات اخرى ...














استأذنا في المركز الاعلامي في التصوير واذن لنا وحاولنا نحصل على اوراق رسميه ولكن رفض وقال المواقع الالكترونيه تعتبر جهات غير رسميه واحس انه شاف في وجهي اني موقوف ....

طبعا في البداية دخلنا وصورنا الجهات والمكتبات السعوديه ..




































وبعدها توجهنا الى جناح وزارة الثقافية والاعلام وكان فيها مسؤولين كبار رفضوا التصريح او التعليق عن أي شي الا ان الاخوان المنسقين وحقين الاستعلام كانوا قمه في التعاون والتسهيل واخذنا منهم تصريح حلو وقصير عن المعرض وهم الاخوان سعيد الزهراني (اهلاوي) وفهيد الحميداني (هلالي صميم ) وبعدها توجهنا لمكتب وجناح الهيئة اللي رفضوا فيه الادلاء باي تصريح او تعليق واكتفينا بصور متواضعه عن مكتب التنسيق لهم في المعرض ....

YouTube - MVI 3808




















بعدها توجهنا لجناح الطفل وهو من انجح واكبر الاجنحه في المعرض وفيها بزران السعوديه كلهم مشالله على الثقافه ...











وهذي صوره اهداء لحروف الغلا وامبراطوية الامارات ...





بعدها توجهنا لجناح ضيف الشرف وهي دولة الهند الشقيقه ...









ثم اخذنا صور منوعه للمعرض وغادرنا المعرض الى الساحة الخارجيه وخذنا كوفي وكابتشينو وصورت حتومه غصب عنه ...





























ثم رجعنا للسيارة واكتشفت اني من فهاوتي ناسي المفتاح فيها وبعد ما دورنا سيخ واسيام وليل وحاولت افتحها وما قدرت وحاتم يقول خلني احاول وانا رافض لاني مو مقتنع في شنبه صراحه حاول ومن اول مره فتحها فامنت ان الهلاللين محظوظين صراحه ....
وبعدها رجعت حاتم للكلية حقته وانتهت الرحله بسلام .


مقتطفات :
المعرض في غاية التنظيم وفاتح من الساعة 10 الصباح الى الساعة 10 المساء وهذا الجدول حقه :


وما انصحكم تجون الصبح لان زيارات المدارس واجد.

يوجد دور للسنما تعرض فلم الطريق الى الحج مدري الى مكه قيمة التذكرة 25 ريال ويحكي قصة سفر ابن بطوطه لمكه عشان يحج وهو مفصول للنسوان والرجال .
يوجد مداخل وتفتيش خاصه للرجال وللنساء وخدمات ومصلى ودورات مياه ومطاعم وبوفيات
يوجد بث مباشر لقناة الثقافية زي ما لاحظتوا في الصور من ارض المعرض .
داق لطمه كان متابع من هناك من تبوك بجواله وقلبه .
حتومه طلع عسل يالربع يالبى قلبه بس
حتومه استر ما واجهت من الفهاوة ياذيب تكفى
هذي صورة قال حاتم ودي ابلغ عليك لاني حاط ريال يمسل شبك المكيف في السياره










شباب الصور تطلع كبيره وتعبت اصغرها ما قدرت اعذروني لو عبد العزيز عرف يصغرها بس ما قدرت