رد يشوت يسار ماهوب يم عشقك


عندما تعشق الإنسآن تحآول بأن تكون مثله تحاول بأن يكون ذوقك مثل ذوقه تفكيرك مثل تفكيره طبعا البعض يخالفني في ذلك
لكن هذه وجهة نظري .

من ايام اشوف هالجملة وفاطس ضحك بجد حسيت النسم انقطع و عيوني دمعت وسعت صدري

ذكرتني بواحد الله بالخير كنت اعرفه عندهـ رأي ( الذ ما بالحب انــّــا نتألم واطيب ما بالجرح انـــّــا نتساوى )

لكن بصراحة انت غطيت عليه ، تخلي العاشق كأنه رب أو إله عالم السرائر ، ما تخفي الأنفس وتضمر الأفئدة من اختصاص الله مو العاشق !

مافيه انسان بهالأرض يقدر يعرف تفكير الثاني احنا لنا ما يظهر والظاهر غالبا ليس الحقيقة ..

لو كانت معرفة تفكير الآخر لأحد لكانت لرسولنا اولى او للأنبياء من قبله .. مو للعشاق ..

لو كانت معرفة تفكير الآخر لأحد لكانت للأزواج ابسط مثال رأفت الهجان عاش بشخصيتين مزدوجتين متناقضتين مو تفكير ومع ذلك زوجته اللي ساكنته وعاصرته اغلب سنين حياته ما جابت خبرهـ !!


مشكلتنا نعطي انفسنا حجم اكبر من اللازم اننا اذكياء ونفهم ونحلل بينما نحن بشر نحكم ع مايظهرنا لنا فقط ( لا تصدق كل ماتسمعه ولا نصف ماتراهـ ) وكوننا بشر دايما ننشغل بالتفاصيل الصغيرة اللي تخلينا نتوهم فيها و ننسى ماوراء التفاصيل ..

بــ اعطيك امثلة من الأحياء الشعبية كون العايلة تكون ملمومة ع بعض اغلب الوقت ،،، في الحي اللي ورانا مات شاب في اشتباك مع قوى الأمن يوم جو لأبوهم يحلف ولدي مسالم وهادي ع نياته ونفس الشيء شهدوا مدرسيه بالثانوي وامام المسجد بصلاحه و تقواهـ لكن الولد كان عايش شخصيتين وحدهـ صالحة و الثانية زعيم عصابة السرقة بمحافظتنا الصغيرة ...
لو ع تفكيرالعشاق مثل بعض كان ماراح يكون هناك احد اكثر عشق من ابوهـ له ،، وحاله وهو يرفع الغطاء شوفوا ولدي نايم و يشاخر .. مكنسة كهربائية مكودة وشريط مشاخر يدور بمسجل ع قد الحال ...

الحي اللي ورى اللي ورانا بنت الكل يجزم انها مصابة بالتوحد وهي معلقة نص ضباط المنطقة عدا الجنود ويوم جابوها الهيئة الأم بنتي معاقة ومرتفعة درجة حرارتها و طلعت من البيت واستغلوها الأشرار ...

والله منطقتنا مسميها انا من زمان شيكاغو الجنوب .... تفكير الأم وعشقها لبنتها بعد مافاد انه تعرف حقيقة تفكير بنتها او شخصيتها ...

باعطيك مثال ثالث ادهى منهم كلهم بنيه طيبة بريئة لكن محد اتفق ع رأي فيها اللي يقول نظيفة وانيقة وهاي واللي يقول وسخة ومعفنة واللي يقول جميلة واللي يقول قبيحة واللي يقول مثقفة وذكية واللي يقول غبية وجاهلة واللي ووووو وكل يوم لها شكل ولها دور تجيده وتعيش به سنين مو شهور قبل تتركه وتنتقل للدور الثاني .... بيوم قرروا صديقاتها يفصلون فيها سألوا اصغر خوات زوجها "19 " وش رأيك فيها ؟؟

قالت فيها من البراءة لدرجة انها ممكن تقتل الرجل وتمشي بجنازتها وهي تبكي وتتقطع قلوب الناس عليها من كثر ماهم راحمينها ...

حتى صديقاتها ما يملكون معلومات كاملة كافية عنها ككل وحدة تعرف اقل القليل ....
هالنماذج وغيرهـا كثير هي انتاج مدارسنا الغراء المبجلة في شيكاغو الجنوب ... ليه ؟؟؟

من حنا صغار يدرسونا هالنكتة والمفروض نضحك عليها ...

اتفق الملك مع وزرائه كل واحد يجيب بيضة ولا دخل جحا تبيضون وتكاكون لما جاء جحا قاله وين بيضتك ؟؟ فرد كوكو كو كو انا الديك طال عمرك ...

شايف السماجه كيف نضحك ؟ ع العكس جحا ذكي زمانه ( سيد القوم هو المتغابي ) واسم الله ع ربعنا طبقوها وصاروا للناس جحا ظاهر و الباطن كل واحد بدع ع كيفه ..

وتلقانا متجمعين ( حجل و طويق ) تبي ارهابي عندنا " لو اقولك عدد مساجين الحاير او المطلوبين امنيا او اللي بقندهار غير اللي توفوا وجابوهم تمسك رأسك ..

عدا عن البنات وحكاياتهم والشباب وسرقاتهم ومضاربتهم ،،،، بيئة خصبة لمآسي الناس ...

وبالمقابل فيه داعيات وناشطات دينيا او سياسيا و مدرسين جامعيين موظفين بــ آرامكو ممرضين وعسكر و غامضين او مجهولي الهوية

وفيه اللي يمشي جنب الحيط ويقول يالله السلامة شرواي طبعا،،، لكن تجمعنا الحكايا لو ما تجمعنا... لكنها حكايات الظاهر بس حتى يستجد امر ما و نعلم الخافي او يمكن ما نعلمه نتوهم انـــّــا علمناهـ

هذا اللي شدني من موضوعك وضحكني فحبيت اتباثر واتثيقل دمي واعلق عليه ،، مع اني نعسان ويالله اكتب واجمع فكري السخيف وكم كلمة اللي انا حفظهم يقالك مثقف ...

وإلا ترى وانا اخوك ماعندي ماعند جدتي ،، انا وبكل اسف غبي منقهر متردد ساذج امعة جاهل فقير وكل ماتريد من صفات اهم شيء ماني ذكي ولا متغابي .. انا بالسليم السليم


نخليكم مع العشق لعبة الأطفال المفضلة ،، اطفال تهوى تقتنيها واطفال تهوى تكسيرها ...