السلام عليكم ورحمة الله وبركاتهـ
الحمد لله على الفوز والحمد لله على الثلاث نقاط وهي الأهم ..
لكن صراحة الفريق ينقصه أشياء لازم ننتبه لها ونعالجها قبل الآسيوية وقبل المباريات القوية بالدوري ..
وجود مهاجم أجنبي أمر لا يحتاج للنقاش أبداً أبداً أبداً , ومو أي مهاجم أقصد مو يكون مهاجم ثاني أو يلعب على الأطراف لا , أهم ميزة تكون فيه هي حاسية التهديف عندهـ يعني مانبيه مهاري مانبيه يلعب بالأظهرة على الأطراف ويرقص فيهم لا , كل الي نبيه إذا حطيته داخل الـ 18 مايشوف إلا الشباك . راح أعطيكم أمثله :
بيانو لاعب الوحدة الإماراتي ( آآآآآهـ لو يجي للهلال)
ساند لاعب العين الإماراتي
لياندروا لاعب السد القطري
ماجنوا ألفس لاعب الإتحاد سابقاً وأم صلال
عماد الحوسني لاعب الأهلي
والكثير لو بغينا ندور راح نلقى , الهلال لدية خط وسط قوي سواء الأجانب ويلي ونيفيز ورادوي أو بالمحليين الشلهوب العابد الفريدي الدوسري الغنام عزيز وغيرهم , لكن نبي مهاجم هداف ..
مثلاً :
اليوم مع الحزم بغض النظر عن الاهداف الي ماجت إلا بعد حرق الأعصاب(وللمعلومية نلعب مع متذيل ترتيب الدوري) جاء للهلال فرص كثيرهـ الي صدها الحارس والي بالعارضة والي برى وخصوصاً الشوط الأول , هذا أكبر مثال !
أنا أدري إن الإدارة ناوية تجيب مهاجم لكن أعيد وأكرر مانبي مهاجم من طينة ليلو امبيلي مهما كان اسمه وامكانياته نبي مهاجم هداف مايلعب إلا داخل الـ 18 ومايعرف من الملعب إلا منطقة الجزاء والشباك فقط ..
//
الأمر الآخر : أنا أبغى سبب مقنع لوجود سلمان الفرج بالظهير الأيسر , أي لاعب تحطه بالظهير الأيسر وهو مو مكانه الأصلي يستطيع أن يقدم مايقدمه سلمان الفرج , مع العلم إن كالديرون عنده حلول وخيارات كثيرة منها :
يحى الكعبي( كان يقدم مستويات كبيرة مع الوطني وكلنا نتذكر مبارة الهلال والوطني بتبوك لماسجل نفس اللاعب هدف على الدعيع على ماأذكر إن المبارة إنتهت 3-1 للهلال)
شافي الدوسري
وضع لي يونغ بالظهير الأيسر ونامي بالأيمن
( مع العلم نامي جاهز من قبل مبارة التعاون ) ..
أتمنى مانجلس نضحك على بعض , كالديرون يصرح بالإعلام إنه لو الأمر بإيده كان وضع الفرج ظهير أساسي بالمنتخب ؟! ياكالديرون تكلم بالعقل والمنطق ترى قسم بالله نفهم كورة , خلاص الأن الجمهور عنده ثقافة كروية وأكبر دليل خذ لك جولة بسيطة على المنتديات راح تلقى عقليات والله مكاناها بالأندية مو بالمنتديات ..
وترى مو كل لاعب أو رياضي سابق تحليله ممتاز , ومو كل متابع ومشجع مايعرف يحلل ويتكلم !
بالعربي أتمنى مانجلس نتفلسف , يلعب سلمان الفرج بمكانه الأصلي مانقول شي هذي قناعات مدرب لكن تجيبه وتلعبه ظهير أيسر أصعب خانة بالفريق وبنفس الوقت يطلع تصريح من مدرب الفريق ويقول إن اللاعب مكانه المنتخب , صراحة أعتبرهـ إستغفال للجماهير ؟!
//
** الهلال يحتاج لتفعيل الأظهرة هجومياً , لكن هذا يبغى أظهره تفعلها لك !
** أتمنى نستغل الكوكبة من النجوم والأسماء الكبيرة و(الكثيرة) بخط الوسط خير استغلال !
** من الجنون إذا تم التفريط برادوي مهما كلف الأمر !
** تصريح البلطان! والتصاريح الي تطلع بإسم شهيل بالإعلام! < هذا من صالح الهلال!
سوها ياأبو فيصل!
** الله يوفق هلالنا ..
//
وجهة نظر (سريعه) من بعد خروج الهلال من الآسيوية إلى الأن ..
دمتمـ بصحة وعافيه ..
