هلا والله شباب :

يا شباب ما ادري وشلون ابدى في القصة , احسن شي اني ادخل فيها على طول :
يا شباب انا كنت ادور على غرفة الادارة اشوف مشرف ناسي الباب ولا شي بس المشرفين ما يتركون الباب ابد مفتوح , وودي القى شباك مفتوح ادخل منه بس بعد مافي فايدة مافي شبابيك مفتوحة , قلت احسن حل اني ازرف مفتاح من احد المشرفين .

يوم من الايام كنت على الماسنجر انا والاسطورة اسولف عليه واشوف مفاتيحه على الارض , قلت يا ولد خذها واخذها واقول لواحد انه ينسخها بسرعة ويرجع الاصل والاسطورة مادرى اني ناسخ المفتاح , قلت يا ولد ابدخل غرفة الادارة .

في الليل احتريت كل المشرفين يروحون يشيكون على منتدياتهم , ويوم راحوا كلهم دخلت غرفة الادارة وجلست اتمشى فيها واشوف الي فيها , وانا ماشي ادخل لغرفة مكتوب على الباب منتدى المواضيع المحذوفة دخلت ابشوف المواضيع المحذوفة واغلب المواضيع حاذفها طلال لا وبكل فخر يكتب انا حاذف ها الموضوع ولا الرجال حاط في ها المنتدى لوحة يبارك فيها لنفسه على وصله لرقم 6000موضوع محذوف , زهقت وطلعت ادور في الغرفة ودخلت غرفة التحكم ( والله انها غرفة رهيبة ) ويوم دخلت لقيت بلاوي زرقا لقيت تلفزيونات وكل تلفزيون موصل بكاميرا مغطية المنتدى كله , وانا اطالع في التلفزيونات القى الشباب ابو دم ازرق ومكار والاعب الموهوب وزعيم اسيا يلعبون بلوت وزعيم اسيا( توه يتعلم بلوت ) معه اربعمية وقال سرى :p :p ضحكت على لعبهم شوي , وبعدين لقيت نايف والشايب فهد يلعبون كنكان ومسكين نايف الشايب رقعه ترقيع بالكنكان , وشفت بعد النجيدي مجمع اعضاء واجد ويعطيهم قصص من بطولاته , وعاشق النمر انقهر منه وقام يسوي مثله يجمع ناس ويعطيهم من النصب وكل شوي النجيدي وعاشق النمر متهاوشين , ولقيت بعد الي يلعب سوني في المنتدى والي يروح يرد على موضوع .

زهقت وطلعت من غرفة التحكم ورحت ادور في الغرفة الا والقى شي غريب واقرب منه الا القى ادوات تعذيب , يا ولد وش القصة انحاش شي اخاف يعذبوني شي ويوم جيت اطلع الا طلال والاعصار والاسطورة داخلين للغرفة انا رحت وتوزيت ورى دولاب ودخل باقي المشرفين واتفقوا مين يناوب الليلة وجت المناوبة على طلال ويوم طلعوا جا طلال يبي يطلع يدور مواضيع يحذفها جيت انا ابطلع الا ويطيح الدولاب الي انا وراه , ويوم شافني نادى باقي المشرفين ( للاسف سفر ماكان معهم ) وقالوا يا شباب هذا واحد جديد حاول انه يقتحك الغرفة خلونا نعذبه صح :p :p وقالوا لي : غيرك كان اشطر .

طبعا بدى مسلسل التعذيب ,اففففف يا ان عندهم وسائل تعذيب واجد اول طريقة استخدموها انه يثبتي اربعة من المشرفين ( طلال - الاسطورة - الاعصار - سلمان9999) ويطب علي الاولاني ويفغصني الاولاني ما شاء الله عليه خفيف وبغيت اموت من ها التعذيب , ويوم ملوا من ها الطريقة قاموا يدورون طرق ثانية وما شاء الله عليه طلال خبرة في التعذيب خاصة الدببة مثلي :p :p , طبعا بعد ما ملوا من التعذيب وقال كل واحد انه وده يروح ينام جلس طلال وابوناصر في الغرفة , كالعادة راح طلال يدور مواضيع يحذفها وجلست انا وابوناصر احاول فيه انه يفكني بس ما طاع ودق ولد المجيدي على جوالي يبي لاننا انا وياه متفقين نروح نصفق واحد ورد ابوناصر على جوالي بالغلط ( جوالي مثل جواله ) وانا اصارخ الحقوني انا اتعذب في غرفة الادارة , ابوناصر نادى كل المشرفين بعد ما صار ها الشي .

ابراهيم نادى زعيم اسيا وقال له عن السالفة وقال له لازم ننفذ fahoode جاب زعيم اسيا معه نايف والشايب فهد ومكار ابودم ازرق والاعب الموهوب وجاب النجيدي عاشق النمر وصقر مبرقع , وخططوا كيف يدخلون لغرفة الادارة ومالقوا الا حل واحد وهو انهم ينادون سفر يساعدهم نادوه وقالوا له السالفة وقال لهم انا ابحاول اطلعه وابترك الباب مفتوح اذا تاخرت 10 دقايق ادخلوا .

الشباب مطافيق يوم جت 8 دقايق الا وهم مداهمين الغرفة ويطيحون تصفيق في المشرفين النجيدي مسك طلال وصفقه جد من كثر ما حذف له مواضيع وردود والي مسك الاعصار والي مسك الاسطورة ...........الخ .

والحمدلله في النهاية طلعت بسلام من ها الغرفة بعد مساعدة الشباب واني ما راح اعودها ابد , بس في مكان في الغرفة ما رحت له يمكن يبي له زيارة ثانية .

ارجو من الشباب الي ذكرت اسمائهم انهم ما يزعلون مني واي واحد زعل يقول لي علشان اشيل اسمه .