نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة

Queen of Hearts · #1 18/12/2009, 06:01 AM

في بيتنا ..

سلام عليكم , اول مره يمكن اكتب بهذا الاسلوب في المجلس وعساه بس يوصل الي ابي اوصله لكم !

اعتقد ما فيه بيت حالياً يفضى من الخدم سواء شغالات والا سواقين وفي بعض مكاتب
الاستقدام عروض حلوه خدامه وسواق

طبعا مهوب كذا من باب الله معطينك الا علشانه رجلها
وتبلش بهم بعدين ويمكن يولدون عندك

على سالفة الولاده .. اذكر وحده من البنات تقول سواق خالتي طلع زوج شغالتنا بعدها بفترة
بسيطة اكتشفنا انها حامل

شلون قعدو مع بعض ماندري .. وبعدها بفترة بسيطة طلع لها ولد

يشتغل هنا ويبي يشوف امه .. قلت لها الهنود عادي عندهم بكره تلقينهم قد بنو بيت جنبكم
و3 وبزارين معهم خخخخخ

ووحده من عماتي عندهم شغاله الظاهر عمرها 100 وشوي .. تقول مره من المرارير وهم
يغسلون الحوش يدورونها مالقوها

.. قالو يمكن راحت المطبخ وتجي يحترونها ساعة ساعتين !

وين ذي طست ! .. ويروحون يدورونها شوي يلقونها طايحه ورا الحوش مغمى عليها ..

وطبعا عمتي دقت على طول 911 حقنا

ووصلو بعد كذا ساعة < لزوم الخدمه السعودية ..

وودوها .. بعد الكشف يقول الدكتور هي مرهقه ! .. شلون مرهقه بالله وهي توها صاحيه
ونايمه نومت اهل الكهف

!!!! .. قلنا لها سفريها وجيبي وحده بدالها قالت لا خلوها تسترزق !

النية الطيبه مننا احيانا مع الخدم حلوه

.. لكن بعض الخدم ما يستاهلون

.. اعطيكم سالفة بعد !

صديقتي تقول عندهم سواق مهايطي !

.. ينفخ عليهم يضرب عيالهم الصغار .. ولما يجي
ابوهم يقعد يبكي

يقول بابا انا ما فيه سوي انا مسكين كلو بزوره يضرب انا .. طبعا صديقتي
مفهيه

تقول ذا نصاب يتمسكن قدام ابوي وطبعا ابوها قلبه طيب ويرحمه يقول خلو ذا الضعيف
ما ترك ديرته الا يدور لقمة العيش وش فيكم عليه

! .. وهذا السواق استمر على هالمنوال لين
مره صاده خالها

وكفخه كفخه كفخه ووداه القسم .. بعدين رجع لهم وتاب يسوي ذي الحركات ! ..
بس اكيد النفس مهيب طيبه عليه

..

نجي لسوالف الخدم الي تضحك ههههههههه

..

اذكر مره حاظرين زواج وطبعا كل وحده تمشي ووراها بناتها طابور رازتهم يعني شوفو بناتي

وورا هالبنات شغالتهم شايله عفش البيت

!! .. لكن هذا شي عادي وتعودنا عليه .. لكن ان
الشغاله تصير احلى من البنات وامهم مشكلة

! .. وزود على كذا مسوين لها مكياج

!

اغلب الخادمات يحبون يجلسون مع الجدات

.. سوالف ونفس طيبه وما يكرفونهم كثير مثل
بعض الناس

.. ومن خلال جلستهم يتعلمون بعض الكلمات الي احيانا ما ودك يعرفونها مثل
العيارات

.. فشينه تصحين من النوم يا اختي الكريمه وتناديك الشغاله بعيارتك الي يقولونها
اخوانك

.. فوحده من البنات تقول لنا اخوانها يسمونها " عليبص" للامانه ما اعرف وش معانها
بس من النطق تضحك

.. فتقول نزلت المطبخ اشرب لي مويه شوي تقول لي الخدامه "اوليبص"

...
استغربت شوي

؟! ما فهمت المقصود .. قلت هاه

؟ .. قالت اوليبص انتي اسم اوليبص

.. قلت طسي هناك يا كلبه

#$%#@$@# < كلام مشفر

هههههههههههههههههه .. طبعا
خويتنا عصبت وحقدت على جدتها شوي مالها داعي تروح 4 سنوات تناديها كذا ! ..

كثير نسمع سوالف الخدم الي ينحاشون واغلبهم خادمات .. اما سمعت سالفة سواق انحاش

جديده علي ههههههههههه .. لكن من الغباء ما يعرف ينحاش .. الي ينحاش ما يروح لاماكن
مشتبهه

.. فسمعت هالسالفة من بنت خالتي تقول انها سمعتها من صديقتها عندهم سواق
انحاش ومن الظهر لين العشاء ما لقوه يوم جا صلاة الفجر جا صلى معهم

هههههههههههه
ويمسكه اخوها مع قفاه بعد الصلاة

! وياخذه معه للبيت ويقفل عليه !! غبي غبي غبي هههههه

بعض الخادمات حراميه وبعضهم الله يكفينا شرهم ساحرات

! .. يعني لما شغالتكم بتسافر
لزوم تفتشونها

.. فصديقتي تقول لي كل ماجات شغاله عندنا بتسافر نخليها تروح عند شغالة
خالتي تسلم عليها وتودعها وبينما هي هناك .. نسوي سطو على غرفتها واغراضها وعفشها
ونفتش نشوف اخذت شي والا لا .. قلت لقيتو شي خذته

؟ قالت اكيد بنلقى لقينا اشياء
واجد بس بعضها عاديه العاب اكسسوارات حتى وهي مكسوره ماخذتها

..

وصلت لنهاية موضوعي الي الصراحة ما ادري شيبي لكن هذا الي طلع معي اليوم

.. كنا
جالسين وطلعت سوالفنا كلها عن الشغالات ووو وطبعا الي جاب طاري هالموضوع ان شغالة
خالتي بتسافر بكره

ههههههههههه لزوم نفتح مثل هالمواضيع ومنها ندردش ونفرفش

..

عاد لازم اعطيكم اسئلة < واجب قراءة

- بالغالب ببيتكم او ببيت احد اهلك عمك خالك جدك عمتك خالتك جدتك اين كان يكون فيه خادمة او سواق ؟ كيف تعامل اهل البيت معها

؟

- تحبون تطيحون الميانه مع الخدم ؟ يعني انتي يالبنت تسولفين مع الخدامة وضحك واستهبال ؟ وانت يالولد نفس الشيء مع السواق ؟

- مواقف صارت لك مع الخدم

؟

- نظرتك بشكل عام لهم ؟

- مساحة حرة تكلم فيها بما يتعلق بالموضوع المطروح ..

ان شاء الله يعجبكم طرحي الي مدري وش يبي < اثار السهر

..
ونشوفكم بمواضيع ثانيه .. وكل عام وانتم بخير وجمعة مباركة / السنيورة