مرحبا كايدهم ..

أولاً .. اللقافة موجود وممكن البعض يدلعها ويقول " فضول " وممكن البعض الآخر ينمقها ويعطيها بعد إعلامي ويسميها " فزعة " .. لكن يظل اسمها الحقيقي لقافة ..

ثانيا.. وين هي به البايد هارك مدري الهايد بارك.. ووشي هي بالضبط ..؟!! يعني بقالة أو مطعم

ثالثاً .. الحل لمثل هذي الحالات ..إن هيئة المواصفات والمقاييس تجبر مصانع السيارات على مواصفات معينة .. وأهم شيء ( اللي يهمنا اليوم ) هو وجود قنلبة موقوته تنفجر بعد خروج ( الاير باق ) بدقيقة .. يعني يالله يمدي راعي الموتر يهج ..

وبالطريقة ذي .. تجد الجميع يهرب من الحادث ..

وش رايك عاد ..

رابعا ً .. قصة طريفة لا أدري عن صحتها لكن لا تخلو من الطرافة .. وهي في مجال موضوعنا هذا ..

وهي إن واحد من اللي بلاهم الله باللقافة .. ومن يوم يشوف حادث إلا وتلقاه بالمنصة .. يعني باحسن مكان ..

يوم من الأيام كان ماسك الطريق السريع .. وشاف حادث بالجهة المقابلة وعنده تجمهر كبير .. طبعا ما قدر يمسك نفسه - كالعادة - وصفط السيارة يمين وقام ينقز ويطامر الشبك حتى وصل لموقع الحادث ..!!

كان الناس متجمعين بدرجة إنه ما يشوف اللي طايح ..!! وهو ما يقدر وده يشوف ..

المهم قال مالي إلا طريقة وحدة تفكهم وفعلا نجحت .. وهي إنه بدأ يصرخ ويقول .. أخووووووي أخوووووي مع بكاء شديد ( عشان يحسون انه تبعه ) وفعلا الناس ابعدوا عنه وفتحوا له طريق للضحية ..

وهو من داخله يضحك .. وماهمه إلا يشوف اللي حاصل عليه الحادث واللي الناس مجتمعه تشوفه ..المهم يوم وصل لقاه فعلاً ..


7


7


7


حمار ..

المشكلة أنا للحين ما أدري وشلون أخوه من الأب أو الأم أو الرضاع ..

شكلي مسك بكم خط ..


تحياتي لكم ،،،