هي ليست تورتيلا يا جيرتس ,, بل هي وجبة فطور دسمة ,, ونحن قوم لا نقبل السوشي ؟! [ فضفضة شخص جايع ]
بسم الله الرحمن الرحيم
“ الموضوع يحتوي على مفردات غذائية كثيرة , اللي يحس انه جايع يحاول بقدر المستطاع أنه ما يطوّل في الموضوع  “
أول شيء ,, ما أقول ألا الحمد لله أولاً و اخراً
ولطف الله بنا هو العامل المنقذ في القصة كلها
وجبات سريعة وأخرى بطيئة
- مباريات الهلال ( المجموعات ) في البطولة الاسيوية , مثل الوجبة الشهيرة ( تورتيلا ) ,, ساندوتش صغير ,, طعم ,, وكل الناس حبته ,, لكن ,, لا يمكن تكون وجبة أساسية ,, لإنها تظل وجبة سريعة ,, أصلاً ,, حتى اللي يبي ياكلها ,, ما يحتاج يروح للمطعم وهو جوعان ,, كونها صغيرة ,, وما تحتاج لتخطيط مسبق أو حجز ,, لإنها تكون جاهزة ,, لذلك ,, انت تروح للمطعم وتطلبها وفي ظرف دقايق تجيك وتفرمها فرم ,, والهلال ,, كان متعود على تخطي هالدور تخطي على طراز ( مزمزة ) , تخطى دور المجموعات ( خلوني أقول ) بسهولة ,, وفي نفس الوقت تخطاها بأداء ممتع ,, وبيني وبينكم ,, ذيك المباريات كانت صغيرة ,, وعطيناها حقها ,, لكن المباريات اللي بعدها غير ,,
- مباراة الأوزبك ,, كبرّنا اللقمة شوي ,, وقررنا أننا ناكل من ( عمو حمزة ) ,, ومثل منتم عارفين ,, فيه ناس كثير ما يحبون الاكل ( البحري ) ,, وهذا اللي صار في الشوط الاول في ذيك المباراة ,, فيه لاعبين ما كلوا من عمو حمزة لإنهم ما يشتهون ,, لكن ,, في الشوط الثاني ,, اللاعبين جاعوا ,, وعرفوا أن ما قدامهم ألا سمك وربيان ,, وبالتالي ,, لعب فيهم الجوع لعب ,, وهم بدورهم لعبوا في السمك لعب , عفواً لعبوا في ريفالدو وربعه لعب ,, الجوع كافر ,, والادمي اذا جاع ,, والله لو قدامه شجرة ان ياكلها اكل ,, وشلون لا صار قدامه عيال حمران عطران ,, زي الاوزبكيين ,, يا لبى قلوبهم ,, وش طعمهم
- جينا في دور الـ 8 ,, والسنين اللي راحت ,, كنا صايمين ,, لكن المهم ,, ان حنا مازلنا صايمين عن التأهل لـ ( مابعد هذا الدور ) , لعبنا مباراة الذهاب ,, واللي هي أشبه ما تكون وجبة السحور , وعادة ,, الصايم يدق في السحور دق لين يغني بطنه ,, وفعلاً هذا اللي صار ,, وتسحرنا على الغرافة في ذاك اليوم لين غنت بطونا ,, وبعد فترة بسيطة ,, جا موعد مباراة الأياب اللي أشبه ما تكون بـ ( الفطور ) اللي المفترض أن حنا نمزمز عليه مزمزة ,, اللي صار ,, هو ,, أن الفطور حقنا ,, انحط على السفرة قبل اذان المغرب ,, ولا قدرنا ناكل ,, وطبعاً بفعل فاعل ,, وستر ربي ,, واذن المغرب في نهاية الشوط الاضافي الثاني وتلاحقنا ناكل ,, لكن المهم من اللي عجّل وفرش السفرة قبل الاذان بوقت كثير ؟ 
ها يا جيرتس ,, من فرش السفرة قبل الاذان ؟
لا تصدمني وتقول أنك ما دريت ان حنا صايمين وتحسب الدعوى ( تورتيلا ) وانتهينا ؟
ها يا من كنا نعتقد أنهم فعلاً محترفين وأن نتيجة الذهاب ما تأثر عليهم ؟
لا تجاوبون ,, انا اقولها عنكم
هو الغرور والثقة الزايدة
لذلك ,, ما فيها إحراج أبداً أنكم تصرخون وتقولون :
تعلمنا من الغرافة ,,
