فكرة: سندريلا الهلال
اعداد وتصميم : الهنوووف + عسيريه

لنا من كل عام شهر فضيل ..

أعاده الله علينا وعليكم وجميع المسلمين بالخير واليمن والبركات

وكل عام وانتم بخير

**][يوميات رمضانية 1431 هـ ♥][ **

لقد عدنا اليكم .. تحملنا الاشواق للقياكم .. ونسعد ان نعيش معكم

. في سلسلة تحمل بين طياتها يوميات الأعضاء الرمضانية من كل عام
هذه السلسلة أنتم أهل بيتها ونحن ضيوفا في حضرتكم ،،،

♥

أهلا وسهلا بكم أحبتنا
ودعونا نرحب سوية بالضيف" التاسع
الاستشاريه المتميزة الهنوووف
لكي تحكي لنا احداث يومها مع شهر رمضان المبارك

ماهو رمضان بالنسبه لك ..؟
رمضان لايحتاج لـ حروف تصف مشاعرنا لانه مشاعر تعجز عنها الحروف
(متعوب على هالجمله ترا :$)
يمتاز بـ روحانيه تنعدم في غيره من الشهور .تطرب به المسامع من تلاوات المساجد
اجتماع بعد تفرق ( كثير من المنازل لاتجتمع الاسره على مائده الا في رمضان )
مشاعر مختلطه اراها في اوجه المصلين كبار وصغار نساء ورجال بتسارع خطاهم للمسجد

برنامجك اليومي في رمضان ؟
طبعا لاني انام متاخره فـ الغالب اصحى من النووم على العصر
انزل تحت اذا فيه شي اسويه بالمطبخ
ولان مافي البيت الا انا وامي وابوي فـ فطورنا خفيف جدا فـ نادرا الاقي شي
و اذا ببالي صنف او حلى اسويه الصبح او بالليل
اذا مافيه شي اسويه اروح اجلس وطبعا يـ ( اقرا قران او اتصفح النت او جريده )
بعدين نجهز الفطور بعد الفطور اشيل المواعين للمطبخ
بعد الصلاه بشوي نحط العشاء يكون خفيف شوربه وسمبوسه تقريبا
طبعا انا حسب المزاج اوقات اتعشى اوقات لا
الساعه 8 مساء نبدا نستعد للصلاه بالمسجد
طبعا بعد الصلاه نكون جالسين ومو حريصه على الطلعه
لاني لو طلعت ماراح ارجع قبل 12 الي هو موعد المسابقه
بعدين انشغل بالمسابقه
على الساعه 2 ونصف كذا ابدا بـ زر التحديث انتظر اليوميات
علشان ابدا اجهزها قبل موعد السحور
( وعلى طاري اليوميات ياليت الي له مشاركه معانا يحرص يرسلها قبل الساعه 2 علشان نقدر بدري )

اذا خلصت السحور وباقي شي ماجهزبـاليوميات اروح اكملها
ومعاناتي دائم تكون بـ اختيار العنوان وخليتها معااناه لعسيريه ايضا
بعدين اصلي الفجر واقرا قران ب(اللهم لارياء )
بعدين ارجع للنت مع البنات او اتصفح لما ادوخ وانام انام 6 او 7 او 8 او 9 حسب المزاج

ماهي اكلتك ومشروبك المفضل في رمضان ؟
احس بـ رمضان مالي اطباق معينه احبها ولكن افضل من الاشياء الموجود
المشروب افضل الفميتو
الفطور احب سمبوسه الصغيره الي بالجبن :$
العشاء سمبوسه او شوربه بس اذا فيه خبز حار اوتميس اذا مافيه مااحبها
السحور اذا رز ربيان عادي لاننا مانحطه الا برمضان فـ اكله
او اسوي لي شي او اخذ من برا

متى اول مره صمت فيها .واذا عندك مواقف مع الصيام اذكرها؟
والله مدري بالضبط بس اكيد بعد 7 سنوات و صيام الشهر كامل
على مااعتقد بثالث ابتدائي او رابع
مواقفي مع الصيام
لما كنت صغيره انا وبنت عمتي وولد عمتي طبعا كل واحد في بيت
كل يوم اتصال بينا العصر نشوف من صام واخر الشهر نشوف اكثر واحد صام

وعلى طاري الفيمتو زمان واتوقع كثير مثلي مانحس اننا شربنا فيمتو
الا اذا طلعت لنا شوارب

