|
ياهي ليلة .. السر وراء بكاء ويلي وحالات الإغماء + كفشوا سامي + اضحك مع جماهير المسيار ( بالصور ) ..!!
بسم الله الرحمن الرحيم
وش السالفة 
ما أدري أقولكم مبروك وإلا أقول هاردلك لأعصابكم اللي راحت
وإلا أقول الله يشفي أصحاب القلوب الضعيفة اللي ما تحملوا وأغمي عليهم ...!!
مباراة عجيبة غريبة .. ويمكن أكثر الجماهير وأنا أولهم مهب مصدق اللي صار
إلى هالحين .. أشك حنا بعلم وإلا بحلم ..!
ما شفت في حياتي حاجة كذا أبدا .. لو كنا من الأول ما فزنا ثلاثة كان يمكن تمشي
لكن نفوز ثلاثة وننهزم بالأربعة ..!
أول مرة بعد هدف عيسى أركض بالصالة من عشر سنوات ..!!
أهلي يقولون الولد انهبل ..!!
رفيقي قدم على إجازة جته حاله من هالمباراة ..!
رفيقنا الثاني دوّر أحد يخمه بعد هدف عيسى ما لقى إلا أبوه بجنبه
ويطب عليه ويخمه وما أفاق إلا بطراق على وجهه ..!
لا حول ولا قوة إلا بالله ..
هل كنا فعلا نحتاج إننا ناصل لهالمرحلة ..!!!
أتحدى إذا كان فيه أحد منكم توقع هالسيناريو !
طبعا من وجهة نظري السر وراء كل اللي حصل هذا هو عدة أمور :
السبب الرئيسي بلا شك هو الاستهتار والغرور اللي كان عليه جريتس يوم بدأ المباراة بمحور واحد
أمام فريق يهاجم ومندفع ويلعب على أرضه ...!!
والأدهى والأمر إنك تسوي كذا وأنت أصلا فائز بثلاث أهداف يكفيك فقط المحافظة عليها
إضافة إلى أن المحور الموجود هو البديل الثالث للفريق ..!
حتى إننا يوم بدأت المباراة توقعنا إنه يمزح وإنه حاط الفريدي كـ محور ثابت مع الغنام المسكين
اللي ما يُسأل عن اللي صار لكن تفاجأنا إن الفريدي ما رجع ولا هجمه يساند الدفاع ...!!!
شيء عجيب وغريب من المدرب وخطأ فادح ما يخطيه مدرب مبتدئ لذلك ما ألوم أبو اثنين يوم يقول
كانك مستعجل على المغرب مع السلامه ..!
طبعا أنا ما أقول كذا إلا أكيد إنه وده يفوز لكنه أثبت لنا شيء واحد وهو إنه بقدر ماهو مدرب
متميز في الهجوم بقدر ماهو مدرب لا يفقه في الدفاع شيء ..!
والدليل إنه حتى بعد دخول الهدف الأول والثاني ما قام بأي ترميم للدفاع حتى جاء الهدف الثالث
فـ خلاص سوى تغيير هجومي لـ معرفته بالهجوم وعدم معرفته بأي شيء اسمه دفاع ..!
والمشكلة لاعب بمهاجم واحد فـ لا الدفاع أفلح ولا الهجوم أفلح ..!
والله من راح طيب الذكر كوزمين ما تمنيته يرجع إلا في مباراتين .. النهائي العام مع الاتحاد
والمهزلة اللي حصلت أمس ..! وكلها انهزمنا فيها مع إنه لو كان فيه مدرب يعرف كيف يدافع
مثل كوزمين ما يمكن يصير اللي صار ..!
لاعبين افتقدناهم في المباراة
رادوي .. وفي الليلة الظلماء يفتقد البدر 
خالد عزيز .. افتقدناه أيضا بشدة ..!
افتقدنا أيضا للمحور الصلب صاحب الخبرة مثل طيب الذكر عمر الغامدي ..!
