نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة

حروف الغلا · #1 15/02/2011, 09:03 PM

السلام عليكم و رحمه الله و بركاته

مساكم الله بطاعته

اذكر اخر مرة نزلت موضوع من مدة طويلة ، طبعا موضوع المباركة لبو مقبل ما اعتبره موضوع ، الله يهدي HILALYA قلبت الموضوع شاات ....

ما علينا ، ليش التهور اليوم ، و الله الظاهر هالحمى هيه السبب ...

اليوم تذكرت احداث مرة بحيااتي و اثرت فيني بطريقة غير طبيعية راح اذكر بعضها ، طبعا كل حدث صار في سنة معينة ...

بسم الله نبدأ :

الموقف الأول :

من يوم وعيت على الدنيا و أنا اشوف القطاوة في بيتنا ... كل واحد من اخواني له وحدة ... و صرت مثلهم و ربيت وحدة ... اذكر اشتريتها ب500 ريااال و كان عمرها 3 شهور .. طبعا هذا الاحداث في عام 1998 ، و سميتها لوسي و بعد فترة قال لي اخوي أن عمرها الافتراضي عشر سنين و راح تموت و أخوي قالها من باب الغشمرة و بما اني صغيرة صدقت الموضوع و صرت احاتي و في عام 2008 المفروض تموت ... سبحان الله ماتت ب 2009 بالنسبة لي تعتبر معجزة

نجي للموقف :

طبعا كنت احتفظ فيها في غرفتي و اخاف عليها من الاغراءات الخارجية ... و أولاد الشوارع ... لكنها اتمردت علي و صارت تطلع من البيت و تعاشر كل من هب و دب ... و في يوم اللي احسه يوم نحسي ... رجعت البيت و هيه حامل ..

و الحل صعب اجهضها ... قلنا نتريا ليوم ولادتها و الله يفرجها

وصل اليوم المنشود .... كنت نايمة .. ما اسمع غير أخوي ينادي علي بصوت عالي تعااالي ... فزيت من نومي و انا ادعي الله يستر شو صاير بهالليل ... اركض على اخوي ... و اشوف لوسي بتولد ...
وين المشكلة ؟

المشكلة يا اخواني الحبل السري لاف على رقبة القطو الصغير "البيبي " ، سبحان الله مع أني كرهت منظر الدم و الأرف إلا و الله مسكت أقرب سكين و قصيت الحبل السري و انقذت البيبي ...

هذا الموقف كل ما اشوف قطوه اتذكره ...

سبحان الله الانسانية في البشر تتحرك حتى لو كانت ضد ارادتنا ...

نفس لو تشوف واحد بيغرق .. بتقول ارف اسوي له تنفس صناعي لكن انسانيتك تجبرك تتحمل الوضع ...

الموقف الثاني :

هذا من فترة، السنة الماضية ، بما اني اشتغل في شركة استثماراات ، نصادف ناس و بشر من مختلف الجنسيات
و تمر علينا مواقف عجيبة غريبة ...

هذا الموقف صار لي مع نااس خليجيين ، فاتحيين شركة ... و محطيين واحد سوري المدير فيها ، ... المهم خلصنا اجراءات التأشيرة و صار لازم نثبت الاقامة ...

خلال هذي الفترة توفى واحد من الشيوخ و عطلت الدوائر عندنا و عطونا اجازة لمدة يومين ... فصار ضغط ، الكل يبي شغله يخلص بسرعة ...

و من كثرة الشد و التوتر ... وصلوا هالجماعة و نفس السالفة نبغي نخلص اقامة الريال بسرعة ... يا ناس ما يصير الدوائر عطلت ، اصبروا للأحد ... كلمة منهم و كلمة مني صار الجو مشحون ... طبعا شكوني للمدير ...
و ما عليكم من الباقي ...

وين نقطة التحول في السالفة ...

بعد ما خلصنا الجواز .. اعتذرت لهم و سويت المشكلة و من صوبهم تفهموا الموقف ... المهم كنت اسولف معهم
طلع واحد منهم شيخ دين فصديقتي سمعت الريال .. فطلبت مني تسأله كذا سؤال ... فقعدنا و شرحت مشكلتها و قال لها حاولي دايما تقرين سورة البقرة ... فقلت في نفسي ليش أنا ما اقراها بعد ... صح أنا ما اقرأ القرآن دايما و الكذب خيبة ... المهم صرت أقراها يوميا و احيانا كنت اصحى بدري قبل صلاة الفجر عشان اقرأ ... و الحمد الله مواظبة عليها لليوم ...

هذا واحد من المواقف اللي احسه اثر فيني بطريقة ايجابية بالنهاية ...

احيانا افكر اطرش مسج للريال و اشكره ، بس اخاف افتح لنفسي باب أنا في غنى عنه ....

الموقف الثالث :

قبل ما اسجل بالمنتدى و للعلم هذا أول منتدى اسجل فيه ... لاني ما كنت احب النت وااايد .... كنت افرفر بالمنتديات ، و جا في بالي اشوف منتدى الفقراوية ، و ما يصير الموضوع يخلص بدون ذكرهم ، المهم دخلت و اشوف الردود الغير حضارية ... قلت اسجل عندهم عسى خير ...
ضغطت ع كلمة تسجيل و ظهر لي مسج ، لو أعرف كنت صورته ساعتها ....

المسج : التسجيل موقوف مؤقتا ...

قلت غريبة ... لهدرجة الطلب زاايد عليكم ...

برئية و على نياتي ..

و لاني غير متعصبة للفرق ... ما كنت اعرف الحساسية الزايدة بين الهلال و النصر إلا من خلال تواجدي بالمنتدى ، عشان كذا ما اروح قسم الجمهور .... كله شد و عصبية و الكل يحلل و يحط ع كيفه ...

الموقف الرابع :

اذكر كانت وحدة فلبينية تشتغل بشركة واحد خليجي .. سكرتيرة ... بعد فترة تحجبت و سألتها اسلمتي ... قالت ايه و فرحنا حقها وااايد ... و صارت تسأل عن الاسلام ... و ظلت على حجابها تقريبا سنتين .... فترة شالته ... سألناها قالت بس كذا ... طبعا تعرفون تخمينات الحريم ... و أول تخمين ... صاحب الشركة وعدها بالزواج فأسلمت و لما خلف بوعده ... طنشت .... الله يهديها بس ...

الموقف الخامس :

وجودي بالمنتدى ...

صراحة مب مجاملة غير حيااتي ... تعلمت أشياء يمكن كنت مب مهتمة فيها كثير أو بمعنى اخر شغلتني الدنيا عنها ...

و هذا الجزء ما راح اتعمق فيه لانه شخصي ....

رسائل اعتذار :

لكل واحد حس اني جرحته بدون قصد فالسموحة منكم

لأم متعب التميمي ... تعجبني مواضيعك و ردودك تخليني اعجز اكتب لك رد

لشخص احسه فترة تغير و صار صارم في ردوده و هالأيام اشوفه ودود <<<<< رساله اعتذاري بتوصلك ع الخاص

رسائل شكر ...

لكل شخص كان سبب في تغيير شخصيتي بموقف أو حتى بكلمة صغيرة

رسائل حب ...

بما ان البارحة يوم الحب ، لكل الصبايا من خاطري احبكم

رسائل عتاب ...

فاينل وعدتني تعلمني كيف اسوي خلفية و للحين ما وفيت بوعدك و لا كان هالموضوع ملون أحمر و أخضر

و في الختااام ...

خلص حسني مبارك خطابه

أول و اخر موضوع انزله