هلا والله هـــ الشماسيةـــلالي ..

إقتباس إنني أسأل وأتساءل , ألتمس وأتوجس عن مخترع القرار ومبتكره هل بلغ المدى في التفكير أم نال المنتهى في الإبتكار ؟! هل هو سعودي الأصل والمنشأ العيش والتعايش ؟! وهل نزل إلى الميدان واطلع على البيوت ؟ وهل عمل استفتاء ليعلم كم نسبة مالكي خطوط الهواتف ناهيكـ عن الإنترنت أو البريد الإلكتروني ؟!

هذي اكبر مشكلة تواجهنا في التعليم .. اصحاب القرار وما يصدر منهم سواء كانت مقترحات او قرارات ..
مشكلتهم انهم ما يعايشون الواقع لا يشوفونه .. او بالاصح غاض الطرف عنه ومصورين الخيال اللي يحلمون ( مهوب جمهور النصر ) فيه على اساس انه واقع نعيشه ..
مجرد تفكيرهم في هالشي اعتبره نكته فما بالك انهم يقرونه او يقترحونه ..
وش العوامل اللي عندنا تساعد على نجاح هالشي ؟؟!
النت متوفر عند كل الطلاب ؟؟!!
اذا اقرينا في هالشي مع انه مستحيل .. هل قوة الاتصالات تساعدنا على هالطريقة ؟؟!!
ولو قلنا ان الاتصالات مافيه اطلق منها .. هل قوة المواقع والسيرفرات اللي تبي تتحمل هالضغط الكبير موجوده عندنا ؟؟!
ولو اقرينا بهالشي مع انه ولو بالاحلام .. لو قلنا ان كل هالامور تمام التمام كم تبي تكلف الحكومة ميزانية التعليم الالكتروني ؟؟! وكم لجنة من لجان حبيبنا الهاوي تبي تشكل ؟؟! ومتى تبي تتطبق ؟؟! وهل تكلفة الخطة الجديدة مهوب من الاحسن والافضل انه يتم استخدامها في بناية منشئات ومباني تعليمية افضل بكثير من الموجودة حالياً ؟؟! واللي قابلة للانهيار في اي لحظة ؟!
لو قلنا ان كل هالامور مشت وتمت على احسن ما يرام وانت يا صدى متشائم وتحاول تعرقل مسيرة التعليم والتطور في ظل نهضة البلاد ..
هل الطالب يبي يستفيد من هالشي وتبي تكون البيئة التعليمية مشابه ولو قليلاً لبيئة المدرسة ؟؟! من ناحية التفاعل وغيره ؟؟!

مشكلتنا في اصحاب القرار .. ما ادري هم عايشين معنا يوم يفكرون في هالشي وشايفين الحال اللي حنا فيه والا هم في بلد غير السعودية والا حنا من الاساس عايشين في بلد ثاني مهوب السعودية ؟؟!
بديت اشك اننا عايشين في بلد محد يدري عنه الا حنا بس .. وملعوب علينا وقايلين هذي هي المملكة العربية السعودية وحنا مصدقين .. والا السعودية الصدقية ثانية غير سعودتينا حنا ..؟!!




ارجع لنقطة ذكرت في خطة الوزارة ..

إقتباس ومنحت وزارتي الصحة والتربية مدراء المدارس صلاحيات لاتخاذ ما يلزم لحل مشكلات التكدس بين الطالبات في الفصول أو في الفسح أو حتى إلغاء الطابور الصباحي، خصوصاً المدارس المستأجرة.

اقرار من وزارة التربية بنفسها وبشهادة من وزارة الصحة .. ان المدارس المستأجرة بيئة غير صالحة صحياً واكيد انها مهيب صالحة للتعليم .. واول مشكلة واجهتهم قالوا الاحقية لمدراء المدارس بالتصرف .؟؟!!
وشلون يعني يبدأ المدير يسوي جدول غياب للطلاب والطالبات .. كل يوم يغيب كم طالب والا وش السالفة ؟؟!
طيب ليش انت ما تحاول تحل هالمشكلة من الاساس وتوفر مباني حكومية قادرة على استيعاب الكم الهائل من الطلاب بدل تكدسهم وضيقتهم اللي هم يعيشون فيها ؟؟!!
ليش ما فكرت انك تحل هالمشكلة قبل لا تجيك انفلونزا الخنازير .. او غيرها من المشاكل اللي يمكن تعرض صحة الطلاب للخطر ؟؟!
ليش ما تحاول توفر سبل العلاج قبل لا تصير المشكلة ؟؟ ليش ما نحاول نفكر في المستقبل ونبني خططنا على هالشي بدال ما نمشي وضعنا بقولة ربك يبي يسهل ووقتها يحلها الف حلال ؟؟!
ليش دايم نجلس ننتظر المصيبة تصير وعقبها نفكر في علاجها ؟؟!! ليش ما نفكر في المشكلة والمصيبة قبل لا تصير ؟!!
بالتالي وفرنا الكثير من المال والجهد وغيره ..



يعطيك ربي الف عافية ..