الحمد لله

كيف الحال إخواني الزعماء وأخواتي الزعيمات

بما إن لي أكثر من عشر سنوات بلا رخصة وربي ساتر علي صكت براسي أصير سائق نظامي وتصدقون عاد ماعمري خذيت قسيمة ولا حد يقول محظوظ

سبحان الله أحس وجهي من النوع الحلوف كل ماشافني عسكري قال بريء هذا أكيد معه رخصتين مو رخصة

لكن وأنا أقدم شفت بنات مدري وش يبون وللحين مو فاهم وش يسون معقوله يبون رخص مدري المهم كانوا معنا ولافهمت ولاحاولت أسأل لأن اللقافة قرافة

ملحوظة : كانو معنا بالتقديم بس بالقيادة والإختبارات ماشفتهن فلا حد يطب ويقول وراك صرت تصرف من كيسك


ماعلينا منهم بعد ماخلصت كل شيء جا الوقت اللي يركب معي عسكري ويعطيني تقييم بإختبار القيادة قبل أدخل إختبار الإشارات

طلعت السيارة وجيت ابشيك على الكفر مسوي نظامي قال العسكري أقول تعال بمشيك بالتأكد من سلامة المركبة بس خلصنا

حسيت إني نشبه وعلى نياتي

المهم وأنا أسوق قلي بسرعة أوصل للمكان هذاك وأشرلي على مكان شوي بعيد

وأدوس أدوس أدوس إلا بمصري مدري من وين طلع إلا وهو بوجهي

ياربي بغيت أدهسه بس شوماخر بصراحة تفادى الموقف وقبل هذا وذاك قدرة الله فوق كل شيء

قعدت أطالع بوجه العسكري وأضحك قال إطلع ناجح

ههه موقف مرة فلة وقعدت أفكر لو صكيت ذا الآدمي وش بيسوون فيني

بعدين أنا المخطي وألا وهو راقد ويكلم بالجوال وطلع من بين سيارات بوجهي

والله لو ماني عارف إنه جاي يبي رخصة كان قلت حركة منهم يبون يشوفون ردة فعلي في مثل هالمواقف


خالي والرخصة


يقول خالي مدري ليه لامريت من عند نقطة بدون رخصة يقولون الرخصة ولا صارت معي الرخصة ماحد يسألني ولايوقفني

قسائم للمشاة

اليوم وأنا رايح للبوفية كنت أمشي بنص الشارع ومعاكس طبعا على رجلي مو بالسيارة وأنا أمشي مرت دورية ههه من الخوف بغيت أخش بالشجر اللي بين المسارين بس تخيلو في قسائم للمشاة ههه واحد واقف بالشارع

على طول وقوف خاطيء

إشاراة مالها داعي

وأنا بالديرة في إشارة جديدة ركبوها مدري حاسس إنها حاطينها زيادة ولا حركات توقف عندها لحالك بوقت الذروة عاد بآخر الليل لو توقف ساعتين ماحد مر

الغريب إن هالإشارة يوم جيتها قفلت وصارت حمراء

أطالع فيها قلت للشباب اللي معي من جدها هذي ولا تمزح

الصراحة قطعتها وندمان وودي أروح أبلغ على نفسي وأقول إني قطعت إشارة



أمنياتي للجميع بقضاء وقت جميل مع هالموضوع السريع وأعتذر إن لم يكن موفقاً كتبته بتلقائية بعيداً عن الإنتقائية للكلمات .