يكفي والله العظيم يكفي , إذا ماشفنا عقوبات صدقوني راح يتكرر هذا المشهد سواء عما قريب أو بعيد
السلام عليكم ورحمة الله وبركاتهــ
ألف مبروكـ التأهل فقط !!
أقسم بالله العظيم إن هذي المبارة أسوء مبارة شاهدتها للهلال بتاريخي من ناحية الشد والضغط والسكر , حتى ماأقارنها بمبارة الشارقة أو الأهلي الي خسرها الهلال بخماسية ,, هذه المبارة فيها حساب مجموع أهداف لمبارتين وغير كذا أشوف هدف بعد هدف يدخل من الغرافة في شوط والله كأني أشوف تمرين لأحد الفرق !
آخر موضوع لي بعد مبارة الذهاب ذكرت نقاط كثيرة وتحقق البعض منها أبرزها إن لاعبي الغرافة ماراح يستسلمون وراح يدخلون المبارة عكس مايتوقعه الكثير ..
ماراح أتكلم كثير على الي حصل بالمبارة لأن الجميع شاهد والجميع عاش الأوقات العصيبة لكن لا بد أن يمر ماشاهدناه مرور الكرام ..
أقسم بالله العظيم عشنا أجواء غير طبيعيه أنا ماأدري الي فيه سكر أو ضغط الله يشفيهم إن شاء الله كيف شاهدوا المبارة !!
أنا عن نفسي شاهدتها أنا وثلاثة من أخوياي الله يرحم الي كان حولي من أجهزة وغيرها , كلنا إتفقنا إذا جاء هدف للغرافة رابع ماراح نكمل المبارة وبالفعل بعد هدف الغرافة الرابع طلعنا ولا كملنا المبارة قسم عشنا جو كئيب بالسيارة حتى أخوياي يقولون لاتكلم أحد تسأل على النتيجة أنا ماصبرت كلمت واحد قال لي نفس النتيجة ماتغيرت والحين يبي يبدأ الشوط الإضافي الثاني , أنا صراحة شلتها من راسي إن الهلال يبي يرجع حتى إني توقعت إنها تزيد النتيجة حتى جاني إتصالات والله ماأدري أرد على مين وإلا مين أرد على الأول وإلا الثاني , واحد يقولي ياسر جاب قول والثاني يقول المحياني جاب قول أنا صراحة ماأدري وش السالفة أقول بيني وبين نفسي هذا وقت إستهبال بس أعرفهم بعد هم متعصبين ماظنيت يستهبلون بالوقت هذا , قسم بالله ماصدقت ماأدري وش السالفة على طول رحت لكفي عشان النت دخلت النت وشف الهدفين صراحة سيناريوا عجيب غريب مرهق للمبارة
آآآآآآآآآهـ بس , والله إن مررها الأمير عبدالرحمن للاعبيين راح تكون سقطة كبيرة !!
الأمير عبدالرحمن قال في مكالمته مع الدوري والكأس إنه يكلم سامي بعد المبارة ويفكر يلغي مكافأة التأهل , أتمنى أتمنى أتمنى على الأقل خصم نصفها بحكم المستوى في المبارة الأولى ماعدا بعض اللاعبيين يأخذون المكأفأة كاملة وبوجهة نظري هم [ الشلهوب , لي يونغ , المحياني ] فقط , عشان يحسون الباقين ..
مو جماهير تقطع ألاف الكيلو مترات سواء بمبارة الذهاب أو الإياب في قطر
مو الأمير عبدالرحمن يخسر ملايين الملايين وتروح بهذه الطريقة
يروح كل هذا بالشكل الي شفناه
أتمنى مايمر مرور الكرام الي شفناهـ
وبالنسبة لجيرتس خلاص يكفي المرشدي والزوري لازم يرجعون وخصوصاً المرشدي اليوم شفنا مهزلة دفاعية !!
لعبه بمحور اليوم أمر غريب , صحيح إنه نيته يباغت الغرافة بهدف عشان ينهي الأمور لكن المفروض تلعب بطريقة متوازنه وبالبعكس كل مامر الوقت كل مازاد الظغط على الغرافة لكن !!!!
عموماً الأعصاب تعبانه وماألوم أي هلالي بأي ردة فعل !؟
أمر مهم :
قبل المبارة بساعات فيه موضوع للأخ علي معتوق العمري وقال أمر مهم جداً :
قال إن اللاعبيين مهتمين إنهم يشاهدون مبارة الفريق الإيراني والفريق الكوري الساعة 1 ظهراً
وياسر يتمنى أن الفريق الكوري هو الي يتأهل
هل عرفتم لماذا اللاعبيين مستواهم كان سئ سئ سئ ؟؟
الحمد لله على التأهل وهذا من فضل ربي
وإلا اللاعبيين اليوم خذلوا كل هلالي !
سامحوني والله الأعصاب رايحه فيها ..