افتقدنا لشخص اسمه محمد الدعيع ..!
^^ الغامدي والدعيع سأتكلم عنهم لاحقا في أحد النقاط ..!
الحلول الدفاعية اللي كان يجب على جريتس أن يقوم بها
في البداية كان من الأولى أن يبدأ بمحورين الغنام والبرقان
أو الغنام ويبقي الفريدي ثابت ما يتقدم ..!
ثانيا هم استغلوا تقدم الكوري وضغطوا من جهته فكان يجب الإيعاز للكوري بعدم التقدم على الأقل
حتى يهدأ اندفاعهم ..!
ثالثا أهداف الغرافة جت عن طريق العرضيات وهنا افتقدنا المرشدي ماجد .. فكان عنده حل أخير
يوم خربت الأمور إنه يقدم خيرات للمحور وينزل المرشدي ..!
وأنا قلت في موضوعي السابق بعد مباراة الغرافة الأولى :
^^ إذا فـ تكتيك جريتس المتهالك دفاعيا هـو الـسـبـب الـرئـيـسـي للـمـهـزلـة
السبب الثاني .. الـهـجـوم
من ضمن ما كتبت أيضا في الموضوع السابق بعد مباراة الغرافة الماضية :
الهجوم أمس أدق وصف له إنه بربسه ..!
يعني جمع جميع السلبيات بدون استثناء ..!!
فـ لا ارتداد سريع .. ولا تسديدات دقيقة من خارج المنطقة .. ولا تخليص للهجمات بشكل صحيح
فـ شفنا ياسر كل ما مسك الكوره قعد يدور ما أعرف ليش ما يتجه للمرمى مباشرة مثل المحياني
أيضا لا يوجد أي تفاهم نهائيا بين المهاجمين فـ لا أحد يفتح مع زميله ولا شفنا ولا لعبه وحده ون تو
فقط نيفيز يمسك الكوره بأنانيه ويبغى يسحب لين ينحجرون زملاؤه فيضطر يرجّع الكوره للخلف ..!
ولا فيه استغلال لأي عرضية على كثر العرضيات ..!
يعني هجوم أصفار على الشمال في كل شيء ورفسة ويلي خير دليل العجز الهجومي ..!
والسبب إن جريتس يعرف يعد الفريق ويحط التشكيلة الهجومية لكن التكتيك الهجومي
والخطط البديلة يبدو إنها مفقودة ..!
كان الأولى أن تلعب على الأقل مثل المباراة الماضية بياسر وعيسى مهاجمين صريحين بما أن هجومنا كان فيها جيد
بدل ما تتفلسف وتشيل وتحط في مباراة مصيرية ..!
وأنا سبق وكتبت بعد النهائي مع الاتحاد وبعد النصر إني إذا شفت جريتس طلع بتصريح فيه غرور
عرفت إنه بيتفلسف وإننا بننهزم ..!!
السبب الثالث .. الــعــرضــيــات
العرضيات هي مشكلتنا المتأزمة اللي للآن ما لقينا لها حل ..!
يعني أستشهد بأفضل فريق سعودي في العرضيات وهو الاتحاد .. لو تشوفونهم صعب يدخل عليهم هدف
من عرضية .. في المقابل ثلاث أرباع أهدافهم عرضيات وكل ركنياتهم خطيرة ..!
أما حنا للأسف إلى الآن ما عرفنا كيف نغطي الكور العرضية عشان كذا أغلب الأهداف اللي تدخل علينا
تجي من كرات عرضية .. وتكلمنا فيها كثير لكن إلى الآن الخلل الدفاعي الكبير هذا ما تم تصحيحه ..!
أما العرضيات في الهجوم .. أنا أتحدى إذا فيه واحد منكم على كثر ضربات الزوايا اللي تجينا على طول الموسم
إنه توقع إن وحده منها تجي قول ..!! ليش لأنه ما عندنا أي مهاجم مميز في ضربات الرأس ..!