موقف لاينسى حصل لك بـ رمضان..؟
احس مواقفي قد قلتها ولكن لايمنع اني اكررها
لما كنت صغيره كنت اشوف امي تقلي السمبوسه واتحمس وش هالي نحطها عجين ونطلعها شكل ثاني ومقرمشه
واجي بكل ماوتيت من قوه واخذ حبه من السمبوسه وراميها بالزيت
طششششششش لزيت بوجهي
طبعا اثر على وجهي وقتها بس مع العلاج الحمد لله راح على طول وبدون اثار

وموقف الثاني
لما خلصت صلاه بالمسجد ماحصلت الا جزمه وحده والثانيه ضاعت
وماكان عندي خيار الا اني ارجع البيت بجزمه وحده
وانا امشي احس اني سندريلا الحاره (وش زود توم كروز حاره باسكن )
وانتظرت فارس الاحلام يجي يقول ضايعه لكم جزمه
و لقيتها اليوم الثاني فتحطمت وقلت بنفسي انت وين وسندريلا وين

كيف نظامكم واجوائكم في رمضان ونظامكم بالفطور والعشاء والسحور.؟
الفطور : تمر + فيمتو+ قهوه + (بف باستري او لقيمات او اي صنف بسيط )
العشا : بعد صلاه المغرب نحط شوربه + سمبوسه وبعد صلاه التراويح يكون فيه مكرونه او شعيريه
السحور : الغالب رز ربيان أو رز دجاج او اي شي

هل ترى اختلاف بـ رمضان في السنين الماضيه عن السنوات الاخيره واذا نعم وش الاشياء الي افتقدتها.؟
مافي فرق كبير بالنسبه لي الا اني كبرت وماصرت اشوف بابا فرحان
يمكن اول الناس تنتظر رمضان علشان العباده الحين علشان المسلسلات للاسف
الي فقدته صيامنا بـ مكه كنا اول كل سنه نروح لنا كم يوم وغالبا العشر الاواخر نصوم هناك ويكون فيه ناس من اقاربي

هل تفضل الصلاه في المسجد القريب من بيتكم او تميل للتنويع ومن القاريء الذي تحرص على الصلاه خلفه في رمضان؟
للاسف اغلب المساجد الي ودي اصلي فيها بعيده عن بيتنا ومستحيل اروح مع السواق
و ابوي مايحب يصلي بمسجد بعيد فـ اصلي بمسجدنا واذا غيرت
رحت المساجد القريبه شوي ولكن بسياره
القراء الي ودي اصلي معاهم الجبرين الدوسري القطامي ولكن مشكلتهم الزحمه

رسالة في هذا الشهر المبارك .. لمن تبعث بها وماذا تقول فيها .؟
الرساله الاولى لـ للجميع رمضان فرصه للتغير والتقرب لله فـ لاتتهاونون في هالايام
تدرون ان السلف كانوا يدعون الله ستة أشهر أن يبلغهم رمضان
ويدعونه ستة أشهر أن يتقبل منهم رمضان
وحنا يروح رمضان ويجي رمضان وحنا على نفس ماكنا عليه
فـ قراءه القران من افضل العبادات في رمضان فـ احرصوا على القراءه وختمه
وصلاه التراويح استغرب تهاون الكثير من الشباب والبنات
نصف ساعه من وقتك ماارح تاخرك عن شي ولكن بتضيف لك اجر قيام ليله كامله
والله تحرمون نفسكم من هالاجر ومن روحانيه رمضان انا اعتبر الي مايصلي التراويح ماحس برمضان

رسالتي الثانيه لكم ايضا رمضان فرصه للتسامح
فـ من اخطات بحقه فـ اتمنى يسامحني ويلتمس لي العذر

نبي صوره تلتقطها لنا من يومك الرمضاني المجال مفتوح لك..؟
كنت مشتهيه دجاج مشوي وسويت هذا لاتحسبونه محترق حاطته بالشوايه
وطعمه حلووو -->كل شي تسويه لازم تقول حلووو





