بعد الزعل والنرفزة .. تعالوا نتكلم بهدوء
بســم الله أبدأ وبـه أستعين
السلام عليكم جميعاً
في البداية .. مبروك التأهل الغير مقنع وإن شاء الله انها تكون كبوة الجواد وعلى قولتهم جت سليمة
ماراح أكتب بالفصحى لأن الوضع صراحة مايسمح ..
الواحد مايعرف من وين يبدأ او وين ينتهي ..
خطينا خطوة مهمة نحو اللقب من بعد مباراة صعبة وفريق نشف ريقنا .. ما تلاحظون فرق قطر دايم تنشب !!
فريق الغرافة قدم مباراة العمر او حتى التاريخ بالنسبة له وماتوقع ممكن يكررها مرة ثانية .. لو تعاد المباراة ألف مرة مايخرج الغرافة بهذي النتيجة لكن اللي ساعد الغرافة ان فريقنا كان صفر اليوم .
بالطبع راح نقرأ وقرينا اليوم الكثير والكثير من الإنتقاد للفريق واللعيبة .. بكرة صحفنا المحترمة راح تتحفنا بالكثير من الإنتقاص والتشكيك كالعادة لكن المهم والاهم تحصلنا علية بقي علينا ترتيب الصفوف ومواصلة المشوار .
الكثير من الجمهور او كل الجمهور بالأصح ماكان راضي عن الفريق نهائيا بحكم اننا ماشفنا الهلال اليوم نهائيا .. أن الجماهير تكون زعلانةى حتى بعد التأهل هذا شي طبيعي بحكم ان الفريق اللي يلعب هو الهلال .. الجمهور صار مايشوف الا الثلاثة والخمسة ..اليوم خسارة قوية جدا للفريق بحكم مكانتة وامكانياتة خاصة اننا نسينا النتايج الكبيرة من فترة طويلة من أيام طيب الذكر كوزمين .. اش اللي حصل اليوم بالضبط ؟ ما ادري لكن حمدالله اللي عدت على خير .
.
.
.
.
.
نجي للمباراة والشد العصبي ورفعة الضغط ..
في البداية احب أقول ياسيد إريك ترا والله مو عيب أبد انك تلعب بمحورين .. امس وفي رد لي على موضوع كنت اقول ان الغرافة ماعنده اللي يخسره وراح يهاجم بجنوووون وهذا اللي حصل اليوم ..
خطأ قاتل وفادح وعجيب من خيرات اعطاهم هدف اول ودفعة معنوية هااائلة .. قابلها توهان عجيب او نقول صدمة للفريق الأزرق ..
خط الدفاع والتمريرات اللي بينهم كنا دايم نحذر منها واليوم تسببت لنا بمشاكل كثيرة .. مستوى خط الدفاع بشكل عام ماكان مطمئن أبدا وحتى اللاعب الفعال لي يونج كان مو في الفورمة اليوم وهذا شي مستغرب صراحة .
الغنام الله يعطية العافية قابل خط وسط كامل لوحده بحكم عدم فعالية المساندة الدفاعية من باقي لاعبي الوسط وظهر هذا عليه بعد الإجهاد والخروج مصاب ..
خط الوسط علامة استفهام كبيـــــــرة ؟؟ هل فقدنا القائد الفعلي للفريق ؟ يعني شفنا الفريق يأدي المباراة الماضية بدون رادوي ومابان اي تاثر على الفريق .. لكن أرجع وأقول ان اللعب بمحور واحد كان بداية المشكلة .
خط الهجوم او ياسر بالأصح بالرغم من الهدف اللي يعني من على خط القول سجلة ( استغرب من اللي يمدحون ياسر صراحة بعد المباراة ) كان يمدية ينهي المباراة من الوقت الأصلي وبدون تعب ولا حتى نتيجة بهذا الشكل .. فرصتين زي مايقول عامر عبدالله ( انا ما أصدق ).. لكن نقول العوض في الجايات .
اما المركز المهم والاهم حارس المرمى .. فـ يا كبتن حسن .. يا شاطر ويا بطل .. زي ماصفقنا المباراة الماضية لك نقولك سيئ في المباراة هذي .. ولكن عساها قرصة اذن ونشوفك كما عهدناك في باقي الأستحقاقات
ماكان ودي أقيم اي لاعب في الفريق فيه اللي افضل واعرف مني لكن الفريق بشكل عام كان سيئ .. نيفيز كان الأفضل قبل الخروج في نظري ودخول عيسى أعطى روح للهجوم الهلالي .
لا للفرح اليوم فأمامنا آسيا اللي تحتاج مستويات أقوى بكثير من اليوم وما تحتمل أي هفوة أو خطا في قادم المشوار ..
أتمنى ان مكافأة الفوز تعلق حتى مابعد المرحلة الجاية اللي راح تكون قدام فريق قوي .. وقوي جدا على أرضة فـ لا الفوز ولا المستوى اليوم يستحقان المكافأة
بالرغم من مباراة اليوم الهلال يتأهل وهو بأسوا مستوى .. إذن نقول اننا قادرين نصحح وضعنا ونحقق البطولة متى ماكنا في يومنا ومستوانا الحقيقي مافي فريق من الباقين ينافسنا .. فالهلال ينافس نفسة الآن وثقتنا في الزعيم كبيرة .
الفريق بحاجة لوقفة صادقة وصريحة بعيدة عن التجريح بقدر ماهي بعيدة عن التطبيل أيضا ..
إن أصبت فمن الله وإن اخطأت فمن نفسي والشيطان .. في الآخير كل ماكتب هو وجهة نظر تحتمل الخطا والصواب أتمنى ان اكون وفقت في نقلها لكم
همسة اخيرة :
وينك اليوم ياجيرتس !!
في طوكيو بإذن الله نلتقي على خير
اخوكم / خالد  | 