- أن إحترام الخصم واجب ( قولاً عملاًُ )
- أن المفاجأت تنتهي مع صافرة الحكم ( قولاً وعملاً )
كنتم تقولون ,, الكرة علمتنا ,,
واتضح أنها مجرد عبارات تقال لا معنى لها لديكم
والان ,, تعلمتم الدرس كاملاً من سعادة الأستاذ : الغرافة
فكل الشكر يا سعادة الاستاذ 
- وجبة ( السوشي ) هي وجبة يابانية شهيرة , ملايين البشر يعشقونها ,, ولكن ,, اللي اعرفه ,, انها ما تمشي عندنا في ديارنا ,, لإن الاخوان اليابانيين يقدمونها ( نيّة ) ,, يعني بدون طبخ ,, وهذا السبب اللي يخلينا ماهنا بذاك الزود عليها ,, جمهور الزعيم ,, ما راح أقول هو ( ملح ) الطبخة ,, لا لا لا ,, جمهور الهلال ,, هو ( طبخ ) الطبخة نفسها ,, وبدونه راح ناكل الخصوم مثل السوشي ,, هو من طبخ ( التورتيلا ) في دور المجموعات ,, وطبخ لنا ( الاوزبك الطعميين مرة ) و هو ما قصر وطبخ لنا الغرافة ,, لكن ,, فيه اللي قدم الطبخة قبل موعدها ,, وهذا اللي حاس الدعوة ,, لذلك , مع جمهور الهلال ,, والله لو يعطونا سوشي ,, ان كان طبخناها ,, والحمد لله على كل حال ,,
MMS
- ( الجنس اللطيف ) قالها الدكتور ,, ما يهم قالها متعمد او بالخطأ او خانه التعبير ,, أيّاً يكن ,, لكن المهم أن الجنس اللطيف هذا هو النصف الاخر للإنسان ,, وقال الحكيم في محكم التنزيل ( ضرب الله مثلا للذين امنوا امرأة فرعون ) ,, لذلك ,, انا ما أدري وين العيب أو الخطأ أو وش السبب اللي اثار المساكين ؟ عالم غريبة ,,
- أهداف الهلال بالامس ,, جت بعد صراع دامي ,, خاضه اللاعبين بقيادة نامي ( لزوم السجع ) ,, المهم ما راح أهضم حقهم بالكامل ,, هو في الأخير انتصروا وتأهلوا ,, واجتهدوا ,, لكن ,, في أوقات معينة ,, أمور تفقدها ( كان بإستطاعتك الحصول عليها ) هي اللي تهضم حقك بالكامل ,, موب حنا اللي نهضم حقهم ,,
- بعد المباراة مباشرة ,, اتصل علي واحد وقال ( أبو راشد ,, أنا عندي ثقة بقدرتك على ربط الامور ,, عندي سؤال سريع ,, وش وجه الشبه بين الغرافة والاندومي ؟ وانفجر ضاحكاً ,, الله يصلحه ) انا طبعاً سكرت السماعة في خشته لإن عليه وقت مدري وش يبي ,, الزبدة ,, أن في اوقات معينة الإستهزاء ماله سنع وشكر الله لابد أنه يكون في المقدمة ,, طبعاً خويي ارسل لي الإجابة بمسج ( كلهم بنطبخون بـ دقيقتين ) ,,
- سمعت وشفت تصريح شبيه الريح ,, وعن تفكيره في ( كنسلة ) مكافأة الفوز ,, بيني وبينكم ,, ما ألومه ,, واللاعبين أنفسهم ,, لو يكنسلها ما راح تضيق صدورهم ,, لإنهم أعتقد حسّوا بالمصيبة اللي سووها أمس ,, لكن ,, وخلونا نتكلم بواقعية ,, وكما يقال ( العبرة في الخواتيم ) هم في النهاية انتصروا وتأهلوا ,, لذلك اعتقد أنهم يستاهلون يا شبيه الريح على الاقل نصف المكافأة ,, الله من اللقافة وانت وش دخلك فيهم 
SMS
- أبو عتب مشغول البال ,, اخبارك ؟ كيف الحال ؟
- المرشدي ضرورة ,, أو عقل أسامة فـ شرورة ؟
- رادوي و عزيز لامنا فقدناهم ,, معقولة بالمحور الواحد نقدر نقول نسيناهم ؟!
صح نسيت اقول مبروك
يمكن عشان مالها طعم نسيتها
أبـو راشـد  |
