يا مقلعين انا عندي خوي عزيز على ريتي قصدي قلبي المهم انه وده يصير مطخطخ من جد زي صديقي
الثاني الوليد وزي خوينااللبناني اللي دايم نخليه يمسك حارس مع فريقنا اذا لعبنا كوره رفيق الحريري
المهم دايم يقول لي وش اسوي اجمع راتبي وما يجي نهايه الشهر الا هو خالص على مصاريف هالعيال قلت له حاولت توفر من راتبك
قال احيانا اوفر الف واحيانا الف ومئتين
قلت انت كم راتبك قال 3900 قلت وكم ولد عندك بالضبط قال 6 قلت ما شاءلله وقلت انت لازم تغير اسلوب حياتك علشان تطلع مليونير
وبعدين هو بعد كلمتي هذي سكت وجلس برهه
(حلوه برهه) ثم انصرف (قلبناها لغه سياره قصدي عربيه)ههههههه اضحكوا عاد
وبعدين انقطعت اخباره بدء ما يجي عندنا ونتصل يصرفونا عياله حتى خويي الوليد تضايق وقال وينه هذا(لانه ما يحب يلعب بلوت الا معه)
حتى باقي الشله العليان وصالح كامل والراجحي
وسلطان بن محمد راعي البان المراعي وعلي
الشبرمي (منهو ذا)المهم انهم يسالون عنه
لانه ما فيه الا هو وانا وعلى الشبرمي اللي مطفرين والباقين مره مطخطخين اللي عنده لكزس 92
(يحسب احسن سياره لكزس) واللي عند جمس جديد 84
واللي عند مليووووووو(عجزت انطقهاواجدة عند الضعيّف محاتسيكم)
المهم مرّت من جنبي وقلت انتي لو سمحتي ممكن لوفيها ثقالة دم انك تاخذين الرقم
لحضه ياشباب انا اسف هذي قصه ثانيه
انا كنت اقصد انه مرّت الايام والشهور والسنون
والبراطم واللسان
وحنا ما ندري عن خوينا وش صار عليه وين ايامه
تغيرت الدنياء مره صارو البنات ما يستحون يلبسون العباة على الكتف وبعضهم يمسكون الطرحه
على اثاميهم وخشومهم كنهم مارين من عند الدئري الجنوبي عند محطة الصرف الصحي وبعضهم
لبسات عباة استرتش (انا عجزت افهم وش فايدة العباءة اذا صارت استرتش)حجاب اخر الزمن اعوذ بالله والشباب صارو يقلدون البنات الواحد منهم ما تدري هو هو ولا اخته حتى مره فيه واحد من هالشباب يلاحق وحده لابسه ضيق ويقول في نفسه تمام اليوم بعطي هالسوريه الرقم ويوم شافه من قدام لقاه ولد مخطط وجهه بسكسوكه صغيره مره
طالع وجهه كنه ملعب تنس ارضي وتغيرت امور واجده بس مالها داعي اقولها الان
حتى خويي الوليد زادتت ثروته من مليوووو(هذا الشي الوحيد اللي ما تغير اني ما قدرت انطق الرقم هذا) المهم زادت من مليووو.. الى مليووو.. وميتين الف لانه الدنيا تغيرت مره
وخويي اللي معه اللكزس اغتناء مره مره مره
ما شاء الله عليه وشراء كورلا عنابيه والحريري
اللي كنا نمسكه حارس مع الفريق صار رئيس لبنان
والمهم في يوم من الايام وانا قاعد في بقاله صديقي الوليد اللي اسمها بنده وصديقي الوليد جالس يحاسب الزباين هو والعامل الهندي حقه قلت
ياولد وش رايك اني اروح اشتري لي حاجات للبيت لاني بصراحه ما ودي اني اشتري من بقاله ثانيه علشان اكسّب صديقي
وانا عند قسم النواشف مديت ايدي على جبن السايل الكاسات (الكرافت) اباخذه معي الا واحد يصرخ باعلى صوته لا لاتفعل ياخلودي
نظرت اليه نظره ثاقبه وقلت لهوو من انت يامن تلبس هذه الثياب الجميله والبشت الملكي والساعة
الكلوركس اسف قصدي الرولكس (قلبناها لغه سيارة
قصدي عربيه مره ثانيه) المهم قال ما عرفتني قلت الوجه يبي تغير لانه اذا ما غيرناه المكينه