طيب العرضيات أكثر من نصف الأهداف في العالم تجي منها .. إذاً هي سبب رئيسي لضعف تسجيلنا
في بعض المباريات وهزيمتنا في الأخرى ..!
إذا هنا نرجع ونقول نحن بحاجة وبحاجة لـ مهاجم أجنبي يسجل من أنصاف الفرص ويجيد الضربات الرأسية
والله يعدي المباريات الجاية على خير 
من أسباب المهزلة أيضا .. تعرفون إن قطر ولأغراض معينة تبي تستضيف كأس العالم باللي هو به
ومستعدين يدفعون اللي وراهم واللي دونهم ..؟؟!
واللي يلاحظ المباراة الماضية لاعبي الغرافة كانت لياقتهم مش ولابد وسرعتهم لا تقارن بلاعبي الهلال
حتى يونس محمود ما قدر يسبق أسامة ولا مره ..!
في المباراة هذي ومع أن الغرافة لاعب مباراة قبل أربع أيام والهلال مرتاح له أسبوع إلا أنهم دخلوا المباراة
بلياقة خيالية واستمروا يركضون حتى نهاية الأشواط الإضافية وتعبوا لاعبيننا بشكل كبير ..!
ويونس محمود اللي كان ما يقدر يسبق أسامة سبق أسامة في كل الكرات تقريبا 
حنا ما نبغى ندخل بالذمم لكن شيء غريب وألف علامة استفهام تخلينا نقول لو فازوا إن فوزهم غير شرعي ..!
سـبـب الـفـوز .. بعد ما تكلمنا عن أسباب المهزلة نتكلم عن سبب الفوز ..
مع الشكر لكل من قدم مستوى جيد إلا أن سبب الفوز بعد الله سبحانه وتعالى هو هذا اللاعب الفذ :
الله عليك يا كبير .. الله عليك يا نجم .. الله عليك يا فنان
دخل وقلب المباراة فوق تحت وعفس الغرافة عفس
ونشط الهجوم وأرعب الدفاع وسوى الهوايل
صنع الهدف الأول وسجل هدف الفوز وفررّرح شعب بكبره
كم أنت كبير يا طلق المحيا
المباراة الأولى فزنا بالثلاثة والمباراة الثانية كدنا نخسر بالأربعة
لو ناظرت التشكيلة ما تغير فيها إلا لاعب واحد هو عيسى المحياني
يعني لو قلت تواجد عيسى هو سبب المستوى اللي في الرياض محد يقولك غلطان
ولما حضر البارحة والهجوم ضايع والمجهودات الفردية ما فادت وكل لاعب يدور بالكورة
أعطاهم درس ودرس كبير في .. كيف تذهب إلى المرمى مباشرة وتسجل .. 
الله أكبر عليك .. صدق فارس عوض .. كل عقدة ولها عيسى
مدربهم وانهبل  كله منك يا عيسى يا قاسي 
بالنسبة لباقي اللاعبين ..
العتيبي وياسر .. كالعادة مباراة فوق ومباراة تحت ..
رباعي الدفاع سيء بلا استثناء خصوصا في الكرات العرضية ..
الغنام .. ما باليد حيلة وش يسوي لحاله ..
الفريدي .. لا شيء بس أضاع الانفراده ..
نيفيز .. وضح عليه الأنانية وعدم التعاون مع زملاؤة ..
الشلهوب و ويلي .. بذلوا جهدهم وهم أفضل من الباقين .. والمستوى العام سيء
# بالنسبة للدعيع والغامدي .. مثل ما شفتوا احتجناهم في مباراة أمس ..
مسألة تعامل الإدارة مع المدرب بطريقة احترافية أوربية هذا شيء يحسب لهم
وسبقوا غيرهم في هذا المجال .. لكن ..
ما فيه ولا تسمع في يوم إن فريق أوربي مدربهم يخبرهم إنه بعد كم مباراة يبي يترك الفريق
ومع ذلك يعطونه صلاحيات بيع وشراء واستبدال لاعبين ..!!!
