|
حنا يالقصمان ما نحب الفضايح ابداً ( الجزء الثاني )
طبعاً مثل ما تعرفون حنا يالقصمان ما نحب الفضايح ابداً
هذا الجزء الثاني من فضايح أخواننا أعضاء شبكة الزعيم
ما يحتاج ما يبيلكم توصيه ،، استروا عليهم 
خوينا وبنت الفيصليه
هذا واحد من الأعضاء الله يستر علينا وعليه
كان بمركز الفيصليه بالرياض
بقولكم القصه بأختصار لأنها طويله
رقم بنت مدري هي رقمته المهم انهم اخذوا ارقام بعض 
ابو الشباب يدق عليها ما حد يرد
بعد اشوي ترسل رساله على الجوال
بس اذا دق ما حد يرد
بس الرسائل تدهر
وعلى هالموال لين اكتشف بعد فتره ان البنيه طرماء !!
لا وزود على ذلك البنيه حبته
طبعاً انا على طول قمت بالواجب وباركت لخوينا على هالمحبه
<<< موب شمتان ابداً لأن خوينا ما يبكي على حظه ابداً 
أحد أعضاء مجلس الإدارة يشتري لكزس جديده
ماشاء الله تبارك الله ،، يعطيه خيرها ويكفيه شرها
هذا واحد من الأخوان أعضاء مجلس الإدارة
شاري لكزس جديده موديل 2004
كاشخ هاليومين علينا ماحد قده
يحقله عضو مجلس إدارة راتبه عالي  اما حنا مالت علينا
حدنا هايلوكس وبدون شراع بعد
أحد الأعضاء طموحه يشتري كلباً
طبعاً الطموح يختلف من عضو مجلس إدارة إلى عضو عادي
هذا العضو متواضع وكان طموحه موب زي بعض الناس لكزس
طموحه انه يشتري كلب 
لا تستغربون هذه هي الحقيقه
لا وموريني كاتلوج كلاب يقولي هذا احسن وإلا الثاني
عاد انا على طول سألته تبيه فل كامل وإلا بس جنوط
<<< ماله بهالأمور
رحلة بعد ساعه صارت بعد خمس ساعات !!
هذا واحد من القائمين على موقع الزعيم من خارج منطقة الرياض اتصل علي في احد الأيام
يقول تراني جيت على السريع في مهمه وبرجع لديرتي اللحين إذا كان ودك تجي تسلم تراني بمطار الرياض ؟
عاد انا كنت بسيارتي رايح لمشوار 
قلتله كم باقي على رحلتك ؟ قال حول الساعه او ساعه ونصف
قلت حلو يمديني اجي اسلم عليك وإذا امدانا نتغدى سوا
على طول كنسلت مشواري واتجهت للمطار وقابلت خوينا وطبعاً ما اتريق علي ابداً
المهم تغدينا ببيتزا هت بوسط المطار وطلبنا بيتزا ما ادري وش تبي !!
كانت الساعه حول الوحده ونص الظهر ، قمنا نشوف موعد رحلة خوينا كم باقي عليها
جلسنا وطلبنا شاهي وكان جنبنا واحد تارك كل اللي بالمطار وجالس يقزز فينا !!
دخلنا على موقع الزعيم عن طريق
 و 
وشيكنا على المواضيع و كل هذا وموعد رحلة خوينا ما ذكروها ابداً بالمطار !!
خبري بالموعد بعد ساعه قبل لا اجي وانا لي ساعتين واصل المطار !!
المهم اذن العصر وحنا متكين بالمطار
وجنبنا هاللي متكي من اول ما تكينا وهو مبحلق فينا الظاهر انه متخوبر زينا
قلت لخوينا لو داري كان رحنا تغدينا بالبيت اصرف من هالجلسه بالمطار بجانب ابو الشباب
اللي ما غير يقزز فينا تقولون اول مره يشوف اثنين من شبكة الزعيم
المهم خوينا خربها بعدين وقالي بدخل للصاله الداخليه اشوف وش السالفه
الكلام هذا الساعه خمس العصر يعني بعد خمس ساعات تقريباً من مكالمته لي
بس كانت ساعات حلوه خاصه مع الأخ ابو التقزيز اللي للحين ما ادري وش يبي
مشرف صنفت انه يجرب
هذا واحد من المشرفين الأفاضل طلب من أحد الأخوان انه ينزل موضوع عن حدث معين
المهم الأخ بعد الحاح من المشرف اجتهد وتعب على الموضوع ونزله
وبعد دقائق رجع الأخ يدور على موضوعه ما لقاه
ودخل على منتدى المواضيع المنقوله ما لقاه !!
انهبل الأخ واستفسر من المشرفين ليش يحذفون موضوعه ؟!!
وكان اول واحد يرد عليه من المشرفين هو مشرفنا اللي طلب منه انه ينزل الموضوع!!
قاله تراني ان اللي حذفت الموضوع
لأني دخلت عليه وشفت احد الخيارات وما مسكت نفسي وقلت بجربه
وعلى طول ضغطت الفاره 
وإلا الموضوع انحذف من الموقع كله
لا ويقوله وش رايك تنزل الموضوع مره ثانيه
حنا يالقصمان ما نحب الفضايح ابداً ( الجزء الأول )
|
 | 