مرحبا بالجميع و شكرا لكم على مداخلاتكم 
بالنسبة للأخوات اللي قالوا وين صور مصنع الشوكولا اقولهن اني ماحرصت على تصويره لأني لست من عشاق الشوكولا ولو علي مارحلت له لكن زوجتي والبنات أصروا على الذهاب له فماقدرت أرفض 3 مقابل واحد صاروا أغلبية ساحقة حاولت أقنعهم نروح للبحيرة في القرية القديمة مقابل اني اذا رجعنا وديتهم لمصنع الشوكولاته اللي على طريق الخرج لكن ماأقتنعوا يقولون أن مصانعنا ماتسمح بالزيارة لأحد يخافون من العين >>> باتشي على غفلة 
المصنع اللي رحنا له اسمه Alprose ويقع في مدينة لوغانو الحدودية مع ايطاليا بالقرب من ميلانو ويوجد به متحف لتاريخ الشوكلاته السويسرية وتتفرج على فلم عن التاريخ وعن طريقة الأنتاج بعدها تدخل وتشوف كيف تتم مراحل التصنيع من التحميص الى التغليف وبالأخر تدخل المعرض وتاكل لين تقول بس  وممكن تشتري بالجمله من عندهم بداية من 2 كجم الى 10 كجم وبسعر مغري المهم قررنا نشتري 2 من ابو 2 كجم هدايا وللبنات وكان سعر 2 كجم ب 45 فرنك حوالي 160 ريال وسعر 10 كيلو ب 75 فرنك حوالي 280 ريال فأخذنا كرتون ابو 10 كيلو وحتى بمطار ميلانو سألتنا موظفة الشحن وش هذا ؟ واين ؟؟ قلت وين واين عشان نروح فيها !! قلت هذا شوكولا وقالت 10 كيلو !!!! وفقعت ضحك
بالنسبة للسكن والأوتيلات:
تعلمت من سفراتي السابقة في اوربا اني ماأخذ أوتيلات كبيرة لأنها غاليه جدا الليله ممكن توصل ل 2000 ريال وانا من النوع اللي مايجي للفندق الا للنوم فقط لأني اخرج من بعد الفطور وماأرجع الا بالليل !
السبب الثاني تعامل الفنادق هناك مختلف! الفنادق اللي تديرها شركات تعاملهم جاف جدا وكل خدمة بمقابل لو تتطلب حتى بطانية زيادة
فصرت أحرص على الفنادق اللي تمتلكها وتتوارثها العائلات ابا عن جد! حيث العائلة هي من يدير الفندق فتجد تعاملهم كأنك ضيف عندهم ولست مستأجر!! في الصباح يحرصون على القاء التحية عليك ويسألونك عن الأفطار ماذا تريد ان تضيف للقائمة هل تحتاج أشياء اضافية بالغرفة بطانيات للبرد شواحن للجوال وغيرها بدون مقابل وباابتسامة واحترام وتقدير كأنهم يعرفونك من فترة طويلة!
وتجد تاريخ الفندق العائلي من 400 الى 500 سنة والعائلة تديره 
وتتميز الفنادق العائلية بنظافتها الفائقة والأمان على ممتلكاتك وأغراضك الشخصية بعكس فنادق الشركات اللي ماتدري من يدخل غرفتك لأن أكثر من واحد معه ماستر كي وقد حصلت العام الماضي سرقة لسياح سعوديين في جنيف في واحد من أكبر الفنادق
عيب الفنادق كان صغر المساحة وهذي عامة في اوربا !
الأثاث متوسط ليس بعالي الفخامة وليس رديء
السعر جدا معقول تجد الغرفة العائلية مع الأفطار في حدود 600-700 ريال حسب سعر صرف الفرنك
وهذي صور للفنادق من موقع بوكينق لأني ماصورتها
فندق تور بجنيف! فندق عائلي تديره امراة سويسرية قمة في التعامل والرقي يبعد عن محطة القطار 5 دقائق مشي وعن البحيرة ايضا 5 دقائق! موقع ممتاز! الفندق يغلق ابوابة الخارجية 11 مساء والمفتاح اللي معك يفتح الباب الخارجي والداخلي
فندق توشكانا في انترلاكن ايضا تديره امراءة عجوز هي وزوجها حسستنا هي وزوجها أننا أبنائهم ولسنا نزلاء للفندق ! أحبوا بناتي كثيرا وبناتي أحبوهم
فندق اراميس في ميلانو ايضا عائلي يديره شاب ايطالي هو وأخوه ناس محترمة وبروفيشنال ويعتبرونك ضيف!
بالنسبة للتنقلات:
الغالبية كانت عن طريق القطارات السريعة بين المدن الكبيرة والترام والمترو الباص داخل المدينة
في سويسرا هناك كرت تشتريه اسمه السويس باس swiss pass لمدة 4 ايام او 8 او 15 او 30 يوم حسب المدة اللي تحتاجها هذا الكرت يسمح لك بركوب جميع انواع الموصلات داخل الأراضي السويسرية ماعدا التكاسي !!
ابد توجه لمحطة القطار واختر القطار المطلوب واركب وشوف اي كراسي فاضية واجلس اهم شي تكون غير مكتوب عليها محجوز! وماواجهتنا اي صعوبة للحصول على مقاعد في كل السفرات الداخلية هناك ولله الحمد
السويس باس العائلي لمدة 15 يوم بسعر 774 فرنك وهناك الدرجة الأولى بسعر 1182 فرنك والفرق بينهم هو حجم الكراسي واللون
وكذلك في المترو توجه للمحطة وشوف الخط بدايته ونهايته واذا المكان اللي تبيه بينهم اركب في الأتجاه المطلوب الى ان توصل محطتك وانزل هناك !!
مواعيد الباصات والقطارات والمترو والترام تنطلق وتصل في مواعيدها بالثانية
وسائل النقل في سويسرا اقل مستوى عن ماشاهدته في المانيا خصوصا ميونيخ فشبكة المترو والقطارات أخر موديل والسبب انه تم تجديدها في عام 2006 بسبب كأس العالم
المانيا حاجة ثانية واذا تبي تعرف الفرق بينها وبين سويسرا في التقدم والتطور قارن دبي بالمنامة مع احترامي لأهل البحرين
الشعب الأوربي في حاله وبعض القرويين يحبون السياح ويحبون أن يسألونهم من اين انتم ؟ وبعضهم يظنوننا من ايران بسببب الحجاب وبعضهم يحسبوننا أتراك لأني أشبه مهند كثييييير
لم أواجه ولله الحمد أي أشخاص عنصريين ولم يضايقنا أحد بسبب الحجاب وبعضهم يفرح لرؤية الحجاب خصوصا النساء البوسنيات ويسالوننا عن مكة المكرمة وعن شوقهم لرؤيتها
اخر تعديل كان بواسطة » قرقاص في يوم » 15/10/2009 عند الساعة » 02:36 PM | 