هنا الخطأ اللي وقعت فيه الإدارة ..!
المدرب قالكم إني بعد كم مباراة أبمشي .. طيب على أي أساس يقرر مثل ما صرّح هو إنه لن يستعين بالدعيع
وعلى إثر هذا القرار نخسر أعظم حارس في الدوري السعودي ( حتى الآن )
وعلى أي أساس يقرر استبدال المخلص عمر الغامدي مع أنه ما نستغني عنه وشفتوا كيف كنا بحاجته
في مباراة الأمس ..!
عشان كذا أنا أشوف إن الإدارة أخطأت في سالفة الدعيع والغامدي .. لكن عسى العوض بالباقين إن شاء الله
المباراة القادمة
# مثل ما شفتوا ومثل ما قلنا آسيا ليست سهلة بل صعبة وصعبة جدا ..!
لذلك لا بد من تكاتف الجميع وتصحيح الأخطاء اللي ذكرنا سواء في الدفاع أو الهجوم ..!
# على الجهاز الطبي أن يبذل قصارى جهده فـ عودة عزيز ورادوي ضرورة ملحه لتحقيق الأمل
في الحصول على الكأس الغالية ..!
# جماهير الزعيم اللي حضروا المباراة بالذات .. متأكد 100% أن هذي الليلة مستحيل تروح من الذاكرة طول العمر 
جماهير المسيار .. ويا فرحة ما تمت 
امبارح في البالتوك طبعا اخواننا في الله صايرين أحزاب وجماعات لا جمع الله شملهم - رياضيا طبعا
عندهم خمس غرف .. المهم دخلت على وحده من غرفهم وكانت النتيجة وقتها 4 - 0 
طبعا من المفترض إنهم يتكلمون عن مباراتهم بكرة أو عن سبب تعادلهم في الديربي مع الفيصلي
لكن اللي لقيته إن المسياري ما يخلي طبعه وقاعدين يتابعون مباراة الهلال أشد من الهلاليين أنفسهم
والضحكه ما توسع خششهم والسعابيل واصله الأرض 
ومن زود الفرحه كانوا ثلالاثة ماسكين المايك مع بعض !!! مدري وشلون
وكلهم يضحكون مع بعض ووناسة بشكل لا يصدق ..
المهم يوم جاء الهدف الأول للهلال .. يا ستار سترك انقلب الروم فوق تحت وواحد من اللي ماسكين المايك
صرخ بأعلى صوته : رشوووووووووووووه رشوووووه رشوه
كيف بالسرعة هذي كشف الرشوة أنا إلى الآن ما أدري
جاء الهدف الثاني وقتها كنت أتمنى كل واحد منكم يكون هناك تشوفون .. والله ما تسمع إلا الصياح والعويل والبكاء
يا إلهي لهالدرجة الزعيم مسبب لهم أزمه !!!! دخلوا هلاليين بعد الهدف هذا وبعذرهم والله تقطعت بطونهم من الضحك
وهذولا صارو يصيحون من هنا ويطردون الهلاليين من هنا
يوم هدأت الأجواء شوي سأل واحد منهم عن الرشوة وش سالفتها ..! رد عليه واحد وقال ..
إن سامي يوم شاف الهلال انهزم راح للحكم الرابع وعطاه الرشوه < يا سلام عينك عينك
المشكلة مدري وشلون شافه وهو بالبالتوك !! قمر صناعي ذا مهب بالتوك
المهم يقول بعدين جاء سامي ونادى الحكم الأول وخلاه يبدل مع الحكم الرابع < صار بلاتر على غفلة مب سامي
طيب ياخي ما دام سامي لهالدرجة قوي ورا ما رشا حكم الساحة على طول
إلا ورا ما خلى الهلال فايز من دون ما نعلب المباراة ونتعب أنفسنا
المشكلة والشيء اللي يخليك تقول الله يعافيهم ولا يبلانا إنهم مصدقين
خـلّـصـنـا عـلـيـهـم
 | 