يوميات رمضانيه

السلام عليكم ورحمه الله وبركاته
هلا وغلا فيكم
يومياتي اليوم بسبب اعتذار العضو رقم 20
عن اليوميات وجاني تقريبا رفضين فـ تحطمت فـ قلت انزل يومياتي انا اختصار للوقت
ولكن لما فكرت انها يوم 20 هونت استغفر الله فيني عقده الارقام والالوان
مااحب اختار لون او رقم عشوائي ومايمثل لي شي
فـ غصب ابي رقم 9 لان هالرقم يمثل لي كم شي حلو اولها سنه ميلادي
وثانيا احترامي لـ من كان يحمل هذا الرقم في زعيمنا
لحظتها جلست افكر وعسيريه تقنع فيني تقول خلي ختامها مسك ورقم ياسر ولكن لاجدوى
فجلست اراسل عضوين وابدل بينهم لما حصلت على هاليوم عاد انا لابغيت شي خلاااص لاياس مع الحياه
واحب اشكر اخوي ابراهيم (بالانجليزي )
لاني ازعجته معاي واستحيت من طيب اخلاقه لاني غيرت يومه مرتين يمكن واخرتها اليوم غيرت له

واتمنى ان يومياتي تكون خفيفه عليكم واعذروني احس اني ماعرف اسولف ولا اجاوب على اسئله -->وش تعرفين له اجل

قبل ماابدا يومي بسوي مثل الروايات واقولكم ابرز التفاصيل
امي مسافره هي وخالاتي لـ مكه لمده يومين وتعتبر المره الاولى بحياتها تسافر بدونا
سفر امي حسسني ان الطبخ والاشغال كلها تهون عند المسؤليه
مع ان اختي معي وحسيت بحجم المسؤليه الي على الامهات
على طاري الامهات
اجدها فرصه يمكن ماتحصل لي قبل العيد اني اقولها بخصوص الهدايا
لاتنسون تشترون لـ امهاتكم وابوانكم هدايا العيد ترا هم اولى من غيرهم
ولها تاثير حلو
وايضا الخدامات او السائق متغربين عن اهلهم حلوو نحسسهم بالعيد
والاطفال طبعا مايحتاج

هاليومين ذابحتني الانفلونزا
فـ نصيحه لكم لاتشربون بارد ولاتجلسون عند المكيف
ترا اذا مرضتهم وبرمضان بتكرهون حياتكم عذاااااب تحس حلقك ناشف ويتقطع وماتقدر تشرب مويه
وشسمه اشكر عشقها هلالي وماهينور وهلاليه والشيهانه على وصفاتهم


الساعه 12 الليل كنا ببيت خالتي فـ رحت الصاله علشان انزل المسابقه
وكل شوي قريبتي صغيره تجي عندي تقول يالله تعالي هناك ينادونك
وانا مااحب احد وانا متحمسه في شي يقاطعني
وماتعودت على صغار عندي
وكل شوي اقول طيب روحي وبجي وتروح وترجع تقول موصيه علي


رجعنا البيت على 2وثلث
دخلت النت اشوف وش الجديد وابدا بـ زر التحديث انتظر اليوميات
بعدها تسحرنا

بعدها جاني اتصال من امي وقلت اني تعبانه مع اني غبيه اعرف امي حريصه بزياده
وقالت حرارتك نزلت قلت مدري قالت شلون مدري(باسلوب معصب )
طبعا امي الله يهديها ودها تطلب منها اي شي لو بااخر الدنيا ولاتقول لها
ان فيه شي يعورك لو كان بسيط ترتاع بسرعه وتوسوس وماتحب المستشفيات


بعدين قبل ماياذن لاني خفت يتكرر لي معاناه امس رحت اخذ
عسل وليمون وزيت زيتون

صليت وجلست انتظر هاليوميات وكنت مرهقه لاني مانمت امس الا ساعتين تقريبا
وجاني الفرج من عسيريه(الله يحفظها ) وقالت انزل اليوميات قلت ايييييييييه تسوين خير
جلست اقرا قران طبعا محدده لي عدد معين اقراه الفجر والعصر
واحس باارهاق بس خفت انام واصحى بدري فـجلست الى الساعه 7 ونصف
وبعدها نمت
ماجات الساعه 10 الا انا مصحصحه
وجلست اتقلب اتقلب الى بعد العصر بعدين قمت
الغريب اني امس مانمت الا شوي كيف نمت ساعتين بس وصحيت
ومشكله مااحس انه ارق لان الارق يكون فيك نوم بس ماتقدر تنام

