|
شي ماشفتووه ... وكواليس وأحداث لم تعلن .. وأخبار حصريه
سبحان الله .. أنتم ماتجيبكم إلا الأخبار العاجله والحصريه أو شي ماشفتوه .. 
بس قل ( شي ماشفتوه ) وشف نسبة المشاهدة
جريدة الرياضي الله يخلف عليها وكعادتها منزله خبر ( كما إنفردت الجريده قطر تفوز بإستضافة كاس العالم بـ 14 صوت ) >> يانصبهم .. تدرون وش طريقة جريدة الرياضي ؟؟
من اول ماتم التوقيع على ملف الإستضافه من سنتين تقريباً وهم مستلمين الجريده صحافتهم .. وماسكينها بالدور .. واحد يقول قطر تفوز بــ 11 صوت .. ومن بكرا الثاني بـ 12 صوت .. وبعده بـ 13 صوت وبعده بـ 14 وبعده بـ 15 .. لين ماتخلص الأعداد ..
ويجي دور المتشائمين او الحاقدين .. ويقولون قطر راح تخسر بصفر من الأصوات .. ويجي واحد بعده ويقول : قطر تخسر وتحصل على صوت واحد .. وبعده تحصل على صوتين وتخسر .. تحصل على ثلاثة وتخصر ؟؟ لين مايخصلون ..
وهم كاتبينها وموجوده نعم بالأرشيف ... بس ماخلوا توقع إلا وجابوه .. وإي توقع يطلع في النهايه بيقولون كما إنفدرت الجريده !! وش هالسخافة والشغل الغير إحترافي .. والضحك على الذقون .. 
حتى عبدالعزيز البكر وهو في قناة الــ art ذابحنا بكلمة ( وهذا التصريح حصري ) فقط على قناة الـ art ؟ وكنت سامع هالتصريح قبل على كل القنوات من الضيف .؟؟ ويمكن قناة الـ art كانت آخر قناة صرح فيها الضيف بهالمععلومه .. وبرضه مصر على ( حصرية ) المعلومه وإنه مكسب للقناة ... لين مانقل لقناة الجزيرة .. ذبحنا بالحصريات .. كل ماقال لاعب او مسؤول نادي كلمه مع المذيع الميداني .. ورجع للإستديو قال : هذا الكلام حصري على الجزيرة الرياضيه فقط .. وهالكلام غير صحيح .. يصير اللاعب او غيره مصرح في كل القنوات بس هو ماتابع ؟؟ لكن اللى متابع للجزيره ومو مهتم راح يصدق إن البكر فلتة زمانه وأبو الحصريات .. وهالتصرف عيب من البكر وغيره .. وكأنه يبي يوهم القناة او مسؤولينها والجمهور إنه مكسب للقناة ومع جيته جت الأخبار الحصريه !! 
طلعت عن الموضوع أدري بس حبيت اطلّع اللى في قلبي مع هالمتحذلقين ( ووواااااووو ) شلون جبتها
دامني ( عنيتكم ) وجيتوا ماودي تطلعون من غير أخبار حصريه وكواليس وش ماشفتوه 
شفتوا الشيخه موزه يوم بغت ( تخم ) الشيخ حمد وبعدين وخر عنها ..  للشيخ حمد وللشيخه موزه مع الفرحه نست نفسها ماالومها بس كويس من الشيخ لحق وتدارك الوضع ..
شفتوا فريق العمل الــ 45 اللى إجتهدوا وعملوا حتى تحقق الحلم العربي وهو إستضافة كاس العالم ؟؟ كلهم شباب ( شبـــــاب )  ومافيهم إلا إثنين من الأسرة الحاكمه مع قائدهم الشيخ محمد .. شفتوا الدماء الشابه والتجديد والثقة في المواطن الكفوء وش تسوي وكيف تكون نتائج هذه الثقة !
شفتوا إماراتي بعد يوم الخميس ؟؟؟ ضربتين بالراس توجع خروج من كاس الخليج من السعودية وفوز قطر بإستضافة كاس العالم .. رغم إن الإمارات في عيدها الوطني والله يحفظهم شعب وحكومه بس تعودوا الأخوه في الإمارات على المدح لحالهم .. مايبون الشيخه لغيرهم ولا التبريكات والفوز والإشادة إلّا لهم  ..
أتوقع قطر راح تسبب أزمه لدبي .. في ظل هالتنافس الشريف بين البلدين وكلهن غاليات علينا  وليت تدخل على الطريق مدننا العزيزه وباقي مدن دول الخليج
محمد بن حمد آل ثاني ( قطر )
حمدان بن محمد بن راشد آل مكتوم ( الإمارات )
نموذج لشباب من الأسرة الحاكمه تعمل بصدق وبإخلاص الله يكثر من أمثالهم
بن همام أثبت للجميع بأنه يعمل .. وماعنده إلّا العمل .. وترك الكلام للغير والفعل له .. وعد وصدق .. يقول ويطول أبو جاسم .. ومره قلت ليت عندنا ( ربع ) إبن همام كان علومنا طيبه .. ونبدله بطلال آل الشيخ .. والمدلج .. والنويصر ..والبقيه اللى ماوراها إلا التفلسف
اللى يشتغلون ماتوا الله يرحمهم في السعوديه .. الأمير فيصل بن فهد ... عبدالله الدبل ... أيام الهيبه والعمل والإخلاص ..
بطولة الخليج ... اليوم نهائي بطولة الخليج ... أقول أتمنى التوفيق لمنتخب الكويت ( كيده وكيده ) مثل أمنياتي لمنتخب الإمارات بالظبط في مبارتنا السابقه معه ومثل ماتمنيت للمنتخب القطري نفس ذيك الاماني أتمناها للكويت  وعاشت نحاستي للأبد
وتحية لجميع المنتخبات المشاركة .. وللجماهير اليمنيه الحاضرة ... وللأعضاء المتفاعلون في هالقسم .. وبهالمناسبه ترى المكافئه مضاعفه
اخوكم الصغير ابو طلال  | 