|
حياكم الله على قل الكلفه مفاطيح بالداخل .... بغينا سلف لا هنتو ... ثقافة الصرف عند السعوديين مضروووووبه ... ولا يهونون الخليجيين..
بسم الله الرحمن الرحيم
كالعاده موضوعي كأي موضوع ممكن يلاقي النقد والاشاده وما اتمناه كليهما لان في النقد هدف وغايه وفي الاشاده دافع وتقوية اراده ولكن ما اخشاه هو نوعية النقد الذى يتعدى لصاحب الموضوع بأساليب وعبارات غير مألوفه في منتدى المجلس العام ولا ن الموضوع غايه في الاهميه ومن شأنه أن يغير قناعات بمحاولة تغيير بعض العادات .
موضوعي هو غلاء المعيشه
غلاء المعيشه موضوع يؤرق اكثر طبقات المجتمع في العالم العربي وتحديدا عندنا في السعوديه وأسبابه متشعبه وكثيره منها ما نجهله ومنها ما نعرف واللى نعرفه ما بنعرف له حلول ولو عرفنا له حلول يضل تطبيق الحلول بيد المسؤولين أصحاب الدخل العالي اللى مهما صار ارتفاع وتضخم في اسعار السلع لن يتأثرو به ويتذوقو مرارته بل بالعكس .
ثقافة جدولة الميزانيه
يمكن كل الشعب السعودي والخليجي عامه يفتقد لثقافة الاقتصاد والترشيد بينما يتفنن فيما يمكننا للاسف اطلاق عليها مسمى ثقافة الصرف والاسراف والتبذير حتى ونحن في أمس الحاجه والادله والبراهين كثيره وكثيره جدا يعني مثلا مين اللى فكر مره يمسك ورقه وقلم ويكتب احتياجاته القادمه لمدة شهر مثلا ويجدولها ويضع لها ميزانيه لا يتعداها الى مرحلة السلف اخر الشهر ..؟؟!!
بينما نجد ماراح اقلكم الغرب لا والله اخواننا العرب حولنا يسونها لانهم خلاص تأقلمو مع غلاء المعيشه وظروف الحياه ونحن يجب ان نتعلم منهم
واللى يقلي احنا نعيش في بلد غنيه اقله
ثقافة ضبط النفس
الغرب اللى منهم من يعيش حاله اقتصاديه افضل منا بمراحل نلاقيهم يسوون جدوله لاحتياجاته لسنه كامله وييتقيدون فيها ويستغنون عن اشياء مقابل اشياء اخرى يعني مو مثلنا ينزل الواحد مننا للسوق يبغى كيلو طماطم يرجع بنص السوق بس لانه شاف شيئ ونفسه فيه هنا ما اسميه بثقافة ضبط النفس أو ثقافة التسوق ويقلي غلاء المعيشه
تقافة المفاطيح
وكله كوم والاسراف اللى قاعد يسير في الاعراس والمناسبات كوم وأنا بصراحه ما يثير حفيظتي الا ثقافة المفاطيح يعني الصحن يجلس عليه خمسه او سته وعليه مفطح يكفي مثلهم ثلاث مرات ويقومون وهو مثل ماهو ومصيره في الاخير الى حاوية النفايات اكرمكم الل حتى ما يكلفون انفسهم ويرسلونه للجمعيات الخيريه ويقولون غلاء المعيشه .
ثقافة قل الكلفه ويابخت من زار وخفف
أنا شخصيا احاول اطور لغتي الانجليزيه فكثير ما احاول احتك في الامريكان والبريطانيين و في صديق عزيز عليا عنده بالعمل امريكي اسلم وغير اسمه الى سعيد تعرفت عن طريق الماسنجر وسرت اتواصل معاه فكان وده يتعرف عليا وعزمنى عنده بالبيت انا وصديقي اللى عرفني عليه بس شوفو اسلوبه كيف قال لي بالانجليزيه طبعا قال لي عازمك على قهوه انت وعمر الساعه تسعه ونصف بكره لانه موعد نوم بنتي الساعه التاسعه الراجل واضح وصريح يعني لا تتأخر ولا تجي بدري وأنا عازمكم على قهوه مو على قهوه يمكن تقلب عشا والله ثم والله ان مثل هذي الدعوات الخفيفه والزيارات السريعه تزيد من المحبه والالفه اكثر من التكلف والبذخ .
أنا مو ضد الكرم ولا مع تغيير العادات والتقاليد الحميده بس ضد المبالغه فيها وتعدي معنى الكرم الى ان يصل مرحلة الاسراف والبذخ .
ثقافة بناء الذات ( ثقافة القروض )
القروض وما ادراك ما القروض لا يكاد يخلو موضف من القروض وأول قرض يا خذه أي شاب هو للزواج طبعا يضيع الشاب من عمره ومن ماله وهو عزوبي سنوات دون ان يجمع ما يكفيه شر القرض حتى يتمكن من الزواج دون اللجوء الى القرض او يتزوج أول ما يتوضف ويقلك خير البر عاجله ويتمرمط ويمرمط بنت الناس معاه بالديون علشان خير البر عاجله ونسي مقولة كل تأخيره وفيها خيره 
يعني سنوات يبني فيها نفسه اختصرها بقرض ما شاء الله اندفاااااااااااع للحياه ما شاء الله حولك ايها الشعب السعودي 
انا معاكم انه حاليا يمكن لابد من القرض بس صدقوني بناء الذات في سنتين او ثلاث قبل الزواج وبعد الوظيفه ضروري جدا واسألو مجربين .
ثقافة التسوق
السوق مقبرة الراتب ولا تقلي ساهر ولا غيره وللنساء في هذا الجاني الثلثين مما اكتسب الرجل ما ابغى اتكلم اكثر من كذا بس من اسباب الطلاق والمشاكل الزوجيه الاسراف والتبذير وخصوصا في السوووووووووووووووق انا مو متزوج بس هذا الشيئ واضح للعيان 
اف طولت مره بس ما بقي الا اخلص
تقافة تنظيم الوجبات
نجي للسمنه بالله شوفو الشعب السعودي والخليجي كيف معدل السمنه مرتفع عندهم والسبب الاكل بمناسبه وبدون مناسبه لدرجة ان الاكل اصبح هوايه
وش هوايتك يا بابا؟؟
كانو يقولون كرة القدم الان البلايستيشن وهو ياكل بطاطس طبعا والحريم مشاهدة المسلسلات التركيه وهي تلهف بيتزا والرجال متابعة المباريات وهو ينقنق على فطائر ويقولون غلاء المعيشه
اصبح الواحد مننا يسرف علشان الناس ما تقول بخيل
اصبح الواحد مننا مسير حسب رغباته لا مخير حسب عقله و الصالح لتدبر امره
تقافة قلب المواقف
لكل جانب سيئ اخر مشرق يجب علينا استغلاله غلاء المعيشه يجب اننا نتعلم منها كيف ندبر امورنا كيف نتقي ربنا ونحفظ نعمه ونصونها كيف يمكن تكون غلاء المعيشه عقاب من الله مثلها مثل القحط اللى كان يصيب الناس بسبب المعاصي .
سبحان الله ياجماعه في اللى راتبه خمسه الاف واخر الشهر يتسلف وفيه اللى راتبه ثمانيه الاف واخر الشهر يلجأ لثقافة السلف والسبب معروف طبعا
طولت عليكم لسا في كلام كثير نفسي اقوله بس اترك الاضافه والتعليق لكم   
وكل عام وانتم بخير  | 