بصراحه ما احب انسخ رد لي واحطه في مكان ثاني, لكن هالمره شكلي متكسل مره اني اكتب شيء جديد..

الموهم لا تدققوا مره في بعض الكلمات, خذوا المفيد "اذا لقيتو" وارموا غيره...













صباح الخير



بعد تصريح فالدانو بـ إغلاق سوق القادمين فُتح لي المجال إني اتكلم ولو شويه..
الوضع مع التصريحات والاشاعات والانتقالات مايأهل الواحد يقول كلمتين على بعضها اصلا...

عموما..






شكل الفريق اصبح شبه واضح المعالم "عناصريا", الالمان الجدد والارجنتيني والبرتغالي والاسبانيان..ان شاء الله مانسيت احد من كثرهم..
توقعت من مورينهو تعاقدات في الوسط اكثر من اي خط ثاني...هذه اللي دائما نشوفه من مورينهو مع فرقه السابقه
زخم كبير في الوسط لـ تعدد الخيارات لديه, عند وسط قوي تمسك المباراه...انتهى
عن نفسي توقعت ظهير ايسر مع بداية الانتقالات...لكن مارسيلو اشوفه قادر انه يتقن هذا المركز بكل جداره
الولد عنده الامكانيات والموهبه, كل اللي ناقصه التوجيه وهنا يجي دور مورينهو...
مستوى مارسيلو في الوديات ايجابي بقوه, ويدل إنه قادر اننا نشوف ظهير ايسر على مستوى عالي قريبا
فـ مااشوف داعي لـ تعاقد الظهير الايسر إلا لو كان بديل لـ مارسيلو..لأسباب كثيره لكن اهمها راح اذكرها بعد شويه..
المشكله الكبرى في ديرينثي, او خليني اقول المصيبه ديرينثي...! الوضع جدا صعب لو اصيب مارسيلو الموسم القادم...!
نعتمد على ديرينثي في مركز حساس كـ الظهير..! مصيبه من جد والله يعيننا على ذاك اليوم..


في سبب مهم جدا ونقطه اتذكرتها من فتره مع النظر لـ تعاقدات الدفاع هذا الموسم.. وليش مانتعاقد مع مايكون و كارفاليهو و ظهير ومن هالموال..
نقطه ذكرها الغالي محمد الالماسي بداية الانتقالات... وهي انه الترميم الدفاعي من الافضل انه يحدث على دفعتين في ميركاتوين.
ميركاتو ترميم الاساسي...وميركاتو تقييم البدلاء والتعاقد مع اخرين اذا احتجنا...
صعب تجلب ثلاث او مدافعين اساسيين دفعه واحده وتخليهم يقودوا دفاع الفريق...راح يكون الوضع صعب ومعاناه مستمره في الدفاع..لأنه هالمركز بالذات يحتاج
من العناصر انها تكون متفاهمه تماما,تعاقدين في الدفاع ومراكزهم اساسيه راح يصعب من مرحلة التأقلم والتفاهم بين الاثنين وبين الاثنين الاخرين في الخط الخلفي..
صعب تزج بـ مدافعين جدد على الفريق وتتوقع من الدفاع يكون سد منيع في اول موسم..
تعاقد اساسي واحد هذا الصيف مثل كارفاليهو كافي...الصيف القادم اذا احتاج الفريق تعاقد اخر في الدفاع مو مشكله
راح يكون كارفاليهو في هذه الحاله متفاهم تماما مع بقية الخط والفريق وماراح ياخذ وقت اصلا..
واحد اهون من اثنين او اكثر..واصلا قده دفاعنا بالقوه متفاهم مع التغييرات اللي صارت الموسم الماضي من كثر الاصابات...




اللي مستغربه من جد من جد من جد....اللي قوي عين وبدأ في تقييم الفريق و نقده...!
من جدكم..؟ لا لا تستهبلوا اكيد... الوضع لسه باقي تجارب,,, وراح يستمر تجارب لـ فتره مو قصيره..
أختلف قليلا مع اللي قالوا انه الفريق راح يضبط بعد شهر او شهرين حتى....الوضع راح يحتاج اكثر من كذا بكثيييير..!
المسأله مو سهله ابدا...مدرب جديد هذه لوحدها تحتاج لـ وقت طويل جدا حتى يتشبعوا اللاعبين من تكتيكه
ويتأقلموا مع الوضع الجديد مع مدرب جديد وفكر جديد ومختلف تماما...!
هذا غير اللاعبين الجدد, ومراكزهم اللي اغلبها في الوسط...صح انه مو مثل الموسم الماضي لكن مو فرق كبير.
عشان اخليكم في الصوره, تذكروا معايا موسم مورينهو الاول مع الانتر...بكل صراحه موسم عك وطحن مو طبيعي في التكتيك واللعب..!
الموسم هذا اتوقع نفس الشيء...تخبط ومافي نهج معين وعك كروي على كيف كيفك..

الفريق راح يحتاج وقت اكثر من شهر او شهرين الين ما نبدأ نشوف الملامح الاساسيه لـ فريق مورينهو....فقط ملامح..!!
فـ إذا إنت ياعزيزي القارئ من النوع اللي ماتقدر تصبر وتغضب بسرعه وتنتقد كل من هب ودب في اقرب فرصه
رجاء لا تجدد اشتراكك في الجزيره...ولا اقلك اصبر الين الدور الثاني بعدين جدد.. يمكن راح يعجبك الوضع
ولو شويه وقتها....اما في الشهرين الاولى:ابتسامة4: ما انصحك تتابع الريال.




اخيرا



الفريق الان متزن عناصريا, فريق يملك افضل اللاعبين على مستوى العالم, الخيارات متعدده وتوقع خطه اصبح شيء اقرب للمستحيل...!
الواحد فعلا يحتار في توقع التشكيله أو الرسم التكتيكي اللي راح يتبعه مورينهو, حتى من الوديات ماقدرنا نعرف اي شيء عن التكتيك
سوا انه في تعليمات واضحه بالضغط على حامل الكره...بس!! الباقي كله خرابيش وتفكير بيليغريني المتعلق في اذهان اللاعبين...!
مثل ماذكرت الصوره اكتملت للفريق عناصريا فقط...اما التكتيك والخطه اللي راح يتبعها مورينهو بدري عليها
راح يتم تجريب كذا خطه وكذا اسم حتى في مباريات الليغا, راح يخطئ ويصحح الخطأ.. راح يقرر ويتراجع عن قراره راح يفتي ويعتذر
لكن مع الوقت والصبر راح نصل للفريق اللي نأمل برؤيته, وراح نجني ثمرة صبرنا..
لكن لازم نغير عقليتنا شويه, ونكون واقعيين شويه ونفكر بـ عقولنا مو بـ شيء ثاني...


عناصر الفريق يتمناها اي مدرب, مورينهو قال ان الاداره ماقصرت معاه في شيء, فـ لايجي احد بعدين
ويتهم الاداره بـ أي شيء لاحقا...الاداره قامت بدورها بـ أكمل وجه..الباقي على اللاعبين والمدرب والتوفيق من عند الله...


















لي عوده بعدين يا المشجع المثالي على ردك الحلو اللي حطيته....إيوا انت مافي غيرك