هذه القصيدة مرثية في خالي عوض مرزوق المطيري المتوفى يوم الخميس 13/10/1425هـ




مرحـوم ياللـي وسـط ربعـه فقـدنـاه *** مـن عقـب مـا كنـا نشوفـه ونلقـيـه
فالليـلـة الـلـي بـعـد شـوفـه بكيـنـاه *** جانـا الخبـر ثـم اصبـح الكـل يبكيـه
قالـوا توفـى قلـت معـقـول فـقـداه!! *** يا ناس أنا تـوّي مـن اشـوي لاقيـه
هلـت دمـوع العيـن والقـلـب ينـعـاه *** وفكري غدى ذكـرى فقيـده تمشّيـه
ذكـرت يومـه كـان جـالـس بمـركـاه *** مــا بـيـن حــل وبـيـن رايٍ يبـدّيـه
إي والله إنـه يتعـب النفـس فـرقـاه *** لـكــنّ حــكــم الله فـيـنــا يـسـرّيــه
أنـا أشهـد إنـه حـزة الضيـق تلقـاه *** (عوض) تـرى بالطيـب كـلٍ يزكيـه
مـا جنبـه عـن طاعـة الـرب ملهـاه *** صلى وزكّـى ومصحفـه كـان يتليـه
صـام الشهـر اوصـامِ يوميـن تليـاه *** يومـه تـوفـى رابــع الـسـت نـاويـه
ويالله أنـا بدعيـك يـا عـالـي الـجـاه *** وبرفـع يدينـي لـك وصوتـي بعلـيـه
تمحـي لـه ذنـوبـه وتغـفـر خطـايـاه *** وتضاعف الحسنة وتحسن مثاويـه
ويا شاهـر ابوصيـك دربـك تقصـاه *** اسلك دروب الطيب واتبـع مواريـه
واترك دروب الشين خالف سوايـاه *** خلـك علـى نـهـج النـبـي لا تخلـيـه
واحرص على اللي جنّة الرب مبغاه *** وتجـنّـب الـلـي لاويـــاتٍ خـطـاويـه
وحافـظ علـى ماكـان والــدك يبـغـاه *** لا تختـلـف عـنّـه وتـتـرك مباغـيـه
واخوانك ادفع عنهم الضـر وانهـاه *** واحرص لهم بالخير واكثر دعاويـه
وخـلّـك لـهـم والــد وخـلّـك حـلايـاه *** خـلّـك مثـيـلـه واســـأل الله يعـلـيـه
وختـامـهـا مـنــي صـــلاةٍ مــــودّاه *** علـى النبـي اعـداد مـا مـرّ طـاريـه