نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة

الـمـشـاغـب · #10 29/12/2009, 04:12 AM

هلا بريماكس مسحّب الحكومة

ما ألومك إذا ما طلبت منهم الإثبات خصوصاً أن اسم ( المباحث ) يخوّف الله يكفينا شرهم

بس ثاني مرة اطلب منهم قبل كل شي الاثبات ..
في قصتك حسيت أنهم لا مباحث ولا هم يحزنون .. يمكن شافوك مزيون وحبوا يكلمونك

وعلى حسب علمي البسيط .. أن الجوال واللابتوب ما يحق لأحد تفتيشه إلا بإذن من فوق سواء كان مباحث أو هيئة أو شرطة ..!

قبل 4 سنوات تقريباً كنت في بيت واحد من الجماعة .. وجاني ولدهم الكبير وهو أصغر مني يقول : " ترى تهاوشنا أنا وأخواني مع عيال في الحارة ونبي فزعتك"
قلت : " يا أخي وشوله المشاكل بروح أصلح بينكم " << حكيم في مثل هالمواقف

مالكم بالطويلة .. دق باب البيت وحسبناهم هم .. لأن واحد منهم راسه طالع منه نافورة دم

فتحت الباب أنا .. وطلعوا البحث الجنائي وطالبين أسامي الأخوان الثلاثة بالاسم ..
ناديت العيال بعد ما طلبت الاثبات .. وطبعاً ما قريت الاثبات لأني أول مرة أشوف مثل هالبطاقة وإن شاء الله آخر مرة ..

بغوا العيال يركبون معهم في السيارة لكن العيال رفضوا وقالوا بنمشي وراكم للقسم .. عيوا البحث .. لكن أصرينا أنهم ما يركبون لأن بطايقهم مع البحث والبيت معروف ويقدرون يجيبونهم في أي وقت هذا غير أن المشكلة بين طرفين وما بعد ثبت من الغلطان .. بعد شد وجذب وافقوا بأن يركب معهم واحد من العيال ..
المهم انتهت المشكلة بعد ما قضوا ليلة واحدة في الحجز أو الأحداث والله مدري وين خذوهم بس الظاهر أنهم ناموا في الحجز

اللي أبي أوصل له .. أن الواحد لازم يعرف وش اللي له وش اللي عليه .. فيه نظام يحميك كمواطن .. لكن الكثير منا ما يعرف هالأنظمة ولا يسأل عنها .. وهذا اللي مخلي الهيئة والمرور أكثر من يخالف الأنظمة ..!