قمت العصر وانسدحت شوي بعدين قمت اسوي قهوه وبعدها قريت الجزء المحدد
لـ العصر بعدين رحت اسوي حلى وهالحلى طبعا حالته صعبه سويت 24 حبه
لان بيجونا بنات خالتي وطبعا كل حبه تسويها لحالها
فـ اذن المغرب وانا بالمطبخ وابوي ينادي رحت بسرعه خذت تمره ورجعت اكمل
ومشكلتي لابديت بشي احب اخلصه مااعرف اوقف واجلس اكمل
راح ابوي المسجد وانا ماخلصت
الله لايعيده من حلى بس كان النتيجه حلووووه بوريكم بعد شوي صورته

بعدين صلينا وجلست ماكنت انا واختي نبي نتعشى وجا ابوي قال تبون خبز حار
(الي هو تميس ) اجيب قلت لا مايحتاج
صح ان ودي فيه لاني احبه مع الشوربه بس مشوار قلت مشوار قال لا قريب وراح يجيب
وجا وحطيت عشاه وحطيت لي معاه شوربه لاني ماحبيت انه يتعشى لحاله
خصوصا انه متعنى يجيب خبز

وبعدها اتصلت خالتي من بيت جدتي تقول تعالوا
قلت بيجون بنات خالتي قالت تعالوا كلكم تقول بنتي تبيك (بنتها عمرها 4 سنوات )
هالبنت غريبه تحبني حب عجيب بدون سبب ومستحيل تسلم على احد غيري
وتكره اختي وبنت خالتي بدون سبب هالبنت دايم تجرح كبريائي
مشكله كاني لاجيت العب معاها مجرد انها تسلم علي وخلاص بس نفسيه كذا دايم اقول الله يرزقني بواحد يحبني كثرها
طبعا هالكلام مو غرور ولا امدح نفسي تعاملي مع الصغار يعتبر حلوو
مايتعدى اني اسلم عليهم و اسولف شوي اعطيهم وجه شوي يعني احسسهم انهم ناس معنا
مشكله لاعطيتهم وجه بزياده صاروا قلق ويحرجونك اوقات
اتذكر مره لعبنا اونو ودخلتها معنا اليوم الي بعده بالاستراحه تصيح
تقول خل الهنوف تلعب معي اونو حاطتن راسها براسي

بعدين صليت التراويح ولما جيت جوو بنات خالتي وتقريبا جلسوا الى الساعه 2ونصف هالوقت يتخلله سواليف واكل
هذي صورة الحلويات والحلى ابوكاسات الي سويته انا


ترا طعمه حلو بشهاده البنات وشهادتي طبعا اصلا مايطلع مني الا الزين
-->
وعساكم صايمين وانتم تقرون يومياتي علشان تشتهونه -->شريره
حاولت اصوره بصور واضحه وابين مكوناته بس ماضبط
ترا من تاليفي فيه اوريو وشعيريه باكستانيه وجالكسي
حاطه لكم صورتين من طبخاتي بتحسبوني سنعه
بس الصدق ااحيانا ودي اسوي بس اهلي ماياكلون فـ ماتشجع
يعني عادي اسوي حلى وصينيه صغيره يجلس اسبوع
ودي اطبخ لـ بيت كله شباب احس لو تحطين اي شي ياكلونه -->بتنجلد

طبعا مالقيت اكشن ولا شي بيومياتي
ومافيه الا بنوته اصورها وابلشتني ماتبي اصور وتحط يدها بوجهها (تتغلى طبعا )
واخذها لغرفتي يقالك اغريها لانها تحب ارقيها لغرفتي
وماش البنت تثبت دقيقه وتتحرك والتقط لها صور بكل الوضعيات


وبعدين راحوا وتسحرنا وكتبت لكم اليوميات يمكن ماتكون قد المقام
ولكن هذي تفاصيل يومي بدون مبالغه
وتراني مانمت الا 4 ساعات متفرقه في 48 ساعه
اذا ماعجبتكم حطو قل النوم عذر

كل الشكر لمن شاركنا بهاليوميات ومن تفاعل بالتعليقات
ودعواتنا لـ والده اخونا عادل وللغاليه شوق الكويت

واختتم بالهنوووف كانت هنا وتقول انا احبكم
(احترت اقول انا احبكم او اختم بمقولتي دائم فلاتدققون )

كل الشكر

لـلمميزة **][ " الهنوووف " "♥][ **

وانتظرونا غداَ

مع المتميز I B R A H E M

أرق التحايا وأطيبها من

مشرفي واستشاري

المجلس العام