يا هي بصمه عار في تاريخك يا زعيم ياهي جت قويه على قلب كل هلالي خمسه في خمسه لا بعد في اقل من اسبوع وعلى مين زعيم اسيا الهلال على الفريق الي اي فريق يباريه يحسب له الف حساب .... الخمسه الاولى ما استوعبناها زين وقلنا كبوة جواد وبعدها بيرجع الهلال كما كان من الصعب ان ينهزم وعديناها ويدينا على قلوبنا... وما مدانا نقوم من هالصدمه الا وخمسه ثانيه جت في وجيهنا الاولى من الشارقه والثانيه من الأهلي .
صح ان مباراة الأهلي انظلمنا فيها كثير بس التاريخ ماراح يسجل الحكم غش ضد الهلال ولا ضد الأهلي التاريخ ما يعرف الا لغة الأرقام وبس والتاريخ سجل هالهزيمتين الكبيرتين والغربيتين على الزعيم.
وبمناسبه هالهزيمتين وعشان ما تتكرر هالأمور مره ثانيه او بالأصح مره ثالثه عندي عدة امور احب اطرحها على شكل نقاط والي اظن ان الكثير من الجمهور الهلالي يطالب فيها:
1. ابو مساعد ماقصرت وكنت على صواب لمن كنت اشد المعارضين على اقالة اديموس وان شاء الله يكون خبر استقالة ادراتك بعد البطوله العربيه خبر صحيح لاتاحه المجال لأداره اخرى تقود الزعيم الا منصات التتويج واقول لأعضاء الأداره الحاليه مشكورين وما قصرتوا واعطوا المجال لغيركم لخدمة الزعيم.
2.خبر اقالة العجلاني قرار صائب وناجح 100% باذن الله وما قصرت يا عجلاني بس مستواك مو مستوى فريق كبير زي الهلال مع احترامي لك.
3.سامي الجابر ومحمد الدعيع اتمنى ان هالسنه تكون اخر سنه لكم في الملاعب ولا تشوهون تاريخكم اكثر من كذا بعد الثمانيه والخمستين .
4.فهد المفرج اتمنى منك انك تدور لك على فريق ثاني غير الهلال امكاناتك ما تساعدك على انك تلعب في الهلال مع احترامي لك ولاخلاقك العاليه .
5.قرار الاداره بالتعاقد مع اوسكار على امل انه ينتشل الهلال من الوضع الحالي اظن انه جيد نوعا ما لكن اتمنى عدم استمرار اوسكار مع الهلال في الموسم المقبل واننا نتعاقد مع المدرب الكبير والي اظن انه افضل مدرب درب الهلال الجنرال يودانيسكو.
6. البحث عن لاعبين اجانب بمستوى عالي ويكونون افضل من تراوري وسيفو وسيسيه ولو دورنا بنلاقي كثير وان شاء الله في الموسم المقبل يكون الاعبين الاجانب على مستوى عالي .
7.(رسالة موجهه الى جميع لاعبي الهلال) : لا تخذلون جماهيركم اكثر من كذا وحققوا البطوله العربيه بعد توفيق الله سبحانه وتعالى ان شاء واوعدونا بمضاعفة الجهد وتحقيق البطولات في الموسم المقبل ان شاء الله وابعدوا عن الشد العصبي والأرتباك واتذكروا انكم تلعبون في زعيم اسيا وفي فريق يعتبر الاكثر جماهيريه في المملكه العربيه السعوديه وحنا معاكم ووراكم على الحلوه والمره.
8.المطالبه بعودة الرئيس الذهبي للهلال الأمير بندر محمد لتولي مهمة الرئاسه في نادي الهلال او عودة وجه السعد والخير الأمير سعود بن تركي وادارته الناجه فالهلال في حاجه الا خدماتكم في هالوقت فلا تخذلوا الزعيم وجماهيره.
9.تنسيق الاعبين الي ليس الهلال بحاجتهم مثل المسعري والمفرج وغيرهم من الاعبين الي الزعيم ليس بحاجتهم والبحث عن لاعبين شباب واعطاء الفرصه للاعبين الصاعدين من درجه الشباب لان الهلال ابتعد كثيرا عن الاعتماد على ابناء النادي الي لو جتهم فرصه سوف يقدمون افضل المستويات باذن الله تعالى.
10.الكابتن صالح النعيمه قال ان هناك تدخلات اداريه في تشكيله الهلال في مبارياته ولديه مايثبت ذلك نتمنى من الكابتن طرح هالموضوع والأدله الي عنده في هالمنتدى عشان تبان لنا الرؤيا كمحبين للهلال.
11.يا جماهير الهلال الزعيم بحاجة ماسه لكم ولخدماتكم فلا تخذلوا هالكيان الكبير وشجعوا الهلال واوقفوا معه فالزعيم بحاجه كبيره لوقفتكم في هالوقت وكل ولا تكونون هلاليين بس في وقت الأفراح والبطولات واوقفوا مع الزعيم في كل وقت وفي الأفراح والأحزان.

وفي الختام ( رحم الله العم عبدو وادخله فسيح جناته وادعوا له بالمغفره والرحمه وانا لله وانا اليه راجعون)......