نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة

كايدهم · #1 02/01/2005, 10:33 PM

القصه حقيقه وحصلت قبل يومين :

واحد من العيال طلع من بيتهم بعد العشاء على اساس مشوار صغير .. اول ماطلع من بـيتهم الا ويلقى لوحة السياره مسروقه وبكره عنده اخـتبار ، المهم اتصل على الشرطه وقالوا له لازم تجي تبلغ بنفسك .. الرجال خذا السواق معه احتياط وطلع لقسم المعذر يبلغ عن اللوحه .. وقبل مايوصل للقسم وقـفته دوريه وقالت له .. وين لوح السياره ؟ .. قالهم هذاني رايح للقسم ابلغ ومشى معهم الين وصل للقسم ..

المهم دخل للقسم وعلمهم عن رقم اللوحه وطلع من القسم بدون مايأخذ ورقة بلاغ .. طلع ومعه السواق .. اول ماطلعوا من القسم وتوه لاف من الشارع الا وتجي دوريه من وراه وتقول لبق ياراعي ... وهو يقول يالله وش هاللي مستقعدين لي .. نزل من السياره ويقول سم امر .. والشرطي يقوله وين اللوح

.. قاله السالفه كذا وكذا وهي مسروقه توني مبلغ وهذي رقم اللوحه .. يقول قلتها للشرطي .. الا والشرطي يقول عدها مره ثانيه ويأخذ جهاز لا سلكي ويقول رقم اللوحه ! الا ويجيه رد يقول امسكوووووووووووووه

!!!

خويي يقول انا مدري وش السالفه وش امسكوه وراي اختبار .. الا والشرطي يقول اركب معنا ويطلعون به لحي السفارات يقول اول ماوصلت الا ويجي يحقق معي واحد بلبس مدني من المباحث شكله عقيد او رائد .. ويقولي طلع المسدس

!! خويي يقول مامعي شيء والله " على نياته "

.. ويفتشونه حته حته .. ثم يسأله يقوله علمني وين اخوياك وين راحو

.. وخويي يقول منهم اي عيال تقصد

" من جد باااارد " الا ويقوله السياره اللي فيها رقم لوحتك عليها بلاااغ ارهاب وفيها متفجراااااااااااات

..

خويي يقول هو قالها ولا ماقالها .. يقول قلتله طيب وش دخلني

.. يقول مسكني على جمب وقالي وش القصه .. قاله القصه كذا وكذا وعندي بكره اختبار وهي مسروقه و اول مانسرقت جيت وعلمتكم .

قاله طيب .. يقول ويجون ويمسكوني ويركبوني في الدوريه بيودني لقسم الناصريه يقول قدامي سيارتين ووراي سيارتين " يقول قلت للشرطي والله اني قوي سيارتين قدامي وسيارتين وراي

"

يقول اول مادخلت للناصريه وداخل مكتب ويدخل علي واحد كبر هالباب مرتين " مدري وش كبر ببيانكم بس سلكو الموضوع " جسم بعير وبلباس مدني .. يقولي ياخي اعترف وخلصنا

.. وهو يقوله وش اعترف والله في سيارتي مافيها شيء

..

يقول الا وشوي يتصلون مدري على مين الا ويجيني واحد منهم ويقولي حنا آسفين يالشيخ بس غلطنا في رقم اللوحه بدل القاف طلع ف !!!

يقول ابد ماابي شيء بس ابي اذاكر وراي اختبار

.. المهم يقول جاء عمي للقسم لانه كلم مدري مين .. يقول ركبت مع معي والسواق ورانا بسيارتنا ..

يقول اول ماطلعنا منهم الا ودوريه ورانا تقول لسواقنا وقف ياراعي ....

!!

يقول نزلت انا وعمي وحنا نضحك والشرطي يقول يناظرنا وهو مستغرب وش هاللي يضحكون

!!

يقول قلناله السالفه كذا وكذا .. قاله ايه آســــــــــــــــــــفييين

.

ومن بعدها معد صرنا معد نناديه الا بالارهابي

وسلامتكم

* تعديل :

حرف الفاء لم ينزل .. انا ماحفظت السالفه حفظ والموضوع كان يقوله على شكل سالفه ولم احفظ جميع كلماته خصوصا حروف سيارته .. حتى في اشياء ذكرها غير قابله للنشر .. واللي يبغى معلومات مفصله للتصديق يرسلي رساله خاصه واقوله اسم العقيد ورقم البلاغ واي قسم