تبي تخرب عليك (انا وين رحت اسف شباب) المهم قلت الوجه مو غريب علي( وابراهيم وصالح وناصر)
قال تذّكر... وانا ادقق فيه واتمقل واتمقل قلت ياخي
انت يوسف قال بس وصلت قلت له( وينك امس ماجيت
كنه ما له عشرين سنه عنه) قال الله يهديك ما تخلي مزحك انا لي عشرين سنه ما شفتك وانت تقول وينك امس المهم قلت امش الوليد هناك عند الكاشير
خلنا نسمع اخبارك ونشوف وش صار عليك قال والله
طيط طيط طيط طيط طيط (يعني مشغول)ههههه اضحكوا عاد
المهم قلت له يابن الحلال تعال ابن ادم يموت والشغل ما يقضي قال طيب بس ربع ساعه ابجلس معكم
قلت معليش انت تعال بس
رحنا سلم على الوليد وجلسنا الا بدخلت علي الشبرمي المهم تجمعنا وطلب الوليد من الهندي حقه انه يجيب عصير الربيع مشكل واربع كيسان
بلاستك قال علي الشبرمي لاانا مسوي ريجيم جب لي بس مويه(فاهمن الرجيم غلط يحسبه بس شرب ماء)
المهم قلت يايوسف وش قصتك قال جايك بالكلام
لا تستعجل قلت له انت ما بعد قلت شي علشان تقول جايك بالكلام قال صح بس وش اسوي اشغال شاقه مع موبد (هذي خطمه ما لها داعي) هو قصده انه دايم
طيط طيط طيط طيط طيط طيط (المره هذي اكيد فهمتوها) قلت له انا طيب انت ما عندك خدمة انتظار المكالمات (callwaiting) علشان ما تصير دايم مشغول قال الله يهديك ما تخلي مزحك
المهم قال تذكر ولا يهونون الشباب يوم انت تقول لي
انت لازم تغير اسلوب حياتك علشان تطلع مليونير
قلت لا قال المهم انك قلت لي كذا قلت طيب وبعدين
قال رحت البيت وقعدت عند ام العيال افكر افكر افكر بصمت عميق(عمركم شفتوا احد يفكر وهو يصرّخ)
المهم قال وبعدين مر كم يوم وانا افكر
وداري انه فيه في حياتي شي غلط ليش كل الناس يوفرون رواتبهم الا انا انا لازم اصير مليونير انا لازم اصير مليونير واخير اكتشفت السر
قلنا كلنا بس مو بصوت واحد يعني كل واحد قال وشو بس مو مع بعض قال (الجبن الكاسات السايل(الكرفت))
قلنا وش فيه قال انا كنت كل يوم اشتري منه علبه
ام 13 ريال للعيال لانهم مره يحبونه اكثر من امهم الله يهديهم فقررت اني اوقف هالنوع من الاجبان لانه غالي مره وهو اللي هادن الميزانبة واكتشفت بعد فتره انه بعد شهرين من هذا القرار حسيت اني بديت اغتني شوي شوي وبعد ثلاث شهور فتحت مغسله ملابس وبعد 6 شهور فتحت فرع للمغسله قلت انا وين قال جنب مغسلتي الاوله
علشان ما احد يفتح جنبي ويخرب علي قلت والله انك ذكي وبعدين قال وبعدين بدت الفلوس تلعب برجلي
وبعدين تطورت شوي شوي وصرت مليونير والان انا ساكن بفله كبيره في مخرج 7 (اللي اصله فقير مستحيل يتطور لان خوينا هذا مهوب قادر يقول قصر)
المهم اتفقنا انا وعلى الشبرمي اننا ما عاد
نشري جبن سايل ابد ابد ابد علشان نصير مليونيرات بس على فعلا ترك الجبن السايل وفعلا اغتنا وفتح محل بنشر وانا بعد مدة خرت وما قدرت وتركت الاتفاق والهلال والوحده قصدي اني ما صملت على الاتفاق ورجعت اشتري جبن سايل (كرفت ) مره ثانيه وهذاي على
حطت ايدكم ضعيّف ما عندي شي
*
*
*
*
*
*
*
*
*
*
*
*
*
*
*
*
*
*
*
*
*
*
*
*
*
*
*
بس بصراحه ما ابي احد يلومني الجبن السايل
(الكرافت) طعمه ما يقاوم والله لو ايش ياشباب
انا ما اقدر اتركه وخاصه مع الخبز التميس اذا
صارت حاره مره
ولا انتم وش رايكم؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